Kigali-Rwanda

Partly cloudy
18°C
 

COVID-19 yahitanye 6 handura abashya 157, hakingirwa abashya 16,821

Yanditswe na NTAWITONDA JEAN CLAUDE

Ku ya 25-09-2021 saa 21:29:41

Kuri uyu wa Gatandatu tariki 25 Nzeri 2021, hatangajwe abarwayi bashya 157 b’icyorezo cya COVID-19 bangana na 1.5% by’ibipimo byafashwe mu masaha 24 ashize, bakaba batumye abantu bamaze gutahurwaho iki cyorezo bagera ku 98,727 kuva muri Werurwe 2020.

Abantu bagera ku 90,000 bamaze gukira iki cyorezo mu gihe abakirwaye babarirwa mu 5,000 kugeza ubu. Uyu munsi kandi abarwayi 7 ni bo basezerewe mu bitaro, mu gihe umuntu umwe ari we wahawe ibitaro na ho abarembye bakaba ari 11.

Minisiteri y’Ubuzima yatangaje urupfu rw’abantu 6 barimo abagore 3 n’abagabo 3, bagejeje umubare w’abamaze kwamburwa ubuzima n’icyorezo cya COVID-19 ku 1,248.

Abo bagore bapfuye barimo uw’imyaka 89 w’i Kamonyi, uwa 86 w’i Karongi n’uwa 85 w’i Gakenke, mu gihe abagabo bapfuye barimo uw’imyaka 84 w’i Kigali, uwa 79 w’i Nyaruguru n’uwa 38 w’i Rusizi.

Abarwayi bashya batangajwe barimo abo muri Kigali 24, Gicumbi 21, Karongi 15, Ngororero 13, Rulindo 11, Musanze 9, Nyabihu 8, Burera 7, Nyagatare 6, Rutsiro 6, Gakenke 6, Ngoma 5, Huye 4, Muhanga 4, Rusizi 4, Kamonyi 3, Bugesera 2, Rwamagana 2, Nyanza 2, Rubavu 2, Gisagara 1, Kirehe 1, na Nyaruguru 1.

Abantu 140,662 ni bo bahawe doze ya kabiri y’urukingo rwa COVID-19 batuma abamaze gukingirwa byuzuye guhera muri Gashyantare bagera kuri miliyoni 1,639,138.

Ni mu gihe abantu 16,821 ari bo bahawe doze ya mbere uyu munsi bakaba bagejeje umubare w’abamaze gukingirwa muri rusange kuri 2,097,188. Inkingo zitangwa mu Rwanda zirimo urwa AstraZeneca, Pfizer, Sinopharm na Johnson&Johnson ihabwa umuntu doze imwe.

Minisiteri y’Ubuzima itangaza ko kugeza ubu hamaze gukingirwa 18% by’abasaga miliyoni 7.8 bagomba kuba bakingiwe bitarenze muri Kamena 2022. Abamaze gukingirwa kuri ubu bangana na 10% by’abaturage bose muri rusange.

Minisitiri w’Ubuzima Dr. Ngamije Daniel yagize ati: “Gukingira abantu miliyoni 2 ni intambwe ishimishije ariko urugendo rurakomeje. Guverinoma y’u Rwanda irimo gukora uko ishoboye ngo ibone inkingo zikenewe, turashimira abafatanyabikorwa bose bakomeje kuduha inkingo bakadufasha o kuzikwiza mu baturage. Dufite intego yo gukingira 30% muri uyu mwaka.”

Mu gihe u Rwanda rutaragera nibura ku rugero rwa 60% bagomba gukingirwa, buri wese arasabwa kwitwararika no kubahiriza amabwiriza yo kwirinda ari yo gusiga intera ya metero, kwambara neza agapfukamunwa no gukaraba intoki kenshi bakoresheje amazi meza n’isabune cyangwa alukolo yabugenewe.

Guverinoma y’u Rwanda irashimira abaturarwanda uruhare rwabo muri uru rugamba rwo kurwanya iki cyorezo, ikaba ibasaba kwitabira kwikingiza kuko inkingo zigenda zirushaho kuboneka, ndetse no kwisuzumisha kenshi kugira ngo bagabanye ikwirakwira rya COVID-19.

Imbaraga zashyizwe mu guhangana n’iki cyorezo zatumye ikigero cy’ubwandu kiva ku 10% cyabarwaga hagati ya Nyakanga na Kanama kigera munsi ya 3% ari na cyo kigaragaza ko ubwandu butari ku rwego rukabije.

Imibare yo ku rwego mpuzamahanga igaragaza ko abamaze gutahurwaho iki cyorezo kuva cyagera ku Isi bamaze kurenga miliyoni hafi 232, barimo miliyoni abasaga 208 bakize n’abasaga miliyoni 4.7 babuze ubuzima.

Umwanditsi:

NTAWITONDA JEAN CLAUDE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.