25°C , Partly sunny | Kigali-Rwanda

COVID-19: Muri Kigali na Rusizi habonetse abarwayi bashya 93

Yanditswe na Imvaho Nshya

Ku ya 14-08-2020 saa 22:01:19

Kuri uyu wa Gatanu tariki ya 14 Kanama 2020, habonetse abarwayi bashya 93 b’icyorezo cya Koronavirusi (COVID-19) batahuwe mu bipimo 4,610 byafashwe mu masaha 24 ashize, hataha abantu  46 bakize neza.

Minisiteri y’Ubuzima yatangaje ko abarwayi bashya barimo 80 bo mu Mujyi wa Kigali na 13 bo mu Karere ka Rusizi bibasiwe kurusha abandi n’abatahuwe mu midugudu iri mu kato.

Ibyo byatumye umubare w’abamaze gutahurwaho icyo cyorezo ugera kuri 2,293 barimo 1,604 bamaze  gukira kuva umurwayi wa mbere yagaragara mu Rwanda.

Kugeza ubu abakirimo kwitabwaho n’abaganga bageze kuri 681 mu barwayi bamaze kuboneka  mu bipimo 323,905 byafashwe muri Werurwe kugeza ubu, aho iki cyorezo kimaze gutwara ubuzima bw’abarwayi umunani.

Igikorwa cyo gupima abantu mu buryo bwa rusange mu Gihugu kirakomeje, Abaturarwanda barasabwa kurushaho kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa arukoro yabugenewe.

Imibare yatangajwe ku rwego mpuzamahanga yerekana ko muri Afurika abamaze kwandura COVID-19 barenze miriyoni imwe  irimo abarenga ibihumbi 781.6 bakize n’abandi barenga ibihumbi 24.6 bahitanywe na cyo. Abamaze kwandura ku Isi bararenga miriyoni 21,3, barimo abakize barenga miriyoni 14 n’abapfuye barenga ibihumbi 761.6.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.