25°C , Partly sunny | Kigali-Rwanda

Gakenke: Barakangurirwa guhinga batarindiriye ko imvura igwa

Yanditswe na NYIRANEZA JUDITH

Ku ya 23-09-2020 saa 17:13:10
Guhinga ahashobora kuhirwa bituma abahinzi bakomeza guhinga ntibategereze ko imvura igwa (Foto Gakenke)

Abahinzi bakangurirwa guhinga batarindiriye ko imvura igwa, ahubwo bagahinga kuko ihinga rigeze nk’uko byatangajwe n’Ubuyobozi bw’Akarere ka Gakenke.

Umuyobozi w’ako karere wungirije ushinzwe Iterambere ry’Ubukungu Niyonsenga Aimé François, yabivuze ubwo yifatanyaga n’abahinzi bahinga mu kibaya cya Gaseke mu Murenge wa Busengo mu gikorwa cyo gukumira no kurwanya icyonnyi cya nkongwa mu bigori yashimiye igikorwa k’indashyikirwa bakoze bagashobora guhangana n’ibihe bakaba barahinze ibigori bigeze ku kigero kiza.

Yavuze ko abahinzi batagomba guhinga ari uko imvura yaguye ahubwo ko bagomba guhinga ari uko ihinga ryageze.

Ati: “Abafite amahirwe yo kugira imirima ahegereye amazi bagomba kuyabyaza umusaruro bahinga batagendeye ku kirere ahubwo bahinga mbere imvura ikazagwa ibunganira ari na ko bakomeza kuhira”.

Umuhinzi w’ibigori mu kibanya cya Gaseke mu Murenge wa Busengo, Habumuremyi Faustin avuga ko kuba ibigori byabo bigeze ku rwego rwiza ari uko bahingiye ku gihe.

Yakomeje avuga ko ibigori bimaze kumera begereye Tubura ikabaha ifumbire mvaruganda, ariho bahera bashima ko bayibonye ku gihe kugira ngo ubuhinzi bwabo bukomeze butere imbere.

Ati: “Ibigori bimaze kumera twegereye Tubura iduha ifumbire mvaruganda harimo na “Urée”, ifumbire tuyibona ku gihe ni yo mpamvu ubuhinzi bwacu buhagaze neza”.

Nyirakabano Monica, utuye mu Murenge wa Busengo avuga ko ibanga bakoresheje guhera tariki ya 01 Nyakanga 2020 kugira ngo ibigori byabo bibe bigeze ku rwego rwiza ari uko batangiye gutera ibigori bashyiramo imborera, bavomera gatatu mu cyumweru bakuhira kubera ko begereye umugezi.

Abahinzi bagiriwe inama yo kugenzura kandi bakarwanya nkongwa mu mirima y’ibigori bahinze (Foto Gakenke)

Yakomeje avuga ko icyonnyi cya nkongwa kimaze kugaragara batangiye gutera imiti ndetse na tubura ibaha ifumbire ubu ibigori bikaba bimeze neza ari nako bakomeza gukumira no kurwanya icyonnyi cya nkongwa mu bigori.

Ati: “Nkongwa ntacyo idutwaye kandi ntacyo yadushoboza tuzayihashya kuko ibigori bigeze kuri uru rwego ntacyo nkongwa ibitwara”.

Umukozi wa RAB ushinzwe Akarere ka Gakenke mu buhinzi, Muhire Roger yagiriye inama abahinzi bahinga mu kibaya cya Gaseke ko nyuma yo gutera imiti bagomba kuzajya basubirayo kugira ngo barebe uko ibigori byifashe niba bitarongeye gufatwa na nkongwa basanga byarongeye kurwara, hakabaho igikorwa cyo kubitoragura ndetse bakongera bagatera imiti.

Yanabibukije ko uburyo bwiza bwo gukora ubuhinzi batera basiga intera hagati y’ibigori igihe cyo gutera, gukoresha amafumbire n’imbuto y’indobanure kugira ngo bizabafashe kuzamura umusaruro.

Umwanditsi:

NYIRANEZA JUDITH

Tanga Igitekerezo

Email yanyu ntigaragazwa ku rubuga. Amazina na Email ni ngombwa.