22°C , Mostly cloudy | Kigali-Rwanda

Gatsibo: Abanyamuryango ba FPR-Inkotanyi biyujurije inyubako yatwaye asaga miriyoni 140

Yanditswe na KAYITARE JEAN PAUL

Ku ya 11-07-2020 saa 19:23:30
Inyubako abanyamaryango ba FPR-Inkotanyi mu karere ka Gatsibo biyujurije

Abanyamaryango ba FPR-Inkotanyi mu karere ka Gatsibo mu ntara y’Iburasirazuba batashye inyubako biyujurije izajya ikorerwamo n’abakozi b’umuryango mu karere ka Gatsibo.

Ubuyobozi bw’umuryango wa RPF-Inkotanyi buvuga ko iyi nyubako yatwaye miriyoni 141 atanzwe n’abanyamuryango ubwabo.

Chairman w’umuryango wa RPF-Inkotanyi mu karere ka Gatsibo, Gasana Richard, avuga ko imirimo yo gutangira gusiza ikibanza yatangiye tariki 15 Ugushyingo 2019.

Gasana avuga ko inyubako y’umuryango aho yubatse hari ubusitani bwayo bityo ko uwashaka gukoreramo ibirori adahejwe ariko akagira icyo ahasiga.

Akomeza avuga ko inyubako yubatswe n’abanyamuryango ubwabo kandi ko ibikoresho byagendeye kuri iyi nyubako byakuwe mu karere ka Gatsibo.

Chairman w’umuryango wa RPF-Inkotanyi mu karere ka Gatsibo, Gasana Richard

Yagize ati : “Inyubako yatwaye miriyoni 141,874,576 habariwemo miriyoni 50 zavuye mu musanzu usanzwe w’abanyamuryango. Nakongeraho ko yubatswe n’ibikoresho byo mu karere ka Gatsibo nk’amatafari, umucanga n’amabuye byavuye hano iwacu. Inzugi zayo zakorewe muri Gatsibo ndetse n’intara yaradufashije iduha inkunga ya miriyoni 15”.

Chairman w’umuryango wa RPF-Inkotanyi mu ntara y’Iburasirazuba, Mufulukye Fred ashimira ibikorwa by’abanyamuryango bakoze ko ngo bigaragaza kwibohora no kwigira.

Yagize ati : “Iki gikorwa gishimangira inzira yo kwibohora no kwigira. Bigaragaza ko mwatoye inyigisho za Chairman w’umuryango wa RPF-Inkotanyi akaba na Perezida wa Repubulika”. 

Akomeza avuga ko iki gikorwa kibibutsa ko Inkotanyi icyo ziyemeje zigikora kandi ntizigamburuzwe n’amananiza. Ati : “Iki ni ikimenyetso cy’uko ikindi twakwiyemeza twakigeraho”.

Ubwo hafungurwaga ku mugaragaro iyi nyubako

Col (Rtd) Twahirwa Ludoviko Dodo, Umuyobozi wa Komisiyo y’ubukungu mu muryango wa RPF-Inkotanyi mu karere ka Gatsibo avuga ko inyubako y’umuryango yatangiye gutekerezwa mu 2012.

Yagize ati : “Twatangiye gutekereza kwiyubakira iyi ngoro mu myaka 8 ishize. Turashimira Chairman wacu w’akarere umurava agira. Inshuti z’umuryango hanze y’akarere zaradufashije kandi turazishimira”.

Dodo avuga ko ingoro y’umuryango mu karere ka Gatsibo ifite icyumba kinini cyakira abantu 70 bicaye neza. Avuga ko hari miriyoni 95,436,530 zakoreshejwe mu kubaka inzu ubwayo nyuma birahinduka kuko hiyongereyeho na parikingi.

Avuga kandi ko umusanzu wa miriyoni 71,880,023 watanzwe n’abanyamuryango, bakishimira ko ubu nta mwenda bafite kuri iyi nyubako biyujurije.

Abanyamuryango ba FPR-Inkotanyi mu karere ka Gatsibo babaye aba kabiri biyujurije ingoro yabo nyuma y’aba Nyagatare mu ntara y’Iburasirazuba, abo mu tundi turere bakaba bagikodesha.

 

Umwanditsi:

KAYITARE JEAN PAUL

9 Comments on “Gatsibo: Abanyamuryango ba FPR-Inkotanyi biyujurije inyubako yatwaye asaga miriyoni 140”

  1. Dushimiye INKOTANYI za Gatsibo ku gikorwa kitubereye !
    Turashima cyane inama n’impanuro za Nyakubahwa Chairman w’Umuryango FPR-INKOTANYI Paul KAGAME.
    Urubyiruko rwa Gatsibo ntiduteze gusubira inyuma mu rugamba rwo kubaka u Rwanda.

  2. FPR Oyeeeee,
    Turashimira Chairman #FPR Inkotanyi Paul Kagame wadutoje umuco wo kwigira no kwishakamo ibisubizo,tukaba tubonye ibiro by’umuryango mu Karere dutuyemo kdi turakomeje murugamba rw’iterambere mu murongo twahawe na FPR Inkotanyi,turashimira n’ubuyobozi bw’umuryango mu Karere@ Chairman Gasana Richard, Imbaraga n’ubwitange bagaragaza.

  3. Mwarakoze cyane nkotanyi uku Niko KWIBOHORA. Gatsibo Oye! FPR OYE! Ariko Kandi nkabanyamuryango twabigizemo uruhare dukeneye kuzayitaramiramo.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.