Gushimira Intwari mu Rwanda byahozeho na mbere y’ubukoroni

Yanditswe na Ntawitonda Jean Claude

Ku ya 01-02-2020 saa 06:33:31
Imikino Gakondo iri mu bigiye kongererwa imbaraga mu kwimakaza umuco w'ubutwari bw'Abanyarwanda

Urwego rushinzwe Intwari z’Igihugu, Imidari n’Impeta by’Ishimwe (CHENO), rurashishikariza Abanyarwanda gusigasira umuco w’ubutwari no kuwutoza abakiri bato kuko ari umurage u Rwanda rwasigiwe n’abakurambere.

By’umwihariko, CHENO irashishikariza urubyiruko gufata iya mbere mu guharanira ibikorwa by’ubutwari kuko ari byo bizubakira umusingi w’iterambere n’imibereho myiza abazarukomokaho.

Umunyamabanga Nshingwabikorwa wa CHENO Nkusi Déo, yatangarije Imvaho Nshya ko umuco w’ubutwari Abanyarwanda bawuhoranye na mbere y’uko abakoroni binjira muri Afurika.

Yavuze ko nubwo ubutwari bwareberwaga cyane ku bivuganye abanzi benshi ku rugamba, abagaragaraje ubwo butwari bwo kurinda Igihugu bahabwaga impeta z’ishimwe.

Yagize ati: “Intwari zajyaga mu byiciro bijyanye n’impeta zahabwaga; zari mu byiciro bikuru bitatu ari byo kwambikwa Umudende mu ijosi ku wivuganye abanzi barindwi, Impotore yambarwaga ku kuboko n’uwivuganye 14, umuhango wo Gucana Uruti wakorerwaga uwivuganye abanzi 21; washushanyaga ko ahawe ikuzo ryo kuba Umujyanama w’Umwami.”

Akomeza avuga ko mu gihe gisaga imyaka 25 u Rwanda ruvuye mu mateka mabi ya Jenoside yakorewe Abatutsi mu 1994, hagiye hagaragara ibikorwa by’ubutwari byaranze Abanyarwanda bidashingiye ku rugamba byakozwe n’abantu biyemeje kutikunda bagaharanira inyungu z’abandi birinda ikibi.

  1. Dr Habumuremyi yashimye Intwari z’i Nyange zanze kwivangura hashingiwe ku moko
  2. Mutara III Rudahigwa, intwari yaharaniye kuzamura imikino mu gihe ke
  3. Kagame abwira Intwari: Ubwitange bwanyu ntibwapfuye ubusa

Ubutwari bwagaragariye mu kugira ubumuntu, ubupfura, kuba umunyakuri n’intangarugero, ubushishozi, kwitangira Igihugu n’abagituye, gukora buri gihe umurimo unoze, kudatinya gushyigikira ikiza no guhangana n’ikibi kabone n’ubwo byaba bisaba gupfa n’ibindi.

Impeta zihabwa Intwari z’u Rwanda ntizikiri izo ku rugamba gusa 

Nkusi avuga ko u Rwanda rwizihiza Umunsi w’Intwari mu Rwanda nk’uburyo bwo gushimangira umuco wahozeho wo gushima uwakoze ibikorwa by’indashyikirwa, bityo ko impeta zihabwa Abanyarwanda bakoze ibikorwa by’ubutwari kuri ubu ziyongereye zigera kuri zirindwi:

  1. Uruti, Impeta yo kubohora Igihugu (National Liberation Medal) ihabwa Abanyarwanda n’Abanyamahanga bagaragaje ubwitange mu kubohora no kurinda Igihugu. Ikoze muri Zahabu.
  2. Umurinzi, Impeta yo kurwanya Jenoside (Campaign Against Genocide Medal) ihabwa Abanyarwanda n’Abanyamahanga bagize uruhare mu kurwanya Jenoside ndetse no guhagarika Jenoside yakorewe Abatutsi mu wa 1994. Ikoze muri Zahabu.
  3. Igihango, Impeta y’Ubucuti ihabwa abakoze ibikorwa by’ingirakamaro kandi by’intangarugero, biteza imbere ubucuti bw’u Rwanda n’amahanga n’ibikorwa bihesha Igihugu ishema n’isura nziza ku rwego mpuzamahanga.
  4. Agaciro, Impeta y’Icyubahiro ihabwa abayobozi b’Abanyarwanda n’Abanyamahanga baranzwe n’ibikorwa biteza imbere Igihugu mu miyoborere, ubukungu, imibereho myiza n’imibanire mu Rwanda no ku rwego mpuzamahanga.
  5. Indashyikirwa, Impeta y’Umurimo ihabwa abakoze ibikorwa bihebuje bateza imbere ubumenyi, ikoranabuhanga, ubukungu, imibereho myiza n’imibanire y’abaturage n’ibindi.
  6. Indangamirwa, Impeta y’Umuco ihabwa uwakoze ibikorwa bihebuje mu guteza imbere umuco w’u Rwanda.
  7. Indengabaganizi, Impeta y’Ubwitange ihabwa uwakoze igikorwa cy’ubutwari kirimo ubwitange, gutinyuka, gukiza ubuzima bw’undi cyangwa abandi; kikabera urugero abantu benshi. Ni impeta isanzwe ikoreshwa mu rwego rwa gisirikare.

Nyakubahwa Perezida Paul Kagame yunamira Intwari z’u Rwanda

Umunsi w’Intwari wa 2020

Umunsi w’Intwari wizihizwa ku nshuro ya 26 kuri uyu wa 1 Gashyantare 2020, wabanjirijwe n’icyumweru cy’Ubutwari cyatangiye tariki 24 Mutarama kigasozwa ku ya 31 Mutarama 2020.

Muri icyo cyumweru hakozwe ibiganiro n’inkuru mu bitangazamakuru bitandukanye bivuga ku butwari, ibiganiro mu mashuri abanza, ayisumbuye na Kaminuza, amarushanwa y’imikino «Ubutwari Tournament», Igitaramo gisingiza Intwari z’Igihugu, imikino gakondo n’imikino ngororamubiri no gusura ahantu ndangamurage h’ubutwari.

Ku wa 25 Mutarama, abaturage bahawe ibiganiro byo kubibutsa Intwari z’Igihugu  n’ibikorwa byibandwaho kuri uyu Munsi w’Intwari nyirizina unahemberwamo abakoze ibikorwa by’ubutwari mu mwaka ushize.

Nkusi Deo ati: «Mu muganda rusange usoza Mutarama 2020 abaturage baganiriye kuri uyu Munsi w’Intwari n’uburyo bawizihiza.»

Insanganyamatsiko y’uyu mwaka iragira iti : «Ubutwari mu Banyarwanda, Agaciro kacu.»

CHENO yashyize imbaraga muri gahunda zo gutoza urubyiruko umuco w’ubutwari

Umwanditsi:

Ntawitonda Jean Claude

Tanga Igitekerezo

Email yanyu ntigaragazwa ku rubuga. Amazina na Email ni ngombwa.