17°C , Thunderstorms | Kigali-Rwanda

Gitari yangize uwo ndi we muri muzika nyarwanda – Clément Guitarist

Yanditswe na Gisubizo Gentil

Ku ya 20-09-2019 saa 05:46:49
Clement afite ubuhanga bukomeye mu gukirigita imirya ya gitari

Umucuranzi umaze kubaka izina mu Rwanda, Iradukunda Clément atunzwe no gukirigita imirya ya gitari, akazi akora nk’umwuga umutunze kuva mu mwaka wa 2012.

Amaze kumenyakana nk’umucuranzi ukomeye wa guitar solo, yavutse mu 1992 mu Karere ka Huye ahitwa i Tumba. Yaje gutura i Kigali mu 2012 ari naho yatangiye gucuranga nk’uwabigize umwuga.

Mu kiganiro n’Imvaho Nshya, Clément ukirigita yavuze ko mu myaka itandatu amaze acuranga gitari yakoranye n’abahanzi bakomeye mu Rwanda barimo Mani Martin, Masamba Intore, Teta Diana, Jules Sentore, Bruce Melody n’abandi.

Mu gihe amaze acuranga gitari byamuhesheje kujya gucuranga mu bihugu bitandukanye birimo Sénegal aho yajyanye na Diana Teta baherekeje umukuru w’igihugu na Kenya aho yafashije Masamba mu bitaramo binyuranye yahakoreye ndetse na Jules Sentore i Bugande.

Clément avuga ko bimuha ikizere ko inzozi ze zo kugira umwihariko acuranga azazigeraho. Ati “Natangiye gucuranga by’umwuga muri 2012, ni Mani Martin wamfashije kuzamuka no kugaragaza impano yanjye ubwo nari nkigera i Kigali, nacurangiye muri Sénegal na Kenya ndetse na Uganda, numva bimpa icyizere ko nzagera ku nzozi zanjye zo kuzaba umucuranzi ukomeye.”

Iradukunda Clément ni mwene Nyirarukundo Grace na Mazuru Philbert akaba umwana w’imfura mu muryango wabo.Avuga ko gucuranga yabyigishijwe na se Mazuru Philbert [na we uzwiho ubuhanga mu kuvuza ingoma ndetse no gukoresha ibindi bikoresho binyura bya muzika], aho yabitangiye afite imyaka ine, agejeje imyaka itanu atangira gucurangira mu rusengero.

Gucuranga bimuha amaramuko ya buri kwezi

Clément wacurangiye abahanzi benshi mu bitaramo bikomeye mu Rwanda, ashimira cyane Mani Martin wemeye kumushyira mu bacuranzi be mu mwaka wa 2013 ari nabwo yatangiye kurambagizwa n’abahanzi bamwifashisha mu bitaramo.

Ati “Impamvu naje i Kigali ni uko nari ntangiye kumenyana n’abahanzi ba hano i Kigali. Icyo gihe nibwo natangiye gukorana na Mani Martin mbifashijwemo n’umugabo witwa David ufite studio i Gikondo, natekereje gukorana na we nyuma yo kumva ko hari abacuranzi ba Kesho Band ba Martin batorotse, nuko David amfasha guhura na Mani Martin.”

Yongeyeho ati “Umuziki waje kumbera ikintu cyiza ntatekerezaga, watumye nambuka njya mu mahanga. Nagiye gucurangira muri Senegal njyanye na Teta, Masamba najyanye na we muri Kenya inshuro nk’ebyiri ndetse na Sentore i Bugande, Umuziki umaze kumbera ikintu gikomeye mu buzima bwanjye, ni wo nubakiyeho.”

Ubu ni umucuranzi wifashishwa muri Kina Music ya Producer Clément, acurangira kandi Mani Martin, Jules Sentore na Bruce Melody mu bitaramo bakora. Iyo abaze neza inyungu yinjiza iyo ukwezi gushize, abonamo agafaranga gafatika.

Ati “Umuziki umfasha kwambara, nkodesha inzu mbamo i Kigali, nikemurira n’ibindi bibazo mpura nabyo bisaba ubushobozi”.

Arifuza kugira umwihariko we mu Rwanda

Mu nzozi ze, Clément avuga ko yifuza kuzaba umucuranzi uzwi muri Afurika byamukundira akazazenguruka Isi akora ibitaramo. Avuga ko byose azabigeraho nakomeza kwiyungura ubumenyi mu muziki kuko iby’ubufundi yabishyize ku ruhande.

Ati “Ndashaka kuba umucuranzi ukomeye muri Afurika nkajya nkora ibitaramo bitandukanye ku Isi hose. Ndifuza kugera ku rwego rwo gukora ibitaramo ku Isi nk’abandi bacuranzi mbona muri Senegal no mu bindi bihugu umuziki wateye imbere.”

Yongeyeho ko ubu yatangiye gukora Production aho azajya akoresha Gitari Solo gusa, ngo ibi yabitekerejeho kuko abandi usanga bavanga mo ingoma n’ibindi, ati : “Naratekereje mbona kugira umwihariko ari byiza kandi bizamfasha gutandukana n’abandi, ikindi kandi abahanzi dukorana bose nabagejejeho icyo gitekerezo byacyakira bwangu”.

Ibyo mfite ni impano, muzehe wanjye yaranyigishije hanyuma nanjye ngenda nishakishiriza amasomo mashya. Mbifashwamo no kumva indirimbo z’ahandi cyane cyane izigezweho nkanamenya uburyo zizurangwa ku buryo abahanzi b’iki gihe banyumvamo ubuhanga.”

Iradukunda Clément, ni umwe mu bacuranzi b’abahanga kuri guitar solo, ubuhanga bwe bwumvikanira mu murya wa gitari uri mu ndirimbo zirimo ‘Ko Nashize’, ‘Abasitari’, ‘Akagezi ka Mushoroza’, ‘Same Room’, ‘Ntabwo nkwiye ya Mani Martin’ ndetse na ‘Akamini’ ya Rambo Rard aheruka gukoraho, ubu akaba yaratangiye imirimo yo kwikorera no gutunganya indirimbo ku giti cye muri label ye yitwa I&C Music iherereye i Gikondo.

Umwanditsi:

Gisubizo Gentil

Tanga Igitekerezo

Email yanyu ntigaragazwa ku rubuga. Amazina na Email ni ngombwa.