28°C , Mostly cloudy | Kigali-Rwanda

Gatsibo: Igice kinini k’ingengo y’imari 2020/2021 cyahariwe imibereho myiza

Yanditswe na KAYITARE JEAN PAUL

Ku ya 30-06-2020 saa 17:33:08
Akarere ka Gatsibo kemeje ingengo y'imari isaga miriyari 25z'amafaranga y'u Rwanda

Inama Njyanama y’akarere ka Gatsibo yateranye kuri uyu wa Kabiri tariki 30 Kamena 2020, yemeje ingengo y’imari 2020/2021 ingana na miriyari zisaga 25.

Mu kiganiro Gasana Richard, Umuyobozi w’akarere yagiranye n’Imvaho Nshya, yavuze ko igice kinini k’ingengo y’imari cyashyizwe mu kuzamura imibereho myiza y’abaturage.

Gasana avuga ko ingengo y’imari izakoreshwa mu mwaka wa 2020-2021 ingana na 25,639,117,288 Frw ugereranyije n’iy’umwaka ushize, aho yiyongereye ivuye kuri 22,530,084,946 Frw. Bivuze ko yiyongereyeho 3,109,032,342 zingana na 12%.

Ashimangira ko igice kinini k’ingengo y’imari cyashyizwe mu mibereho myiza y’abaturage. Yagize ati “Mu bijyanye no guteza imbere imibereho myiza y’abaturage bizatwara ingengo y’imari ingana na 54%, akaba aribwo bwa mbere mu mibereho myiza hashyizwe ingengo y’imari nyinshi, bigaragaza ko dushishikajwe no guhindura imibereho y’abanyarwanda”.

Gasana Richard, Umuyobozi w’Akarere ka Gatsibo avuga ko ingengo y’imari nini yashyizwe mu kuzamura imibereho myiza y’abaturage (Foto Imvaho Nshya)

Meya Gasana avuga ko hazubakwa ibikorwa remezo birimo umuhanda wa kaburimbo Kiramuruzi – Muhura, imihanda y’ibitaka nka Nyagihanga, Ngarama, ndetse n’umuhanda wa Kabeza-Munini mu murenge wa Rwimbogo.

Ibikorwa remezo bindi bizubakwa, Gasana avuga ko ari imiyoboro y’amazi igera kuri 5 harimo umuyoboro wa Binago, Ndabarasa, Gihengeri hakazanongerwa umuyoboro wa Biyanga mu murenge wa Remera na Rugarama, iyo miyoboro ngo ikazatwara amafaranga menshi.

Akomeza agira ati “Iyi miyoboro izatuma tuva kuri 78% by’amazi meza dufite, tugere kuri 88% mu karere kose.”

Ubuyobozi bw’akarere buvuga ko buteganya kurangiza ibikorwa remezo bwangiye uyu mwaka birimo urwibutso rwa Jenoside yakorewe Abatutsi rwa Kiziguro n’amashuri ya TVET Gatsibo.

Uruhare rw’abaturage mu ngengo y’imari ya 2020/2021, Meya Gasana avuga ko ruzagaragarira mu bikorwa byo kubakwa ibyumba by’amashuri no kubaka imiyoboro y’amazi ndetse no kubaka ibyumba by’amashuri ariko bakanabirinda kugira ngo bikazarambe.

 

Umwanditsi:

KAYITARE JEAN PAUL

One Comment on “Gatsibo: Igice kinini k’ingengo y’imari 2020/2021 cyahariwe imibereho myiza”

  1. 78% by’amazi dufite muri Gatsibo ni mu nyandiko, kuko amazi ntayo , ikigo Ayateke ntikiyatanga nkaho atagurwa, umukozi wabo Sam ayaha abamuhaye akantu, ruswa gusa. Ibyo bigaragaragara mu mirenge ya Kuziguro na Kiramuruzi aho abaturage basakuje bakaruha ubu bikaba byaramenyerewe. Ahubwo batabarwe.

Leave a Reply to Claude Cancel reply

Email yanyu ntigaragazwa ku rubuga. Amazina na Email ni ngombwa.