21°C , Partly cloudy | Kigali-Rwanda

COVID-19: Hatahuwe abarwayi 38 barimo abagororwa 29 b’i Kigali

Yanditswe na Imvaho Nshya

Ku ya 12-07-2020 saa 20:56:22

Minisiteri y’Ubuzima yatangaje ko kuri iki Cyumweru tariki ya 12  Nyakanga 2020, habonetse abarwayi bashya 38 b’icyorezo cya Koronavirusi (COVID-19) mu bipimo 3,021 byafashwe mu masaha 24 ashize, hataha abandi 21 bakize neza.

Umubare w’abamaze gukira ugera kuri 684 mu 1,337 bamaze gutahurwaho icyo cyorezo mu Rwanda.

Abarwayi bashya  barimo itsinda ry’abantu 29 bafungiye muri za kasho mu Mujyi wa Kigali,  batanu batahuwe mu Karere ka Rubavu, babiri bo muri Kirehe, umwe wo muri Nyamagabe, n’undi umwe watahuwe mu batwara amakamyo bashyizwe mu kato bakigera mu gihugu.

ABatahuwe bose bashyizwe mu kato ndetse n’abo bahuye bahita bakurikiranwa. Kugeza ubu abakirimo kwitabwaho n’abaganga bageze kuri 649 mu barwayi bamaze kuboneka  mu bipimo 183,341 byafashwe kuva umurwayi wa mbere yatahurwa muri Werurwe kugeza ubu.

Iki cyorezo kimaze gutwara ubuzima bw’abarwayi bane mu Rwanda.

Igikorwa cyo gupima abantu mu buryo bwa rusange mu Gihugu kirakomeje, ndetse Akarere ka Rusizi gakomeje kuba kato mu gihe hagisuzumwa abantu ngo harebwe uko ubwandu buhagaze.

Imwe mu mirenge y’Akarere ka Rusizi n’imidugudu ine yo muri Kigali iracyari muri gahunda  ya Guma Mu Rugo (lock down), hagamijwe gukumira ikwirakwizwa ry’icyo cyorezo cyahagaragaye.

Mu tundi turere, ingendo zihuza intara  n’Umujyi wa Kigali n’ibikorwa bitandukanye by’ubuzima busanzwe birakomeje.

Abaturarwanda barasabwagukomeza kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa arukoro yabugenewe.

Imibare yatangajwe ku rwego mpuzamahanga yerekana ko muri Afurika abamaze kwandura COVID-19 bageze ku 578,734 barimo 287,563 bakize n’abandi 12,996 bahitanywe na cyo. Abamaze kwandura ku Isi bangana na 12,986,740 barimo abakize 7,565,204 n’abapfuye 570,032.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.