Gasore Serge yishimiye igihembo yahawe na Kaminuza yo muri Amerika

Yanditswe na NKOMEJE GUILLAUME

Ku ya 21-02-2018 saa 07:02:18

Ku cyumweru tariki 18 Gashyantare 2018, Gasore Serge yahawe igihembo cya “The 2018 Young Alumnus of the Year”, gitangwa na Kaminuza yo muri Amerika yizemo ya “Abilene Christian University”, gihabwa umuntu wakoze ibikorwa by’indashyikirwa byahinduye ubuzima bw’abandi atarageza imyaka 40 y’amavuko.

Ubwo Gasore Serge yashyikirizwaga igihembo

Gasore yahawe iki gihembo abikesha ibikorwa by’indashyikirwa yakoze bitandukanye birimo gushinga umuryango “Gasore Serge Foundation” ukorera mu Murenge wa Ntarama mu Karere ka Bugesera aho wahinduye imibereho y’abahatuye.

Nyuma yo gushyikirizwa iki gihembo, Gasore Serge yatangaje ko yishimye cyane ku bw’igihembo yahawe, ndetse ko ashimira Imana yo yabimushoboje kuko byari bigoye gutekereza ko byabaho bitewe n’ubuzima yanyuzemo kuva akiri muto.

Yagize ati:Ndishimye kuba ndi hano, narize, ndizera ko ntongera kurira, ni ibintu bikomeye kuba natanga ishusho y’iki gihembo nahawe, ndetse ndashimira Imana yari izi byose, kuko ntawari uzi ko umwana muto w’umuhungu wafatwaga nk’umuvumo nyuma yo kuvuka, ndetse na buri birori byabaga mu rugo bajyaga kumuhisha”.

Gasore wabonye buruse yo kwiga muri Kaminuza abikesha gukina imikino ngororamubiri yo gusiganwa ku maguru “Athletisme”, mbere y’uko ahabwa iki gihembo yari yatangarije Imvaho Nshya ko yabanje gutungurwa no kuba yaratoranyijwe mu bahabwa iki gihembo ariko bimuha imbaraga zo kurushaho gukora cyane.

Iki gihembo gitangwa buri mwaka  kuva mu 1990, kimaze guhabwa abarimo Chelsea Buchholtz wagihawe mu mwaka ushize wa 2017, Gilbert Tuhabonye (2016), Dr. Kent na Amber Brantly (2015), Dr. Randy na Anda Brown (2014) ndetse na Dr. A. Marcus Nelson (2013).

Ikigo Gasore Serge Foundation, gikorera mu Murenge wa Ntarama mu Karere ka Bugesera, gikorerwamo ibikorwa byinshi birimo ibya siporo n’imyidagaduro, ubujyanama ku ihungabana, ubuvuzi, ubworozi n’ibindi, byose bikaba bigamije kurengera abafite ibibazo bitandukanye.

 

 

 

 

 

 

 

Umwanditsi:

NKOMEJE GUILLAUME

Tanga Igitekerezo

Email yanyu ntigaragazwa ku rubuga. Amazina na Email ni ngombwa.