Dusabemungu yagaragaje byinshi ku rugendo rwe muri Cricket

Yanditswe na  BUGINGO FIDELE

Ku ya 30-07-2020 saa 14:47:15
Dusabemungu Hirwa Eric wasezeye mu ikipe y'igihugu

Uwahoze ari  kapiteni w’Ikipe y’igihugu y’u Rwanda y’umukino wa Cricket, Dusabemungu Hirwa Eric  nyuma yo guhagarika gukina uyu mukino ku rwego mpuzamahanga  nyuma y’imyaka 14 yagaragaje byinshi ku rugendo rwe mu mukino wa Cricket.

Ku rubuga rwa “Twitter”  rw’Ishyirahamwe ry’umukino wa Cricket mu Rwanda “RCA”, ku itariki 26 Nyakanga 2020 ni bwo hagaragaye ubutumwa buvuga  ko Dusabemungu Hirwa Eric wari kapiteni w’ikipe y’igihugu  kuva muri 2018  yahagaritse gukina uyu mukino.

Mu kiganiro kihariye yagiranye n’Imvaho Nshya, Dusabemungu Hirwa Eric  ufite imyaka 33 y’amavuko  yatangaje ko igihe cyari kigeze ngo ahagarike gukina akomeze ibindi bikorwa byo guteza imbere Cricket dore ko yakinaga kandi ari n’umutoza.

Agaruka ku rugendo rwe muri uyu mukino wa Cricket, Dusabemungu yavuze ko yatangiye  kuwukina muri 2006 ubwo yigaga muri ES Kicukiro ahari IPRC Kigali ubu akaba ari na ho hakinirwaga uyu mukino.

Agaragaza ko we na mugenzi we Kayitera Andre ari bo bana binjiye muri uyu mukino baravukiye mu Rwanda kuko ubusanzwe Cricket yakinwaga n’abanyamahanga ndetse n’Abanyarwanda bavukiye hanze.

Dusabemungu Hirwa Eric (ubanza ibumoso mu bahagaze) wari kapiteni w’ikipe y’igihugu

Dusabemungu akomeza avuga ko muri 2006 basokeye u Rwanda nyuma abandi bana biganaga na bo bagahita bagira ishyaka  ryo kwinjira muri uyu mukino  aho muri 2008 hiyongereyemo abandi 4 barimo na Dusingizimana Eric wabaye kapiteni w’ikipe y’igihugu.

Aha Dusabemungu akaba ashimira cyane, Manzi Benjamin ukora muri BRD icyo gihe wari Team Manager kuko ari we wabafashije kugira ngo babashe gusohokera igihugu.

Ibyo yishimira mu mukino wa Cricket

Dusabemungu yishimira ko umukino wa Cricket urimo gutera intambwe nziza igana ku iterambere ku rwego mpuzamahanga kuko ahantu henshi bamenye u Rwanda kubera wo.

Akomeza avuga ko mu myaka 20 uyu mukino utangiye gukinwa mu Rwanda hari ibihembo  bitandukanye ishyirahamwe mpuzamahanga  ry’uyu mukino ryahaye u Rwanda  kubera kuwuteza imbere.

Agaruka ku iterambere rya Cricket, Dusabemungu yashimangiye ko uko umukino ukwira ahantu henshi abawukina bakiyongera ari ko n’abaterankunga baboneka bityo ibikorwa bigakomeza kwiyongera.

Gusa avuga ko byose bituruka ku buyobozi bwiza kuko niba u Rwanda rugenerwa inkunga ingana n’iya Kenya n’ishyirahamwe mpuzamahanga kandi Kenya yarakinnye igikombe k’Isi ni ikerekana ko u Rwanda rwazamutse.

Dusabemungu yatangiye gutoza agikina

 Ubusanzwe akina mu ikipe ya  Zonic CC mu bagabo akanayitoza. Uretse iyi kipe, Dusabemungu Hirwa Eric  atoza n’ikipe ya Indatwa Hampshire CC mu kiciro cy’abakobwa. Atoza kandi ikipe ya Ndera CC mu bakobwa n’abahungu ndetse n’ikipe y’igihugu y’abakobwa batarengeje imyaka 19.

Ibihembo Dusabemungu yegukanye

Dusabemungu ari kumwe n’ikipe y’igihugu begukanye igikombe mu irushanwa ry’Afurika ryabereye muri Ghana “ ICC Africa Division 3 T20 tournament 2011”.

Muri 2014 mu irushanwa ry’Afurika ryabereye muri Afurika y’Epfo, Dusabemungu yegukanye igihembo cy’uwateye neza udupira “Best Bowler”. Kuva muri 2006 kugeza 2016 yihariye igihembo  cy’urusha abandi gutera udupira neza “Best Bowler” muri shampiyona.

Dusabemungu Hirwa Eric yavukiye i Kinihira mu Karere ka Rulindo mu Ntara y’Amajyaruguru gusa yakuriye mu Karere ka Kicukiro ari naho yize amashuri abanza n’ayisumbuye. Yize muri ES Kicukiro yabaga muri ETO Kicukiro ubu iri shuri ryabaye EFOTEC ryimukira i Kanombe. Dusabemungu yasoreje amashuri yisumbuye muri APADE nyuma akomereza amasomo ya Kaminuza muri IPRC-Kigali.

Umwanditsi:

 BUGINGO FIDELE

One Comment on “Dusabemungu yagaragaje byinshi ku rugendo rwe muri Cricket”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.