COVID-19: Mu minsi ya vuba imikino itandukanye izasubukurwa

Yanditswe na BUGINGO FIDELE

Ku ya 18-09-2020 saa 22:51:24
Umunyamabanga Uhoraho muri MINISPORTS, Shema Maboko Didier

Kuva muri Werurwe 2020 ubwo icyorezo cya COVID-19 cyagaragaraga mu Rwanda, ibikorwa byose bya siporo byarahagaritswe mu rwego rwo kwirinda ikwirakira ry’iki cyorezo.

Muri Kamena 2020 hari imwe mu mikino yakomorewe ikinwa n’umuntu ku giti ke aho hemewe imyotozo hakurikiza amabwiriza yo kwirinda ariko nta marushanwa.

Tariki 18 Nzeri 2020, mu kiganiro n’itangazamakuru, Minisiteri ya Siporo “MINISPORTS” yemeje ko mu minsi ya vuba imikino izasubukurwa ariko hagakurikizwa amabwiriza yo gukomeza kwiriza COVID-19.

Umunyamabanga uhoraho muri MINISPORTS, Shema Maboko Didier atangaza ko Minisiteri yafashe umwanya iganira n’amashyirahamwe y’imikino, kugira ngo barebe uburyo Siporo yakongera igatangira ariko hagashyirwaho n’ingamba bakurikije uko buri mukino kuko buri mukino ufite umwihariko.

Yagize ati: “Ingamba zo kwirinda mu mupira w’amaguru ntabwo wazijyana muri Tennis, izo muri Tennis ntabwo wazijyana mu mikino ngororamubiri, buri mukino wasabwe kutugaragariza ingamba bafashe.”

Shema akomeza avuga ko bakoze inama zigera kuri 3 n’abayobozi b’amashyirahamwe y’imikino kugira ngo barebere hamwe uko imikino yasubukurwa kandi biri mu nzira nziza.

Hari amarushanwa mpuzamahanga u Rwanda rugomba kwitabira hanze y’Igihugu ndetse n’agomba kubera mu Gihugu imbere Shema Maboko Didier agaragaza ko amashyirahamwe yose y’imikino wasabwe gutanga ingamba zizakurikizwa igihe amarushanwa yaba asubukuwe.

Ati: “Turimo kubikorana n’amashyirahamwe y’imikino atandukanye ndetse n’izindi nzego za Leta, kugira ngo ingamba zizubahirizwe mu gihe tuzaba twitabiriye cyangwa twakiriye aya marushanwa.”

Yakomeje avuga ko mu ntangirizo z’ukwezi gutaha k’Ukwakira 2020 amakipe agomba gutangira kwitegura kugira ngo azitabire amarushanwa yiteguye neza; gusa byose bigomba gukorwa hubahirizwa ingamba zo kwirinda COVID-19.

Kugeza ubu amawe mu mashyirahamwe y’imikino mu Rwanda nka Basketball n’umupira w’amaguru bamaze gutanga ingamba zigomba gukurikizwa ubwo bazaba basubukuye amarushanwa.

Shema avuga ko kuri ubu abatangiye imyitozo nk’ikipe y’igihugu y’umupira w’amaguru “Amavubi” ubu barimo gukora imyitozo yo kongera imbaraga ariko bagakora hubahizwa amabwiriza yo kwirinda icyorezo cya COVID-19.

Nyuma y’aho siporo y’umuntu ku giti ke yasubukuwe, MINISPORTS yagaragaje ko ku Cyumweru tariki 20 Nzeri 2020 hazasubukurwa igikorwa cya siporo rusange “Car Free Day” ariko siporo ikazakorwa hakurikizwa amabwiriza yo kwirinda COVID-19.

Minisitiri wa Siporo Aurore M. Munyangaju na we yari yitabiriye ikiganiro n’abanyamakuru

Umwanditsi:

BUGINGO FIDELE

3 Comments on “COVID-19: Mu minsi ya vuba imikino itandukanye izasubukurwa”

  1. Nibyiza cyane kuba imikino igiye gusubukurwa nkuko Abayobozi ba MINISPORTS babiganiye n’Abanyamakuru kubahiriza amabwiriza yo kwirinda bizakorwe neza hehe n’ubwigunge abafana natwe dukomeje kwirinda kovide19. murakoze kutugezaho iyo nkuru nziza “APEL Oyeeeeee!!!!”

  2. Nibyizakuba imikinoya siporo igiyegusubukura turasabakon’imikinoy’amahirweyakorerwa inyigo igakomorerwa

Tanga Igitekerezo

Email yanyu ntigaragazwa ku rubuga. Amazina na Email ni ngombwa.