20°C , Intermittent clouds | Kigali-Rwanda

Cricket: Ikipe ya Challengers CC yisubije igikombe cya shampiyona y’ikiciro cya mbere

Yanditswe na BUGINGO FIDELE

Ku ya 11-11-2019 saa 18:17:03
Abakinnyi b'ikipe ya Challenges CC bishimimira igikombe cya shampiyona ya 2019

Ikipe  ya Challengers CC yegukanye igikombe cya shampiyona  y’ikiciro cya mbere mu bagabo mu mukino wa Cricket Unimoni-RCA Premier League 2019”. Iyi kipe yitwaye neza ubwo hasozwaga imikino ya shampiyona tariki 10 Ugushyingo 2019 kuri Sitade mpuzamahanga ya Gahanga.

Amakipe 3  ari yo  Challengers CC, Kigali CC na Telugu Royals CC zanganyaga amanota 12 gusa Kigali CC yari yarasoje imikino yayo 5 mu gihe Challengers CC na  Telugu Royals CC zagombaga gukina umukino w’umunsi wa  nyuma wa shampiyona  kugira ngo hamenyekane ikipe yegukana igikombe.

Ikipe ya Challengers CC yitwaye neza itsinda Telugu Royals CC ku kinyuranyo cy’amanota 4. Iyi kipe yahise iyobora urutonde n’amanota 16 biyihesha kwegukana igikombe cya 2019, ikipe ya Kigali CC  iba  iya kabiri naho ku mwanya wa 3 hasoreza  Telugu Royals CC  zose n’amanota 12.

Iyi kipe ya Challengers CC ikaba ari nayo yari ifite iki gikombe yegukanye umwaka ushize wa 2018.

Amakipe 2 ya nyuma, Vikings CC na Right Guards CC yamanutse mu kiciro cya kabiri.

Muri iki kiciro, umukinnyi Pankaj Vekaria (Kutchi Tigers RCC) yabaye iya 4 ni we wahembwe nk’uwitwaye neza mu mwaka wose (Player of Series).

Spartans CC na Zonic Tigers CC zazamutse mu kiciro cya mbere

Ikipe ya Spartans CC ni yo yegukanye umwanya wa mbere mu kiciro cya kabiri ikurikirwa na Zonic Tigers CC. Izi kipe zombi zikaba zarabonye itike yo kuzamuka  mu kiciro cya mbere aho zasimbuye  Vikings CC na Right Guards CC.

Charity CC yegukanye igikombe mu bagore

Mu bagore, shampiyona y’ikiciro cya mbere, ikipe ya Charity CC ni yo yegukanye igikombe idatsinzwe  aho yasoje n’amanota 16 naho ku mwanya wa 2 haza ikipe ya Indatwa Hampshire CC n’amanota 12. White Clouds CC ni yo yari ifite iki gikombe yegukanye umwaka ushize wa 2018.

Mu kiciro cya kabiri, ikipe ya Queens of Victory CC yegukanye umwanya wa mbere n’amanota 20 naho ikipe ya Ndera Girls CC isoreza ku mwanya wa 2 n’amanota 12.

Nyuma yo gusoza umwaka w’imikino wa 2019, Umuyobozi wa Unimoni mu Rwanda ari yo muterankunga mukuru,  Peeush Pillai  yatangaje ko bishimiye uko umwaka wagenze muri rusange. Yakomeje ashimira ishyirahamwe ry’umukino wa Cricket mu Rwanda “RCA” ku bikorwa bakora bigamije guteza imbere umukino. Ati: “Turishimira urwego  uyu mukino ugezeho n’uburyo  amarushanwa ategurwa hakurikijwe amategeko  ya ICC.”

Perezida wa RCA, Mugarura Eddy Baraba  yavuze ko imikino yagenze neza nta kibazo cyabaye kandi bishimira ko umukino ukomeje kugenda waguka ugera no mu bice bitandukanye by’igihugu.

Yakomeje ashimira cyane umuterankunga mukuru «Unimoni» aho anavuga ko babemereye gukomeza gukora kandi ko mu gihe bamaze bakorana bamaze kugera kuri byinshi dore ko ubu bavuye ku makipe 4 ubu bakaba bageze ku makipe 24 harimo 10 y’abagore na 14 y’abagabo.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.