GP Chantal Biya 2019: Munyaneza  yitwaye neza mu ntera ya kabiri

Yanditswe na BUGINGO FIDELE

Ku ya 18-10-2019 saa 18:43:47
Munyaneza Didier witwaye neza akaba ari we uyoboye urutonde mu bakiri bato

Munyaneza Didier ukinira ikipe y’u Rwanda yitwaye neza mu ntera ya kabiri  y’irushanwa mpuzamahanga  ririmo kubera muri Cameroun “Grand Prix Chantal Biya 2019” yegukana umwanya wa 3 bituma aguma kuri  uyu mwanya ku rutonde rusange.

Iyi ntera yakinwe tariki 18 Ukwakira 2019 yavaga Yaoundé isorezwa Ebolowa   (150.6 km).  Canecky Marek ukinira ikipe ya Dukla Banska Bystrica (Slovakia) ni we wabaye uwa mbere aho yakoresheje amasaha 3, iminota 34 n’amasegonda 45. Yakurikiwe na Munyaneza Didier, Lagab Azzedine, Join Alexandre na Hofman Arjan bose bakaba barakoresheje ibihe bimwe.

Nyuma y’intera 2, Lagab Azzedine ukomoka muri Algeria wegukanye intera ya mbere yakinwe tariki 17 Ukwakira 2019 ni we uyoboye aho muri kirometero 260,2 amaze gukoresha amasaha 6, iminota 03 n’amasegonda 17 ku mwanya wa 2 hari Canecky Marek naho ku mwanya wa 3 hakaza Munyaneza Didier unayoboye urutonde mu bakiri bato. Aba bakinnyi hakaba harimo  ikinyuranyo cy’amasegonda 8  hagati yabo na Lagab Azzedine.

Abandi bakinnyi b’Abanyarwanda, Byukusenge ari ku mwanya wa 14, Nzafashwanayo (18), Ruberwa (20) na Manizabayo Eric (26).

Iri siganwa rirakomeza kuri uyu wa Gatandatu tariki 19 Ukwakira 2019 aho abasiganwa  bagomba kuva ahitwa Zoetete basoreze Meyomessala (116,5 km). Iziganwa rizasozwa tariki 20 Ukwakira 2019.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.