COVID-19: Hakize abantu 180 mu munsi umwe

Yanditswe na Imvaho Nshya

Ku ya 14-09-2020 saa 20:45:19

Minisiteri y’Ubuzima yatangaje ko kuri uyu wa Mbere tariki ya 14 Nzeri 2020, habonetse abarwayi bashya 11 b’icyorezo cya Koronavirusi (COVID-19) mu bipimo 1,687  byafashwe mu masaha 24 ashize, abaganga basezerera abantu  180 bakize neza.

Umubare w’abamaze gukira ugera ku 2,736 bangana na 59% by’abarwayi 4,602 bamaze gutahurwaho icyo cyorezo mu Rwanda, mu bipimo 464,583 bimaze gufatwa kuva umurwayi wa mbere yatahurwa mu Rwanda.

Abarwayi bashya barimo 5 batahuwe mu Mujyi wa Kigali, 3 bo mu Karere ka Nyamagabe, umwe wo mu Karere ka Rusizi, umwe wo muri Bugesera n’undi wo muri Rulindo.

Kugeza ubu abakirimo kwitabwaho n’abaganga bageze kuri 1,844, iki cyorezo kikaba kimaze gutwara ubuzima bw’abarwayi 22 mu Rwanda.

Igikorwa cyo gupima abantu mu buryo bwa rusange mu Gihugu kirakomeje, ndetse ingendo zihuza Umujyi wa Kigali n’Intara mu modoka rusange zahagaritswe mu rwego rwo gukumira ikwirakwizwa ry’icyo cyorezo. Ingendo zijya n’iziva i Rusizi mu modoka bwite (private cars) zemerewe muri iki cyumweru nyuma y’igihe kinini aka karere kari mu kato.

Abaturarwanda barasabwa kurushaho kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa arukoro yabugenewe.

Imibare yatangajwe ku rwego mpuzamahanga yerekana ko muri Afurika abamaze kwandura COVID-19 bageze kuri miriyoni n’ibihumbi 353.2 barimo abantu miriyoni bakize n’abandi basaga ibihumbi 32.6 bahitanywe na cyo. Abamaze kwandura ku Isi barasaga miriyoni 29.3 barimo abasaga  miriyoni 21.1 bakize n’abapfuye barenga ibihumbi 931.1.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.