26°C , Partly sunny | Kigali-Rwanda

COVID-19: RCA  yageneye inkunga abari  mu muryango mugari wa Cricket muri ibi bihe 

Yanditswe na BUGINGO FIDELE

Ku ya 25-04-2020 saa 23:53:48
RCA yageneye ubufasha imiryango y'ababa mu muryango mugari wa Cricket muri ibihe byo guhangana n'icyorezo cya koronavirusi

Tariki 25 Mata 2020, ubuyobozi bw’ishyirahamwe ry’umukino wa Cricket mu Rwanda “RCA”  bwatangaje ko bwatangiye igikorwa cyo kugenera inkunga  y’ibiribwa n’ibindi bikenewe ku  miryango itishoboye ya bamwe mu bakinnyi ndetse n’abandi basanzwe baba mu muryango mugari wa Cricket.

Ibi bikozwe muri iki gihe Isi yugarijwe n’icyororezo cya Koronavirusi aho  abantu bose basabwe kuguma mu rugo kugira ngo hirindwe ikwirakwira ry’iki cyorezo cyagaragaye mu Rwanda bwa mbere tariki 14 Werurwe 2020 naho gahunda yo kuguma mu rugo ikaba yaratangiye tariki 22 Werurwe 2020 bikaba biteganyijwe ko izarangira tariki 30 Mata 2020.

Perezida wa RCA, Mugarura Eddie Baraba yatangaje ko imiryango 100 ari yo  yagenewe ubu bufasha aho  bizatwara amafaranga agera kuri miriyoni 3 z’amafaranga y’u Rwanda.

Yagize ati : “ Biri mu nshingano zacu gufasha abanyamuryango bacu igihe bakeneye ubufasha. Turi mu bihe bikomereye buri wese ariko RCA  yarisuganyije ishaka ubushobozi kugira ngo tugire icyo dufasha abari mu muryango mugari wa Cricket.”

Aganira n’Imvaho Nshya, umuyobozi ushinzwe ibikorwa muri RCA, Byiringiro Emmanuel yavuze ko  bitari byoroshye kureba abababaye kurusha abandi kuko muri iyi minsi abantu bose  batameze neza kubera iki cyorezo.

Yakomeje avuga ko abatoranyijwe harimo abakinnyi bakiri bato  basanzwe banakinira ikipe y’igihugu ndetse na bamwe mu basanzwe babafasha mu bikorwa bya buri munsi  ariko bakora nk’abakorerabushake.

Byiringiro yavuze ko  kubera bitari kubakundira kugera ku muryango wa buri muntu kuko batuye ahantu batandukanye barimo kuboherereza abafaranga ahwanye n’ibyo bagomba kubagurira.

Kuri ubu mu Rwanda abamaze kwandura iki cyorezo bageze ku 183 aho abakirwaye ari 95 mu gihe 87 bamaze gukira.

Perezida wa RCA, Mugarura Eddie Baraba

Umwanditsi:

BUGINGO FIDELE

One Comment on “COVID-19: RCA  yageneye inkunga abari  mu muryango mugari wa Cricket muri ibi bihe ”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.