17°C , Partly cloudy | Kigali-Rwanda

COVID-19: Mu Rwanda habonetse umurwayi 1 mushya, hakira 5

Yanditswe na Imvaho Nshya

Ku ya 22-05-2020 saa 18:06:00

Kuri uyu wa Gatanu tariki ya 22 Gicurasi 2020, habonetse umurwayi mushya 1 w’icyorezo cya Koronavirusi (COVID-19) mu bipimo 1,568 byafashwe mu masaha 24 ashize, hataha 5 bakize neza, bituma umubare w’abamaze gukira ugera kuri 222.

Minisiteri y’Ubuzima ivuga  ko umubare w’abakirimo kwitabwaho n’abaganga ugeze kuri 99, mu barwayi 321 bamaze gutahurwaho icyo cyorezo mu Rwanda,  mu bipimo 55,968 byafashwe kuva umurwayi wa mbere yatahurwa muri Werurwe kugeza ubu.

Abakirwaye bakomeje kuvurirwa ahabugenewe, ndetse hakomeje igikorwa cyo gupima abantu mu Gihugu, bikaba bivugwa ko kugeza ubu nta murwayi mushya uratahurwa aturutse mu Baturarwanda hagati kuko abenshi mu batahurwa baba bavuye mu mahanga cyangwa mu bashyizwe kato k’iminsi 14.

Kugeza ubu ntawurabikwa mu Rwanda ko yishwe n’icyorezo cya COVID-19. Inama y’Abaminisitiri yateranye ku wa Mbere tariki 18 Gicurasi, yanzuye ko nta gihindutse hakongera kudohorwa ku ngamba zashyiriweho kwirinda COVID-19, ingendo hagati y’Intara n’Umujyi wa Kigali n’ibindi bikorwa by’ubuzima busanzwe bitaremererwa gukora bizasubukurwa ku ya 1 Kamena 2020.

Abaturarwanda barasabwa kurushaho kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa alukoro yabugenewe.

Imibare yatangajwe ku rwego mpuzamahanga yerekana ko muri Afurika abamaze kwandura COVID-19 bageze ku 100,666 barimo 39,543 bakize n’abandi 3,105 bahitanywe na cyo. Abamaze kwandura ku Isi bangana na 5,257,933 barimo abakize 2,123,956 n’abapfuye 336,921. Bivuze ko abakirimo kwitabwaho n’abaganga ku Isi bangana na 2,797,056.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.