22°C , Partly sunny | Kigali-Rwanda

COVID-19: U Rwanda rwubahirije gutangaza amabwiriza y’ubuziranenge

Yanditswe na KAYITARE JEAN PAUL

Ku ya 17-05-2020 saa 13:28:34
Murenzi Raymond, Umuyobozi Mukuru wa RSB

Ikigo k’Igihugu Gitsura Ubuziranenge (RSB), cyatangaje ko nubwo icyorezo cya Koronavirusi (COVID-19) cyatunguranye, mu rwego rw’ubuziranenge hari ibyari bisanzwe byarakozwe harimo gushyiraho amabwiriza y’ubuziranenge arebana no gutegura neza igicuruzwa cyangwa ibikoresho byagiye bikoreshwa ndetse Abaturarwanda bagikoresha, nk’imiti isukura intoki (Hand sanitizers) udupfukamunwa n’ibindi.

Ibi byagarutsweho na Murenzi Reymond, Umuyobozi Mukuru wa RSB, mu kiganiro ‘Kubaza Bitera Kumenya’ cyatambutse uyu munsi ku Cyumweru tariki 17 Gicurasi 2020 kuri RBA.

Murenzi yavuze ko hari harashyizweho amabwiriza y’imiti isukura intoki kandi akaba azwi n’abacuruzi batandukanye kuko yari asanzwe akoreshwa ariko abayasaba babaye benshi kubera icyorezo cya COVID-19.

Yanavuze ko hari amabwiriza arebana n’ibikoresho by’ubwirinzi bikoreshwa kwa muganga ndetse n’ibikoreshwa mu buzima busanzwe, byaba ibyambarwa n’abaganga ndetse n’ibindi bifasha muri serivisi nkenerwa kwa muganga.

Murenzi avuga igihe kurwanya COVID-19 byatangiraga, ibigo by’ubuziranenge ku Isi, byemereanije ko amabwiriza y’ubuziranenge ahari ashyirwa ku mugaragaro ndetse agatangirwa ubuntu kuko ubusanzwe ngo yagurishwaga kubera ko aba yarashyizweho n’impuguke zitandukanye zivuye mu nganda zikoresheje umutukungo

Ati: “Amabwiriza y’ubuziranenge na servisi zo gutanga ibirango by’ubuziranenge ku imiti yica udukoko, ikanasukura intoki (hand sanitizers) nazo zagizwe ubuntu. Twese dukomeze gufatanya kurwanya iki cyorezo.”

AYakomeje agira ati: “Uruhare rwa RSB yakomeje kugira by’umwihariko, ni ugushyira ahagaragara ayo mabwiriza y’ubuziranenge ndetse no gufasha abashaka kuyasobanukirwa, dutanga amahugurwa yimbitse yahawe abakora imiti isukura intoki ndetse n’abakora udupfukamunwa kugira ngo bumve neza ibisabwa n’amabwiriza y’ubuziranenge.”

Ibirebana n’uko ubuziranenge bugenzurwa, ikigo cy’ubuziranenge kivuga ko hatibandwa ku byo Laboratwari (Laboratoire) yerekana gusa, ahubwo ko kijya no ku ruganda kikareba ibyo uruganda rukora, kikamarana narwo iminsi, kireba ko ibyo uruganda rukora bizaba byujuje ubuziranenge ariko ngo ubwo bugenzuzi bugakorerwa ku ruganda, kuri Laboratwari no ku masoko.

RSB yagaragaje ko yishimiye uburyo inganda zahawe uburenganzira bwo gukora udupfukamunwa zikomeje kugenda zitera intambwe iganisha ku kuzuza ibisabwa n’amabwiriza y’ubuziranenge.

Iyo hapimwa ubuziranenge bw’udupfukamunwa harebwa ibitandukanye ariko cyane:cyahe hibandwa ku cyo gakozemo uburyo gashobora gutambutsa umwuka, imiterere y’udushumi twako, uburyo kagomba kagomba kuba gapfunyitswemo, uburyo gashobora gufatwa n’umuriro n’bindi.

RSB ivuga ko mu guharanira ubuziranenge mu kubahiriza ihame ry’ubuziranenge hanibandwa no kureba uburyo butangiza ibidukikije, ari na yo mpamvu na yakoranye n’Ikigo k’igihugu k’Ibidukikije (REMA), Ikigo gishinzwe kugenzura ibiribwa n imiti mu Rwanda (Rwanda Food and Drugs Authority) n’ibindi, mu gushyiraho amabwiriza arebana n’ubuzima ndetse n’ibidukikije .

Umwanditsi:

KAYITARE JEAN PAUL

Tanga Igitekerezo

Email yanyu ntigaragazwa ku rubuga. Amazina na Email ni ngombwa.