26°C , Partly sunny | Kigali-Rwanda

COVID-19 iteje 1/6 cy’urubyiruko kubura akazi –OIT

Yanditswe na NYIRANEZA JUDITH

Ku ya 28-05-2020 saa 15:24:05

Urubyiruko  ni rwo ruzibasirwa cyane n’ingaruka za Koronavirusi (COVID-19) nk’uko bitangazwa n’Umuryango Mpuzamahanga wita ku Murimo (OIT), ko umuntu umwe mu rubyiruko kuri batandatu azaba nta kazi afite.

Umuyobozi Mukuru wa OIT, Guy Ryder muri raporo yagaragarije itangazamakuru i Genève mu nama ya 4 yagaragazaga ibipimo byerekeranye n’icyorezo cya COVID-19, yasobanuye ko urubyiruko ari rwo rwagizweho ingaruka cyane bitewe n’ibibazo biri ku isoko ry’umurimo mu nzego z’uburezi n’amahugurwa.

Hashingiwe ku nyigo yakozwe n’Umuryango mpuzamahanga w’umurimo mu bantu batarengeje imyaka 29, 1/6 babajijwe yahagaritse akazi kuva habonetse COVID-19. Abasigaye munkazi kandi nabo igihe bari basanzwe bakora cyagabanutse ku gipimo cya 23%.

Byongeye, hafi ½ cy’urubyiruko rwigaga bagize gukererwa mu myigire yabo, naho 10% bo bumva batagikomeje amasomo ngo barangize kwiga.

Iyo nyigo kandi igaragaza ko mu 2019, urubyiruko rutari rufite akazi rwari ku gipimo cya 13,6% cyari hejuru kurusha mu bindi byiciro by’abaturage. Hafi miriyoni 267 z’urubyiruko ntibari bafite imirimo, ntibari mu ishuri nta n’amahugurwa.

Abari hagati y’imyaka 15-24 muri rusange bakoraga imirimo ituma barushaho gukena, kuko ari imirimo ihemba nabi cyangwa iciriritse, wenda bitewe n’uko  bari mu rwego rw’abakozi b’abimukira.

Umuyobozi Mukuru wa OIT, Guy Ryder, yahamagariye za Guverinoma kwita by’umwihariko ku rubyiruko kugira ngo rutazagerwaho n’ingaruka by’igihe kirekire.

Ati: “Urubyiruko ruzagira ibibazo ruse nk’aho ntawurukeneye kandi ni rwinshi. Akaga ni uko icyo kibazo ku rubyiruko kimara imyaka igera mu macumi no kurengaho. Biteza imbogamizi ku hazaza, mu mibereho yabo yose y’akazi”.

OIT yabonye hiyongereyeho kuva kuri miriyoni 7 kugeza kuri miriyoni 135, imirimo yatakaye (itakiriho) mu gihembwe cya mbere ku Isi ugereranyije n’ibipimo byaherukaga.

Icyegeranyo k’imirimo yahagaze hagati ya Mata na Kamena ntiyahindutse, ni miriyoni 305.

Umwanditsi:

NYIRANEZA JUDITH

Tanga Igitekerezo

Email yanyu ntigaragazwa ku rubuga. Amazina na Email ni ngombwa.