17°C , Thunderstorms | Kigali-Rwanda

Fireman uvuye Iwawa yarahiye ko atazongera gukoresha ibiyobyabwenge

Yanditswe na Ndamyirokoye François

Ku ya 21-09-2019 saa 18:38:28
Umuraperi Fireman ni umwe mu basoje amasomo Iwawa mu cyumweru gishize, ahamya ko atazongera gukoresha ibiyobyabwenge

Fireman ukunda kwiyita Kibiriti, umuraperi wahoze mu itsinda rya Tuff Gangs, nyuma y’umwaka arimo kugororerwa Iwawa yasoje amasomo kimwe n’urundi rubyiruko rugera ku 1.678.

Muri Kamena 2018 ni bwo Fireman yafashwe n’inzego z’umutekano ashinjwa gukoresha ibiyobyabwenge nyuma ajyanwa Iwawa mu rwego rwo kumufasha kumugorora.

Iyo bakigera amezi atandatu ya mbere baba barimo bitabwaho n’abaganga babavura ibi biyobyabwenge biba byarabasaritse. Muri iki kigo ngororamuco cya Iwawa bahigira imyuga itandukanye irimo ububaji, ubwubatsi, gukora ibijyanye n’amashanyarazi n’ibindi.

Ku rundi ruhande uyu muraperi we yahisemo kwiga ubuhinzi n’ubworozi, umwuga ahamya ko uzamufasha mu buzima bwe mu bihe bizaza. Ubwo basezererwaga Fireman yanatangaje ingamba nshya avanye muri iki kigo.

Umuraperi Fireman yavuze ko mu gihe amaze Iwawa asanga arangije kaminuza y’ubuzima. Yongeyeho ko yazinutswe bikomeye gukoresha ibiyobyabwenge ku buryo usibye no kuba atazongera kubinywa ndetse ngo ntanashaka guhura n’abantu babimunywera hafi cyangwa baganira ko bagiye kubinywa.

Fireman ahamya ko mu gihe yamaze akoresha ibiyobyabwenge yahombye ibintu byinshi ariko igikomeye ari ikizere yaterewe. Ahamya ko azakora ibishoboka byose mu buryo bwiza sosiyete ikongera kumugirira ikizere nka mbere atari yatangira kwijandika mu biyobyabwenge.

Mu magambo ye yagize ati “Ikizere nicyo nkumbuye kurusha ibintu byose ku Isi, kugisenya ni ibintu umuntu akora mu munota umwe nyamara kucyubaka ni ibintu bikomeye cyane”.

Fireman ari mu barangije amasomo y’igororamuco n’imyuga Iwawa kuwa 20 Nzeri 2019

Fireman wemeza ko Tuff Gangs yasenywe no gukoresha ibiyobyabwenge yatangaje ko n’ubwo azagerageza kuba hafi bagenzi be akabigisha kubireka ariko atazajya yirirwana nabo aho babinywera kubera ko ashobora kuhagwira mu bishuko akaba yabinywa

Mu kwicuza igihe yamaze anywa ibiyobyabwenge yagize ati “Njye nabaye inshuti n’ibiyobyabwenge igihe kinini ariko ubu ngiye kuba inshuti n’amafaranga. Ubu ndi mu rukundo nayo kandi ndabizi ko nayo azankunda”.

Akurikije ubwinshi bw’ibiyobyabwenge yanyweye yagize ati, “Kuba ntarapfuye naho nari amabuye. Gusa ibyabaye byose byari bifite impamvu. Njya nibaza ukuntu abantu bambonaga”.

Fireman yashimiye abahanzi bamubaye hafi ubwo yagororwaga. Bamwe muri abo bahanzi ni Jay C, Bull Dogg, Bruce Melodie, Safi Madiba n’abandi bamusuye cyangwa bamugaragarije urukundo mu gihe amaze Iwawa.

Ntiyibagiwe guha inama urugubyiruko rugikoresha ibiyobyabwenge. Yagize ati “Njye ndi umutangabuhamya ibi bintu nabibayemo, niba njye narahindutse rero kubera iki wowe utahinduka? Ubwo se utegereje iki? Utegereje gupfa nta kindi. Ariko hari amahirwe impamvu utari wapfa ni uko uzahinduka. Tera intambwe imwe igihugu kizaguterera 50 Imana iguterere 49 ubundi umere neza”.

Umurpari Fireman azwi ku ndirimbo zirimo iyitwa “Umuhungu wa muzika” yakoranye na Bruce Melodie, “Ca inkoni izamba” yakoranye na Queen Cha kandi afite n’izindi ndirimbo zitandukanye.

Itsinda rya Tuff Gangs yahozemo yari arihuriyemo na Jay Polly, Bull Dog ndetse na P Fla gusa n’ubwo bose batajya berura ko itsinda ryasenyutse burundu byamaze kugaragara ko ubu buri wese asigaye akora muzika ku giti cye.

Umwanditsi:

Ndamyirokoye François

Tanga Igitekerezo

Email yanyu ntigaragazwa ku rubuga. Amazina na Email ni ngombwa.