Kigali-Rwanda

Mostly cloudy with showers
20°C
 

Cricket : Tanzania yegukanye igikombe k’irushanwa ryo kwibuka

Yanditswe na BUGINGO FIDELE

Ku ya Jun 25, 2019

Kuva tariki 18  kugeza 23  Kamena 2019, kuri Sitade mpuzamahanga y’umukino wa Cricket i Gahanga  habereye irushanwa mpuzamahanga ryo kwibuka muri uyu mukino mu kiciro  cy’abagore «Kwibuka Women T20 Tournament 2019».

Ikipe y’igihugu ya Tanzania yari yitabiriye iri rushanwa ku nshuro ya mbere  ni yo yegukanye igikombe  nyuma yo gutsinda  imikino yose uko ari 6. Iyi kipe ikaba yaregukanye  iki gikombe cyari gifitwe na Kenya mu myaka ibiri iheruka (2017 na 2018) uyu mwaka itarabashije kwitabira.

Iri rushanwa  ryari ryitabiriwe n’amakipe 4 ari yo Tanzania, Uganda, Mali n’u Rwanda. Izi kipe zagombaga gukina hagati yazo umukino ubanza n’uwo kwishyura ikipe igize amanota menshi ikegukana igikombe.

Ikipe ya Tanzania yitwaye neza itsinda imikino 6 aho yatsinze, Uganda mu mikino 2, itsinda u Rwanda  imikino 2 inatsinda Mali imikino 2.

Ku mwanya wa kabiri haje ikipe ya Uganda yatsinze imikino 4, aho yatsinze Mali imikino 2   ndetse n’u Rwanda imikino 2. Ku mwanya wa 3 haje ikipe y’u Rwanda  yatsinze imikino ibiri gusa aho yatsinze Mali ari na yo yasoje ku mwanya wa nyuma wa 4 aho nta mukino n’umwe yatsinze.

Perezida w’ishyirahamwe ry’umukino wa Cricket mu Rwanda “RCA”, Mugarura Eddy Baraba  yishimiye uko iri rushanwa ryagenze ndetse n’ibihugu byabashije kwitabira. Agarutse ku rwego  rw’imikinire yatangaje ko ikipe ya Mali yaje muri iyi mikino imaze ukwezi kumwe gusa ishinzwe itangira nabi ariko  imikino yageze  ku musozo igaragaza umukino mwiza.

Ikipe y’igihugu ya Tanzania ishyikirizwa igikombe k’irushanwa ryo kwibuka

Perezida w’ishyirahamwe ry’umukino wa Cricket mu Rwanda “RCA”, Mugarura Eddy Baraba ashyikiriza igikombe ikipe ya Tanzania

Abakinnyi bose b’amakipe yitabiriye bafashe ifoto y’urwibutso