27°C , Partly sunny | Kigali-Rwanda

Dufite ubushobozi bwo guhunika toni ibihumbi 290- Dr Mukeshimana

Yanditswe na MUTUNGIREHE SAMUEL

Ku ya 29-01-2018 saa 07:36:13
Amakoperative ashishikarizwa kugirsa umuco wo guhunika mu buryo bw’igihe kirekire

Minisitiri w’Ubuhinzi n’Ubworozi, Dr Mukeshimana Geraldine atangaza ko hari ubuhunikiro bw’imyaka y’ibinyampeke bwa toni ibihumbi 290, ikibazo gisigaye kikaba icy’amakoperative ataragira umuco wo guhunika mu buryo bw’igihe kirekire.

Amakoperative ashishikarizwa kugirsa umuco wo guhunika mu buryo bw’igihe kirekire

Dr. Mukeshimana avuga ko abantu ku giti cyabo bamaze kumva neza akamaro ko guhunika ariko ku rwego rwa Koperative bisa n’aho bacisha imyaka mu buhinikiro by’igihe gito nyamara nabo bagombye kugira ubuhunikiro.

Mu kiganiro n’itangazamakuru, Minisitiri w’Ubuhinzi n’Ubworozi, Dr Mukeshimana Geraldine yakomeje avuga ko abantu bagomba kumva ko guhunika imyaka ari bumwe mu buryo bwo guteganya ibizabatunga ariko bikaba n’uburyo bwo guhangana n’ibiciro ku isoko bikunze kugwa mu gihe cy’umwero w’imyaka cyangwa igihe abamamyi b’imyaka baba bagusha ibiciro imyaka itarera.

Ati “Ntabwo dushaka ko umuntu asarura imyaka mu cyumweru kimwe ngo ibe yashize mu nzu, kuko uko umuntu agurisha uko igihembwe kigenda kigirayo anagurisha menshi. Kereka abantu bafite amasezerano meza basinyanye n’inganda baba bafite igiciro kiza.

Ubu ng’ubu hariya mu makoperative dufite ubushobozi bwo guhunika hafi toni ibihumbi 290, ariko nanone iyo urebye ubona ko ku rwego rw’igihugu abantu barahunika, mu ngo abantu barahunika, ariko wagera mu makoperative ugasanga ibigega byabaye aho imyaka inyura igenda. Bivuze nanone ko ku rwego rw’amakoperative abantu bakwiye guhunika kugira ngo abanyamuryango babashe kugira ubuhunikiro bw’ibizabatunga.”

Yakomeje asobanura ko guhunika bizatuma ibiciro bidakomeza kumanuka cyane cyangwa ngo bizamuke cyane kuko igihe cyose imyaka izaba ihari.

Ati “Impamvu ku guhunika ku rwego rw’amakoperative ari byiza ni uko iyo hagize nk’imungu cyangwa ikindi cyonnyi kizamo ushobora guhita utelefona kuri MINAGRI, ukababwira uti muze muduterere umuti. icyo ni serivisi y’ubuntu dutanga, niyo mpamvu tuba tubakangurira guhunika ku urwo rwego ariko nanone no kugira ngo nibura bategereze n’ibyo biciro bizagende biba byiza.

Ntiwabuza umuntu kugurisha umusaruro we akennye, akeneye ikayi y’umwana ariko ntugurishe ibyo byose ngo umare aho ngaho kuko iyo udafite nka ya masezerano meza agufitiye igiciro kiza ni byiza ko utegereza uko guhangana kw’imyaka yeze kukava mu nzira”.

Minisitiri w’Ubutegetsi bw’Igihugu, Kaboneka Francis nawe yijeje Abanyarwanda ko Leta ifite umusaruro uhagije mu buhunikiro, ushobora kugoboka abahura n’ikibazo icyo ari cyo cyose cyatuma ibiribwa bibabana bike.

 

Umwanditsi:

MUTUNGIREHE SAMUEL

Tanga Igitekerezo

Email yanyu ntigaragazwa ku rubuga. Amazina na Email ni ngombwa.