22°C , Partly sunny | Kigali-Rwanda

Gatsibo : Plan International yashimwe uruhare rwayo mu burezi

Yanditswe na MUKAGAHIZI ROSE

Ku ya 16-01-2020 saa 13:41:29
Igikorwa cyo gufungura ku mugaragaro amarerero yubatswe na Plan International ku ishuri ribanza rya Simbwa

Ubuyobozi bw’Akarere ka Gatsibo burashimira abafatanyabikorwa mu iterambere by’umwihariko Plan International Rwanda uruhare rwayo mu kwesa imihigo mu burezi.

Ibi, Umuyobozi w’Akarere ka Gatsibo Gasana Richard  yabivuze nyuma yo gutaha ku mugaragaro  ibikorwa bitandukanye birimo amarerero, ibyumba by’amashuri 7 byubatswe ku mashuri abanza ya Kabusunzu, ubwiherero, ibikoni, ibikinisho by’abana n’ibyumba by’inshuke bubakiwe na Plan International Rwanda.

Hari kandi guha impamyabushobozi n’ibikoresho urubyiruko 250 barimo 100 batewe inda z’imburagihe basoje imyuga irimo ubudozi, ubukanishi, gutunganya imisatsi no guteka, abandi 150 bari barataye ishuri.

Byose hamwe byatwaye amafaranga y’u Rwanda miriyoni 150 000 000.

Gasana Richard yavuze ko ari ibyishimo kubera igikorwa cyo kwesa imihigo ndetse n’ubufatanye  bafitanye n’abafatanyabikorwa babo  by’umwihariko Plan International Rwanda aho  yesheje umuhigo wayo wuko hari ibyo basezeranye muri uyu mwaka w’ingengo y’imari ko hari ibyo bagomba kuba basoje harimo amarerero 2 ndetse n’ibyumba by’amashuri by’abana bo mu mashuri abanza.

Yagize ati : “Mu byo rero tubashimira icya mbere nuko besheje umuhigo wabo hakiri kare. Hashize amezi 6 dutangiye umwaka mushya w’imihigo, bo ibyabo barabishoje. Bivuze yuko ibi byumba byatangiye kwigirwamo nkuko mwabibonye.”

Akomeza agira ati : “Icya kabiri turabashimira urunana kugira ngo inzego z’ibanze n’abaturage batere imbere nuko twese dufatanya. Ingengo y’imari y’akarere ntabwo iba ihagije kugira ngo ibikorwa byose bibe byavamo ariyo mpamvu duhamagarira abafatanyabikorwa kugira ngo baze dufatanye.”

Avuga ko batangije  gahunda mu ntara y’Iburasirazuba no mu karere y’umwihariko ijyanye no guhamagarira abantu bose kujyanamo mu mihigo aho basaba umuntu wese guhera ku rugo kugera ku muntu uwo ariwe wese ko bajyanamo mu mihigo kugira ngo ya mihigo ifite ireme ryo guhindura imibereho myiza y’abaturage igerweho biterwa n’ubufatanye bwa bose.

Yagize ati : “Aha rero ni urugero rwiza rwo gushimira Plan International Rwanda ko mu bufatanye bwayo ibyayo ibikoze hakiri kare.”

Kuba mubyumba by’amashuri bimwe hakigaragara ikibazo cy’ubucucike bukabije, Gasana avuga ko akarere gafite gahunda yo kubaka ibindi byumba 268 kugira ngo bahashye ubucucike mu mashuri.

Abaturage batandukanye barimo Nyirakamana Donatille, ufite abana biga ku mashuri abanza ya Simbwa, yaba abana ndetse n’abarezi bo ku mashuri abanza ya Kabusunzu mu murenge wa Rwimbogo bahuriza ku gushima imiyoborere myiza yita ku muturage kuko ubufatanye bwabo n’abafatanyabikorwa  babaruhuye gukora ibirometero bisaga 8 bajya gushaka amashuri.

Kuba barubakiwe amarerero baravuga ko bazagira uruhare bajya inama ababyeyi nabo bakajya bagira icyo batanga ku bana babo.

Ishuri ribanza rya Simbwa rifite amateka

Umuyobozi w’Akarere ka Gatsibo Gasana yavuze ko ishuri ribanza rya Simbwa rifite amateka.

Yagize ati : “Mu mwaka wa 2016 ubwo Nyakubahwa Perezida wa Repubulika yajyaga mu nama y’abayobozi bakuru yaberaga i Gabiro twagize amahirwe yo ku mwakira kuri uyu musozi dufite ibitekerezo byo kugira ngo abana bigira aha ngaha bagabanye urugendo bakoraga bajya kwiga bavaga aha ngaha bajya Kabarore ibirometero 16 kugenda no kugaruka tugira umugisha Perezida wa Repubulika aje kuhakorera umuganda asanga turimo kubaka ibyumba bikeya ahita atwemerera yuko ibisabwa byose bihubakwa kugira ngo haboneke amashuri abanza.”

Yungamo ati : “Turamushimira cyane kuko uyu munsi nkuko mubibona amashuri abanza aruzuye kandi intumbero nuko umwaka utaha dutangira no kuhubaka amashuri yisumbuye, tunamushimira ko yavuze yuko abana baha ngaha bagomba gutangirira aha ngaha kwiga byanashoboka akaba ariho basoreza. Bivuze kaminuza biracyashoboka rero.”

Avuga ko kuri ubu  bamaze gutaha irerero n’amashuri y’inshuke, amashuri abanza yaruzuye hazakurikiraho  gutangira kubaka amashuri yisumbuye, kaminuza ikazaba iza.

Izi ntumbero zishimiwe n’ababyeyi kuko nkuko Bukuru Sylvestre, umusaza utuye aho  abishimangira ngo kuva kera nta shuri ryari ryarahigeze, abana babaga bandagaye mu muhanda ariko ubu bafite umutekano.

Umuyobozi wa Porogaramu muri Plan International Rwanda Dr. Sebareze Jean Lambert, yijeje ubufatanye avuga ko Plan International ari  umuryango mpuzamahanga ufite inshingano zo kubungabunga uburenganzira bw’abana ariko hitabwa cyane cyane ku burenganzira bw’umwana w’umukobwa kugira ngo umukobwa nawe yumve ko ashoboye.

Ni muri urwo rwego ngo baafashije Akarere ka Gatsibo kugira ngo abana b’abakobwa batwaye inda z’imburagihe babashe kugira ubuzima bwiza no kumva ko nabo bashoboye.

Yagize ati : “Iki gikorwa cyari kirimo ibice bibiri hari urubyiruko rurimo abahungu n’abakobwa bize imyuga itandukanye hakaba n’abakobwa 100 b’abangavu batwaye inda z’imburagihe abo nibo uyu munsi twahaye impamyabushobozi ariko tunabaha n’ibikoresho bizabafasha kwinjira ku isoko ry’umurimo bagendeye kubyo bize.”

Gahunda Plan ifite mu myaka 5 muri kerekezo 2020 – 2024 ni uko bazagera ku bana b’abakobwa miriyoni 2 200 000, bakagera ku bahungu miriyoni 1 000 000, bakagera no ku rubyiruko rugera ku bihumbi 400 ariko  byumwihariko ngo  imbaraga nyinshi zizashyirwa mu gukumira ibyo byose hitabwa ku bukangurambaga kugira ngo abana b’abakobwa birinde ikintu cyose cyatuma abyara imburagihe.

Umuyobozi wa Porogaramu muri Plan International Rwanda Dr. Sebareze Jean Lambert

   

Umwanditsi:

MUKAGAHIZI ROSE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.