Kigali-Rwanda

Mostly cloudy
21°C
 

Hagiye gukinwa imikino ibanza ya  ¼ mu gikombe cy’Amahoro

Yanditswe na BUGINGO FIDELE

Ku ya Jul 20, 2018

Uyu munsi
Police FC-APR FC (Kicukiro-15h30)
Mukura-Amagaju FC (Huye-15h30)
Sunrise FC-Bugesera FC (Nyagatare-15h30)

Ejo tariki 21-07-2018
Marines FC-Rayon Sports (Rubavu-15h30)

Imikino y’igikombe cy’Amahoro igeze muri ¼ k’irangiza. Uyu munsi tariki 20 Nyakanga 2018, ikipe ya Police FC irakira APR FC, Mukura yakire Amagaju FC naho Sunrise FC yakire Bugesera FC.

Umukino uheruka guhuza ikipe ya Police FC na APR FC zanganyije igitego 1-1

Umukino uza kuba utegerejwe cyane ni ugomba guhuza ikipe ya Police FC na APR FC.  Izi kipe zombi muri uyu mwaka w’imikino 2017-2018 nta kipe yabashije kubona amanota 3 kuko umukino ubanza zanganyije 0-0 naho umukino wo kwishyura zinganya igitego 1-1.

Ubwo ikipe ya Police FC iheruka kugera kure mu gikombe cy’Amahoro ni  muri 2015 aho yageze ku mukino wa nyuma ndetse ikegukana n’igikombe. Aha yari yasezereye ikipe ya APR FC muri ½ nyuma yo kunganya igitego 1-1 mu mikino yombi. Umukino ubanza izi kipe zanganyije igitego 1-1, APR FC ikaba ari yo yari yakiriye naho umukino wo kwishyura zinganya 0-0, Police FC ikomeza gutyo kubera igitego yatsindiye APR FC ku kibuga cyayo.

Kuva muri 2013, izi kipe zombi   zimaze gukina imikino 11 uretse imikino 2  gusa APR FC yatsinze indi mikino 9 aya makipe yaranganyije.

Kuri uyu mukino APR FC yegukanye igikombe  cy’Amahoro giheruka (2017) irakina idafite Bizimana Djihad werekeze mu Bubiligi na  Nshuti Innocent wagiye mu igeragezwa muri Tunizia. Ku ruhande rwa Police FC nta bwo, Mico Justin aza kugaragara nyuma yo kuva muri iyi kipe akereza muri Sofapaka FC yo muri Kenya.

Rayon Sports izisobanura na Marines FC

Ikipe ya Rayon Sports yegukanye igikombe cy’Amahoro muri 2016 ndetse na shampiyona ya 2016-2017, ifite urugamba rutoroshye rwo guhanganira igikombe cy’Amahoro  kuko ari  ho isigaranye amahirwe. Iyi kipe ejo tariki 21 Nyakanga 2018 izakina umukino ubanza wa ¼ na Marines FC, umukino ubere i Rubavu.