20°C , Partly cloudy | Kigali-Rwanda

FERWAFA   igiye gukemura burundu ibibazo by’abasifuzi

Yanditswe na BUGINGO FIDELE

Ku ya 11-05-2018 saa 06:37:35
Ubuyobozi bwa FERWAFA bwiyemeje ko nta birarane by'imishahara y'abasifuzi bizongera kubaho

Mu minsi yashize hagiye hagaragara ikibazo y’imishahara  y’abasifuzi mu Rwanda aho bamaraga hafi  amezi 6 badahembwe kandi basifura imikino ya shampiyona.

Ubuyobozi bwa FERWAFA bwiyemeje ko nta birarane by’imishahara y’abasifuzi bizongera kubaho

Aha ni ho bamwe banahera bashinja bamwe kurya ruswa y’amakipe n’ubwo ntawurafatwa ngo abihanirwe ku mugaragararo.

Perezida w’ishyirahamwe ry’umupira w’amaguru mu Rwanda “FERWAFA”, Rtd Brig Gen Sekamana   nyuma y’amezi 4 atorewe kuyobora atangaza ko abasifuzi  ari bo ba mbere bakwiye kujya bakemurirwa ibibazo mbere y’abandi bose kuko ari aba mbere mu batuma imikino igenda neza.

Yagize ati “Ibirarane si byiza  gusa ntibyagakwiye  kuba intandaro yo gukora amakosa kuko niba atishyuwe  nta bwo ari ngombwa ko arya ruswa kuko aba akemuye ikibazo mu buryo bubi”.

Yakomeje agira atiUmukino ugendera ku basifuzi ni bo ba mbere bakwiye gukemurirwa ibibazo kuruta abandi. Ibi turaza kureba uko bimeze mu mafaranga ahari ikibazo cy’abasifuzi gikemuke bage bakora akazi kabo  nta kibazo bafite mu mutwe ibindi bizasigare ari ingeso  y’umuntu  nta rwitwazo”.

Mu ntangiriro za Gicurasi 2018 ni bwo FERWAFA yishyuye ibirarane by’abasifuzi  bakoreye  kuva shampiyona y’ikiciro cya mbere 2017-2018  yatangira muri Nzeri 2017 bivuze ko imikino ibanza ya shampiyona yarangiye badahembwe.

Rtd Brig Gen Sekamana avuga ko ubu bagiye kujya bategura ibijyanye n’amafaranga n’ibindi byose bikenewe kuri buri mukino abasifuzi bakagenda babihawe. Ati “Hari abava aha bakajya i  Rusizi, bazagenda bate ? ese ayo bagenerwa birahura?  ni ukubireba byose, hari uwasifura yanaburaye agasifura nabi bimwe atanabibonye,  hari byinshi  tugomba gutunganya, umusifuzi agomba kuba ameze neza nk’uko umukinnyi aba ameze neza”.

 Ubusanzwe umusifuzi mpuzamahanga agenerwa ishimwe ry’ibihumbi 25 naho ab’imbere mu gihugu bagahabwa ibihumbi 18 hatarimo ay’urugendo. Uretse kuba aya mafaranga ari make ugereranyije n’ahandi, abasifuzi bo mu Rwanda bahura n’ibibazo by’ibikoresho birimo imyambaro n’ibindi aho CAF igenera imyambaro abasifuzi mpuzamahanga bagaha ab’imbere mu gihugu cyangwa bakajya batizanya.

Nk’uko mu Rwanda hari sosiyete yambika amakipe ndetse n’ikipe y’igihugu biroroshye ko FERWAFA yabasaba ko babakorera imyambaro y’abasifuzi bityo ikibazo k’imyambaro kigakemuka. Rtd Brig Gen Sekamana aha avuga ko iby’ibikoresho n’ibindi byose nkenerwa babifite muri gahunda kandi bizeye ko bizakemuka vuba.

Kuri ubu hari abasifuzi 47 basifura imikino y’ikiciro cya mbere mu mupira w’amaguru mu Rwanda muri aba 12 ni bo bari ku rwego mpuzamahanga barimo 7 basifura hagati na 5 basifura ku ruhande.

 

 

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.