21°C , Partly sunny | Kigali-Rwanda

GMO: Leta ifata ihame ry’uburinganire nk’imwe mu nkingi zikomeye z’iterambere

Yanditswe na Sezibera Anselme

Ku ya 15-01-2020 saa 19:27:13
Rwabuhihi M. Rose, Umugenzuzi Mukuru wa GMO

Leta y’u Rwanda ifata ihame ry’uburinganire bw’abagabo n’abagore nk’imwe mu nkingi zikomeye z’iterambere rirambye kandi ritagira uwo risiga inyuma. Ibyo ni ibigarukwaho kandi bigashimangirwa n’Umugenzuzi Mukuru w’Urwego rw’Igihugu rushinzwe iyubahirizwa ry’uburenganzira n’ubwuzuzanye bw’abagore n’abagabo GMO, Rwabuhihi Rose.

Rwabuhihi Rose yagize ati: “Guteza imbere uburinganire bikubiye mu mahame remezo y’Itegeko Nshinga. Mu kurushaho guharanira ko iri hame ry’uburinganire rirushaho kubahirizwa mu nzego zose cyane mu nzego z’abikorera, GMO ifatanyije n’Urugaga rw’Abikorera mu Rwanda (PSF), Ishami ry’Umuryango w’Abibumbye rishinzwe Iterambere UNDP na UW Women, mu mwaka wa 2017 batangije gahunda yitwa ‘Gender Equality Seal Certification’. Iyi gahunga igamije guherekeza inzego z’abikorera hagamijwe kuzifasha kurushaho kwisuzuma no gushyiraho ingamba zitandukanye zigamije guteza imbere ihame ry’Uburinganire bw’abagore n’abagabo mu nzego zabo”.

Rwabuhihi atangaza ko kuri ubu ibigo bitandukanye birimo amabanki, amahoteri, inganda, byinjiye muri iyi gahunda ndetse n’ibigo bya Leta bikorana hafi n’abikorera.

Akomeza agaragaza ko kuva iyo gahunda yatangira, hari byinshi bimaze kugerwaho. Yagize ati: “Ibigo by’abikorera byarushijeho gusobanukirwa uburyo byarushaho kwimakaza ihame ry’uburinganire mu bikorwa byabo.

Hashyizweho gahunda z’ibikorwa (Action Plans) zigamije gufasha mu guteza imbere ihame ry’uburinganire ndetse no gukemura ibibazo bikigaragara, hashyirwaho amatsinda yihariye yo gufasha mu gukurikira ishyirwa mu bikorwa rya gahunda z’ibikorwa byiyemejwe mu kurushaho kwimakaza ihame ry’uburinganire”.

Yongeyeho ko kuri ubu ibigo bitandukanye (ibigo by’abikorera 10 n’ibigo bya Leta 2) by’abikorera biri muri iyi gahunda ya Gender Equality Seal (GES) byatangiye gushyira mu bikorwa gahunda y’ibikorwa (Action Plan), ndetse hari intambwe ikomeye imaze guterwa irimo kuzamura umubare w’igitsina gore mu nzego zifata ibyemezo no kwinjiza umubare w’abagore mu mirimo kera yafatwaga ko ari iy’abagore gusa, n’ibindi”.

Rwabuhihi akomeza avuga ko habayeho guhuza urubyiruko rw’abakobwa n’inzego z’abikorera binyuze mu ngendoshuri n’ibiganiro hagamijwe kubongerera ubushobozi no kubafasha gutinyuka kwikorera no kwihangira umurimo.

GMO ihamya ko aho byubahirijwe bitanga umusaruro

Rwabuhihi agaragaza ko guteza imbere ihame ry’uburinganire n’ubwuzuzanye bw’abagore n’abagabo mu nzego za Leta ahanini usanga hari intambwe yatewe n’ubwo guteza imbere uburinganire ari urugendo.

Akomeza agira ati: “Mu nzego za Leta, abakozi bahabwa amahirwe angana, kandi abakora akazi kamwe ibyo bagenerwa birangana, ndetse n’amategeko agaragaza uko akazi gakorwa, ibihe bagakorera, n’uburenganzira bagenerwa byose birahari.”

Gusa avuga ko guteza imbere uburinganire ari urugendo, kuko buri gihe hakenerwa ko hahora hashakwa uko yaba abagore cyangwa abagabo amahirwe n’uburenganzira byabo byubahirizwa, bityo bakarushaho gutanga umusaruro mwinshi kurushaho.

