21°C , Partly sunny | Kigali-Rwanda

COVID-19: Uyu munsi habonetse abarwayi 4 bashya, hakira 5

Yanditswe na Imvaho Nshya

Ku ya 23-05-2020 saa 17:25:39

Kuri uyu wa Gatandatu tariki ya 23 Gicurasi 2020, habonetse abarwayi bashya 4 b’icyorezo cya Koronavirusi (COVID-19) mu bipimo 1,109 byafashwe mu masaha 24 ashize, hataha 5 bakize neza, bituma umubare w’abamaze gukira ugera kuri 227.

Minisiteri y’Ubuzima ivuga  ko umubare w’abakirimo kwitabwaho n’abaganga ugeze kuri 98, mu barwayi 325 bamaze gutahurwaho icyo cyorezo mu Rwanda,  mu bipimo 57,077 byafashwe kuva umurwayi wa mbere yatahurwa muri Werurwe kugeza ubu.

Abakirwaye bakomeje kuvurirwa ahabugenewe, ndetse hakomeje igikorwa cyo gupima abantu mu Gihugu, bikaba bivugwa ko kugeza ubu nta murwayi mushya uratahurwa aturutse mu Baturarwanda hagati kuko abenshi mu  baba bavuye mu mahanga cyangwa mu bashyizwe kato.

Kugeza ubu ntawurabikwa mu Rwanda ko yishwe n’icyorezo cya COVID-19. Inama y’Abaminisitiri yateranye ku wa Mbere tariki 18 Gicurasi, yanzuye ko nta gihindutse hakongera kudohorwa ku ngamba zashyiriweho kwirinda COVID-19, ingendo hagati y’Intara n’Umujyi wa Kigali n’ibindi bikorwa by’ubuzima busanzwe bitaremererwa gukora bigasubukurwa ku ya 1 Kamena 2020.

Abaturarwanda barasabwa kurushaho kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa alukoro yabugenewe.

Imibare yatangajwe ku rwego mpuzamahanga yerekana ko muri Afurika abamaze kwandura COVID-19 bageze ku 104,279 barimo 41,717 bakize n’abandi 3,185 bahitanywe na cyo. Abamaze kwandura ku Isi bangana na 5,367,474 barimo abakize 2,189,287 n’abapfuye 342,242. Bivuze ko abakirimo kwitabwaho n’abaganga ku Isi bangana na 2,835,945.

 

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.