27°C , Partly sunny | Kigali-Rwanda

Félicien Kabuga yise ‘ibinyoma’ ibyaha aregwa byose

Yanditswe na NTAWITONDA JEAN CLAUDE

Ku ya 27-05-2020 saa 13:53:30

Kuri uyu wa Gatatu tariki ya 27 Gicurasi 2020, Felicien Kabuga yitabye Urukiko rw’ i Paris mu Bufaransa, ahakana ibirego byose bya Jenoside yakorewe Abatutsi ashinjwa, avuga ko ari ibinyoma.

Ikinyamakuru Reuters cyatangaje ko  ubwo yabazwaga niba yarumvise ibirego Urwego Mpuzamahanga Rwashiriweho Gukora Imirimo y’Insigarira y’Inkiko Mpanabyaha (IRMCT) rumukurikiranyeho, yasubije akoresheje umusemuzi ati: “Ibyo byose ni ibinyoma. Nta Mututsi n’umwe nishe. Nakoranaga nabo”.

Félicien Kabuga umwe mu bantu bashakishwaga cyane ku Isi akurikiranyweho uruhare rukomeye yagize muri Jenoside yakorewe Abatutsi mu Rwanda muri 1994.

Yatawe muri yombi  n’inzego z’u Bufaransa tariki ya 16 Gicurasi 2020, biturutse ku iperereza izo nzego zakoze zifatanyije n’ibiro by’Umushinjacyaha Mukuru wa IRMCT, i Paris mu Bufaransa.

Kabuga yafashwe kubera ibyaha birindwi bya Jenoside yashinjwaga n’Urukiko Mpuzamahanga Mpanabyaha Rwashyiriweho u Rwanda (ICTR) kuva mu mwaka wa 1997,  birimo ubufatanyacyaha muri Jenoside, gushishikariza mu buryo butaziguye no gukangurira rubanda gukora jenoside, gushaka gukora jenoside, umugambi wo gukora jenoside, gutoteza no gutsemba, byose bifitanye isano n’ibyaha byakozwe mu gihe cya jenoside yakorewe Abatutsi mu Rwanda.

Komisiyo y’Igihugu yo Kurwanya Jenoside (CNLG), ivuga ko nubwo Kabuga Félicien atafashe imbunda ngo arase Umututsi cyangwa umuhoro ngo amuteme, yatanze amafaranga menshi yakoreshejwe mu gucura umugambi wa Jenoside no kuyikora.

Dr Bizimana Jean Damascène, Umunyamabanga Nshingwabikorwa wa CNLG, yagize ati: “Interahamwe ntabwo zashoboraga gukora iyo Kabuga atabaho. Kabuga yatanze amafaranga yo kubagurira intwaro, yo kubaha imodoka zibatwara n’agahimbazamusyi bagiye kwica. Munibuke ko ku itariki 11 z’ukwezi kwa Mutarama 1994, Gen. Romeo Dallaiare wari uhagarariye ingabo za Loni mu Rwanda (MINUAR) yabonye amakuru avuga ko mu bubiko bwa Kabuga i Gikondo huzuye intwaro zahabwaga Interahamwe.”

Ayo makuru Dallaire yayahawe n’umwe mu bari abayobozi b’Interahamwe witwaga Jean Pierre Turatsinze wanahamije ko izo ntwaro zabongereye ubushobozi bwo kwica Abatutsi 1000 buri minota 20.

Ibindi Kabuga yakoze bikongera ubukana bwa Jenoside ni ugutera inkunga y’umurengera ibitangazamakuru rutwitsi birimo Radio RTLM, Ikinyamakuru Kangura, Intera, Kamarampaka, La Médaille de Nyiramacibiri, l’Ecole de Mille Collines, L’Indontable Ikinani n’ibindi.

“Ifatwa rya Félicien Kabuga ryerekana ko nta wakoze Jenoside utazabiryozwa”

Kabuga ntakozwa ibyo hoherezwa kuburanira i Arusha no mu Rwanda

Abunganizi ba Kabuga bahanganye n’ingingo itegeka ubutabera bw’u Bufaransa gushyikiriza IRMCT abafashwe bisabwe n’ubutabera mpuzamahanga.

Basabye ko ibizamini bya DNA byafashwe ngo hamenyekane neza ko ari we biteshwa agaciro kuko byafashwe umukiriya wabo atabishaka.

Me Laurent Bayon uri ku ruhande rumwunganira, yabwiye urukiko ko Kabuga ashaje kandi arwaye, ko bashaka “kumwohereza i Arusha batitaye ku buzima bwe n’amagara ye”.

Me Bayon yavuze ko umukiriya we atinya ko mu rukiko rwa Loni yaburanishwa urubanza rwa poritiki, ko ubucamanza bw’u Bufaransa bufite ubushobozi bwo kumuburanisha.

Uruhande rumwunganira rwasabye ko atohererezwa uru rukiko rwamushakishaga, ko ahubwo yarekurwa akanakorerwa ibizamini by’amagara n’ubuzima bwo mu mutwe. Rwanavuze ko Kabuga aho afungiye nta muntu bahuza mu rurimi kandi akeneye kwitabwaho byihariye.

Basabye ko yarekurwa agakurikiranwa adafunzwekuko ngo hari ikoranabuhanga (electronic ankle tag) rishobora kwifashishwa agakurikiranwa atari mu buroko .

Urukiko rwatangaje ko kuwa Gatatu utaha tariki 03/06/2020 ruzatangaza umwanzuro w’iburanisha ry’uyu munsi.

Umwanditsi:

NTAWITONDA JEAN CLAUDE

One Comment on “Félicien Kabuga yise ‘ibinyoma’ ibyaha aregwa byose”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.