18°C , Partly cloudy | Kigali-Rwanda

COVID-19:  FERWAFA yafashe umwanzuro wo  guha APR FC igikombe, Gicumbi na Heroes zigasubira mu kiciro cya kabiri

Yanditswe na Imvaho Nshya

Ku ya 23-05-2020 saa 15:15:31
APR FC yegukanye igikombe cya shampiyona ya 2019-2020

Ishyirahamwe ry’umupira w’amaguru mu Rwanda “FERWAFA” ryafashe umwanzuro wo guha ikipe ya APR FC igikombe cya shampiyona  y’ikiciro cya mbere muri uyu mwaka w’imikino wa 2019-2020.

Nk’uko tubikesha FERWAFA, uyu mwanzuro yatangajwe tariki 23 Gicurasi 2020  nyuma y’inama zitandukanye zagiye ziba hagati ya komite nyobozi ya FERWAFA ndetse n’abanyamuryango.

Uyu mwanzuro ufashwe  nyuma y’uko shampiyona ihagaritswe   muri Werurwe 2020 kubera icyorezo cya Koronavirusi cyuragije Isi. Iyi  shampiyona ya 2019-2020 ikaba  yari igeze ku munsi wayo wa 23.

Ikipe ya APR FC  nyuma y’imikino 23 ikaba yari iyoboye shampiyona n’amanota 57  aho yari itaratsindwa umukino n’umwe. Ku mwanya wa kabiri hari Rayon Sports n’amanota 50 naho ku mwanya wa 3 hazaka ikipe ya Police FC n’amanota 43.

Uretse ikipe ya APR FC yahawe igikombe cya shampiyona ya 2019-2020, ikipe ya Gicumbi FC yari iri ku mwanya wa 16 n’amanota 15 ndetse na Heroes FC yari iri ku mwanya wa 15 n’amanota 16 hemejwe ko zisubira mu kiciro cya kabiri.

Amakipe azazamuka mu kiciro cya  mbere

Nyuma y’aho Gicumbi FC na Heroes FC byemejwe ko zimanuka  mu kiciro cya 2, FERWAFA yafashe umwanzuro ko amakipe 4 ya mbere muri buri tsinda mu kiciro cya kabiri azakina imikino ya kamarampaka  “Play-offs” nk’uko byari bisanzwe bigenda aho imikino ihera muri ¼  na ½ hanyuma ikipe ebyiri zitwaye neza zikazamuka.

Shampiyona y’ikiciro cya kabiri   yahagaze harangiye imikino ibanza, bivuze ko amakipe 8 azahatanira itike yo kuzamuka mu kiciro cya mbere ari Rutsiro FC n’amanota 25, Gorilla FC (23), ASPOR Ltd (23) n’Intare FC  (18) zo mu itinda A naho mu itsinda B hakaba hari Etoile de l’est (23), Vision FC (18), Rugende FC (18)  na Rwamagana City FC (17). Igihe iyi mikino izabera bikaba bizatangazwa mu minsi iri imbere.

Shampiyona  y’ikiciro cy’abagore  izasubukurwa

Mu kiciro cy’abagore, shampiyona y’ikiciro cya  mbere n’icya kabiri muri uyu mwaka wa 2020 izasubukurwe  igihe imikino izaba isubukuwe muri rusange mu gihugu hose.

Irushanwa ry’igikombe cy’Amahoro 2020  ntirikibaye

Imikino y’igikombe cy’Amahoro 2020 yari igeze muri 1/8 ntikibaye. Ikipe ya AS Kigali ikaba ari yo yari igifite igikombe giheruka cya 2019.

FERWAFA kandi inatangaza ko amarushanwa y’abakiri bato mu byiciro bitandukye yari ateganyijwe uyu mwaka wa 2020  atakibaye.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.