Rwabuhihi atangaza ko iyo basubije amaso inyuma basanga hari byinshi bigikenewe gukorwa mu nzego z’abikorera ugereranyije no mu nzego za Leta mu bijyanye n’uko ihame ry’uburinganire rihagaze mu nzego zitandukanye. Aha, asobanura ko ari yo mpamvu iyo gahunda yashyizweho kugira ngo ihame ry’uburinganire rirusheho kwimakazwa mu nzego zose zirimo urwego rw’abikorera, nka rumwe mu rwego ubukungu bw’Igihugu bushingiyeho.

Ati: “Urugero muzi ko urwego rw’abikorera rutanga imirimo ku kigero cya 94% by’imirimo yose iri ku isoko ry’umurimo mu gihugu. Ni ngombwa rero ko abagore n’abagabo bahabwa amahirwe angana muri uru rwego. Muri rusange, ikigaragara ni uko gahunda ya GES ari gahunda nziza kandi ifite uruhare rukomeye mu gukemura ibibazo bikibangamiye iyimakazwa ry’ihame ry’uburinganire mu nzego z’abikorera, bityo iterambere igihugu kigenda kigeraho ntirigire uwo risiga inyuma”.

Mu gihe hibazwaga ibigenda bikorwa kugira ngo ibyo bigo bibashe gushyira mu bikorwa iyubahirizwa ry’ihame ry’uburinganire n’ubwuzuzanye, Rwabuhihi asobanura ko muri gahunda ya GES, hakorwa ibikorwa bitandukanye birimo kongerera ubushobozi ibigo n’abakozi mu bijyanye no kubahiriza ihame ry’uburinganire binyuze mu kubaha amahugurwa.

Habaho kandi gufasha ibyo bigo gukora isesengura ryo kureba uburyo ihame ry’uburinganire rihagaze iwabo ndetse no gushyiraho ingamba zatuma rirushaho kubahirizwa. Agaragaza ko habaho guhuza urubyiruko cyane urw’abana b’abakobwa hagamijwe kubatinyura no kububakira ubushobozi bwo kuba ba rwiyemezamirimo b’ejo hazaza.

Abo bana bagahuzwa n’abikorera, bagasura ibikorwa byabo ndetse bakabaganiriza. Rwabuhihi anongeraho ko habaho gukusanya ibikorwa byagezweho mu bigo bitandukanye by’abikorera mu bijyanye no guteza imbere ihame ry’uburinganire hagamijwe kubisangiza ibindi bigo mu rwego rwo kubyigiraho.

Imvaho Nshya yifuje kumenya niba ubwo buryo bwose bwatangajwe bwaratangiye kubahirizwa ndetse n’inzira byanyuzemo ngo humvikane ibyari byarananiranye, Rwabuhihi yerekana ko uburyo bukoreshwa ari ukuganira ndetse no kwerekana ibyiza byo guteza imbere ihame ry’uburinganire, bityo bikarushaho kwereka buri wese ko guteza imbere ihame ry’uburinganire bw’abagore n’abagabo bifitite inyungu abikorera kandi ari inzira nziza Igihugu cyahisemo ifasha mu kwihutisha iterambere ritagira uwo risiga inyuma.

Urwego rw’Igihugu Rushinzwe Kugenzura Iyubahirizwa ry’Uburinganire n’Ubwuzuzanye bw’Abagore n’Abagabo mu iterambere ry’igihugu rwanahamirije Imvaho Nshya ko ihame ry’uburinganire n’ubwuzuzanye butazigera bibangamira gahunda y’amapiganwa y’ibizamini umuntu akaba yahabwa akazi atatsindiye kubera ko hifuzwa uburinganire (Gender).

Rwabuhihi yagize ati: “Oya, nta mpungenge na zimwe zihari kubera ko ihame ry’uburinganire nta bwo rikuraho ubushobozi bw’umuntu, ahubwo ritanga amahirwe kuri buri wese yo kurushaho kubyaza umusaruro ubushobozi bwe, hatabayeho kuyavutswa biturutse ku kuba ari umugore cyangwa umugabo”.

U Rwanda rwahisemo guteza imbere uburinganire bw’abagore n’abagabo nka bumwe mu buryo bwo gutanga amahirwe angana ku batuye Igihugu bose, nta vangura, cyangwa se nta we uhejwe ku byiza by’Igihugu, ahubwo bose, abagore n’abagabo bakabigeraho kimwe, bityo bagafatana urunana mu kubaka ahazaza.

Umwanditsi:

Sezibera Anselme

Tanga Igitekerezo

Email yanyu ntigaragazwa ku rubuga. Amazina na Email ni ngombwa.