Kigali-Rwanda

Partly sunny
27°C
 

Dr Muvunyi: Bamwe barangiza kaminuza batazi kwandika ibaruwa isaba akazi

Yanditswe na Mugisha Benigne

Ku ya 14-11-2018 saa 15:56:32
Dr Muvunyi Emmanuel uyobora HEC, mu bihe byashize

Muri make, HEC ivuga ko hari abanyeshuri barangiza kaminuza batazi kwandika ibaruwa isaba akazi, hakaba n’abarangiza kaminuza badashobora kuvugira mu ruhame mu Cyongereza, igasaba amakaminuza n’amashuri makuru kongera ingufu mu kwigisha Icyongereza, ibintu bisa n’ibitoroshye kuko Prof Tombola avuga ko ipfundo ry’ikibazo ari ukuba abanyeshuri bavuga Icyongereza ku ishuri gusa, bagera mu rugo bakavuga Ikinyarwanda.

Dr Muvunyi Emmanuel uyobora HEC, mu bihe byashize

Umuyobozi w’Inama Nkuru y’Amashuri Makuru na Kaminuza (HEC), Dr. Muvunyi Emmanuel, avuga ko hari abanyeshuri barangiza kaminuza batazi kwandika ibaruwa isaba akazi.

Usibye kunanirwa kwandika ibaruwa isaba akazi mu Cyongereza, Dr Muvunyi avuga ko bamwe mu banyeshuri barangiza kaminuza badashobora kuvugira mu ruhame mu Cyongereza.

Mu rwego rwo gushakira umuti icyo kibazo, Dr Muvunyi yasabye amashuri makuru na za kaminuza gushyiraho aho abanyeshuri bimenyerereza kuvuga Icyongereza.

Yabisabiye mu nama yahuje abayobozi b’amashuri makuru na kaminuza na HEC, mu rwego rwo kurebera hamwe ikibazo cy’ubumenyi buke bw’abanyeshuri mu rurimi rw’icyongereza.

Dr. Muvunyi yagize ati “Bimaze kugaragara ko bamwe mu banyeshuri barangiza kaminuza batazi kwandika ibaruwa isaba akazi, badashobora kuvugira mu ruhame mu rurimi rw’icyongereza, izo ni imbogamizi ziterwa n’uko abanyeshuri ndetse n’abarimu bahora bavuga Ikinyarwanda ku mashuri no kuba badashobora gusaba mu rurimi rw’icyongereza.”

Minisiteri y’Uburezi na HEC babwiye abayobozi bakuru ba Kaminuza kujya bagenzurira bugufi uko ururimi rw’icyongereza rukoreshwa, kuko ngo bigaragara ko rukiri ikibazo mu barangije amashuri.

Dr. Emmanuel Muvunyi  avuga  ko  hashize imyaka 10 Icyongereza kigishwa mu mashuri uhereye mu yabanza, ayisumbuye na kaminuza ariko ngo usanga hakiri byinshi byo gukora kugira ngo abanyeshuri ndetse n’abarimu bagire ubumenyi buhagije mu rurimi rw’Icyongereza.

Yagarutse ku barimu ba kaminuza bigisha mu Kinyarwanda, avuga ko ari bo batiza umurindi abanyeshuri kutamenya ururimi rw’Icyongereza, aboneraho umwanya wo gusaba abarimu ko ibiganiro bagirana hagati yabo n’ibibahuza n’abanyeshuri byajya bikorwa mu Cyongereza.

Yagize ati “Usanga abarimu bigisha mu Kinyarwanda kuko ngo iyo bigishije mu Cyongereza abanyeshuri ntibasubiza, ariko iyo bavuze mu kinyarwanda ni bwo bavuga, ibi bigaragaza ko hari ikibazo cy’ururimi. Kaminuza zose zasabwe gushyiraho ahantu abanyeshuri bazaba bimenyereza kuvuga icyongereza, hazabaho n’ibiganiro ku buryo abanyeshuri bagira umuco wo kuvuga urwo rurimi.”

Yongeyeho ko hari abanyeshuri barangiza muri kaminuza bajya ku isoko ry’umurimo ugasanga ntibakora akazi neza, biterwa n’uko baba batarabonye ubumenyi.

Iyi nama yemeje ko hashyirwamo imbaraga ndetse hagashyirwaho amasomo umunyeshuri utazatsinda iryo somo ntage yimuka ngo ave mu mwaka umwe age mu wundi.

Dr. Muvunyi ashimangira ko hagiye kujya habaho ikizamini kidatangwa ku rwego rw’ishuri ahubwo gitangwa ku rwego rw’Isi, aho abanyeshuri bazasabwa kujya bagikora kandi bagitsinde.

Umuyobozi Mukuru wungirije ushinzwe Amasomo, Ubushakashatsi n’Imyigire muri Kaminuza ya UTB, Prof. Dr. Tombola Gustave, avuga ko ikibazo cy’ururimi rw’icyongereza mu mashuri gihera aho abana bize amashuri abanza no mu miryango iwabo kuko ari rwo bakoresha cyane.

Prof. Dr. Tombola avuga ko usanga umwana yirirwa ku ishuri yiga ururimi, ariko yagera mu rugo ugasanga atangiye kuvuga ikinyarwanda.

Agira ati “Imbogamizi zikunze kugaragara ni uko usanga umunyeshuri iyo avuye ku ishuri ajya mu rugo agatangira kuvuga ikinyarwanda, yagera hanze agahura na mugenzi we w’umunyarwanda bakavuga ikinyarwanda, iyo ni imbogamizi ihari.”

Yongeraho ko kuba u Rwanda rufite ururimi rumwe ari kimwe mu bituma abantu batita ku kumenya izindi harimo n’ icyongereza.

Ashimangira ko ibindi bihugu bivuga neza Icyongereza bigira indimi nyinshi, nk’aho usanga igihugu gifite indimi 400, bityo ururimi rubahuza rukaba urw’amahanga nk’icyongereza n’igifaransa.

Umwanditsi:

Mugisha Benigne

One Comment on “Dr Muvunyi: Bamwe barangiza kaminuza batazi kwandika ibaruwa isaba akazi”

  1. None se prof arashaka ko abavuga ikinyarwanda bajya bahanwa (guhinga, kubikoreza amabuye …) nkuko byahoze cyera mu gifaransa? ahubwo niba twashoboraga kwigisha mu Kinyarwanda cyangwa mu kisswahili. Kuki se tugomba kuvuga indimi za Molière na Shakespeare? kuki bo batakwiga ikinyarwanda n’igiswahire? Uzajye muri Russie, buri wese azakuvugisha ikirusiya kabone n’aho yaba azi icyongereza cyangwa igifaransa ashaka ko nawe umenya ururimi rwe, no mu bushinwa niko bimeze. Ntabwo tugomba kuba imbata z’indimi z’amahanga. Tugomba kuzimenya kugira ngo dushobore kuvugana n’abanyamahanga ariko biba byiza n’abanyamahanga bashoboye kuvuga urulimi rwacu. Kuki se Kiliziya yageze aho ikareka gusoma misa mu kilatini?

Tanga Igitekerezo

Email yanyu ntigaragazwa ku rubuga. Amazina na Email ni ngombwa.