Kigali-Rwanda

Mostly cloudy
22°C
 

Ciza aremeza ko Mukura iri mu makipe ahanganiye igikombe cya shampiyona

Yanditswe na Bizimana Eric

Ku ya 10-12-2018 saa 10:23:18
Kapiteni wa Mukura, Ciza Hussein uhamya ko bari mu makipe ahanganiye igikombe

Kapiteni wa Mukura, Ciza Hussein, aremeza ko ikipe ye iri mu makipe ahanganiye igikombe cya shampiyona cya 2018-2019.

Arabivuga mu gihe Mukura na APR FC ari zo kipe rukumbi zitaratakaza umukino n’umwe mu mikino bamaze gukina muri shampiyona.

Izi kipe zombi zikaba zigifitanye umukino w’ikirarane mu gihe kandi APR FC igomba gukina undi mukino wa shampiyona uzayihuza na Sunrise FC.

Ciza avuga ko kuba bafite amanota 16 mu mikino 6 ari ikerekana ko bari mu makipe ahanganiye igikombe.

Ati «Abakinnyi twamaze kumva ko Mukura yageze ku rundi rwego, turi ikipe ubu ihangana. Igikombe ni yo ntego yacu, gutwara shampiyona biva muri buri mikino. Turabizi ko gutwara shampiyona bisaba imbaraga, bisaba gukora cyane kuri buri mukino.»

Kapiteni wa Mukura, Ciza Hussein uhamya ko bari mu makipe ahanganiye igikombe

Myugariro wa Mukura, Iragire Saidi we ashimangira ko kuva batwara igikombe cy’Amahoro cya 2018 byabahaye ikizere cyo gutwara n’icya shampiyona.

Ati «Byanatweretse ko ikintu cyose gishoboka. Kiriya gikombe twagitwaye abantu badusuzugura bavuga ngo ntaho mwagera. Kuba twaratsinze aya makipe akomeye byatumye tubona ko na shampiyona twayitwara.»

Abakurikiranira hafi Mukura bahamya ko igifite ikibazo cy’ubusatirizi kuko nibura mu mikino itanu muri 6 iheruka gukina yose yatsinze ku gitego 1-0. Haringingo Francis, umutoza mukuru wa Mukura nawe akemeza ko icyangombwa ari insinzi.

Ati «Iyo dutsinda tukabona amanota atatu ntiwavuga ko hari ikibazo cy’ubusatirizi. Insinzi zose nta bwo ari ugutsinda ibitego bitandatu. Na kimwe ukibonye ni ibintu byiza. Ndabyemera tubona amahirwe menshi tugatsindamo make, kandi na byo ni ibintu bisanzwe mu mupira.»

Mukura VS ikaba yasabye ko umukino wari kuyihuza na Espoir FC tariki 11 Ukuboza 2018 wakurwaho kuko izaba igiye kwerekeza muri Sudani aho izakina na Al Hilal mu ijonjora rya kabiri mu mikino y’Afurika «Total CAF Confederation Cup 2018-2019».

Umwanditsi:

Bizimana Eric

Tanga Igitekerezo

Email yanyu ntigaragazwa ku rubuga. Amazina na Email ni ngombwa.