21°C , Mostly cloudy | Kigali-Rwanda

CIMERWA yungutse miriyari 16,5 mu mwaka wa 2020

Yanditswe na BUGINGO FIDELE

Ku ya 15-12-2020 saa 09:56:36
Uruganda wa CIMERWA rwungutse miriyari 16,5

Uruganda rukora sima mu Rwanda “CIMERWA PPC”  rwungutse  amafaranga angana na miriyari 16,5 mu mwaka wa 2020  iyi nyungu ikaba yariyongereyeho 1% ugereranyije n’umwaka  ushize wa 2019.

Ibi ni ibyatangajwe ku wa Mbere tariki 14 Ukuboza 2020 ubwo hamurikwaga raporo y’imari y’umwaka ya CIMERWA, umuhango wabereye muri Kigali Serena Hotel.

Nubwo uru ruganda rwamaze iminsi igera kuri 40 rudakora kubera icyorezo cya COVID-19, CIMERWA yasoje umwaka ihagaze neza kuko yabashije kugeza ku isoko sima ndetse ininjiza amafaranga yatumye isoza umwaka ihagaze neza mu mutungo.

Umuyobozi Mukuru ushinzwe imari “CFO”, Bugunya John  yatangaje ko amafaranga yinjiye yose ari miriyari 63,1 ariko hari amafaranga uruganda rukoresha  mu kugura ibikoresho byifashishwa mu gutunganya sima bituruka hanze y’u Rwanda, guhemba abakozi ndetse n’ayandi bishyura ababa babahaye serivise. Hari kandi amafaranga bishyura y’inguzanyo batse bubaka uruganda  rwarangiye muri 2015 ndetse n’ayishyurwa  Leta  ku misoro n’ibindi.

Bugunya avuga ko uru ruganda rwungutse miriyari 16,5 hataravamo imisoro ku byacurujwe bikaba bingana na 1% ugereranyije n’umwaka ushize wa 2019.

Agaruka ku musaruro w’uruganda muri uyu mwaka, Bugunya John   avuga ko babonye ubusabe bwa sima ku kigero kiri hejuru cyane kuko nubwo COVID-19 yababangamiye ariko uyu mwaka bakoze cyane kuko muri Nyakanga 2020 ari bwo uru ruganda rwagejeje ku isoko sima nyinshi mu mateka ingana na toni ibihumbi 55 mu gihe ubundi ku kwezi bacuruza iri hagati ya toni ibihumbi 40 na 45.

Ibi bikaba byaratewe ahanini n’uko muri iki gihe cya COVID-19 sima zavaga hanze zitabashaka kwinjira kandi hari hari imishinga myinshi ikeneye sima  harimo umushinga wo kubaka amashuri, imihanda n’ibindi.

Muri iyi gahunda yo kubaka amashuri, CIMERWA yatanze sima ingana na toni ibihumbi 80 mu gihe cy’amezi 3.

Umuyobozi Mukuru wa CIMERWA, Albert Sigei yashimiye abakozi, abafatanyabikorwa ndetse n’abakiriya anagaragaza ko uyu mwaka wari ugoye cyane ariko bagerageje kuziba icyuho. Yavuze ko bagerageje  gushyira mu byiciro Sima Nyarwanda “SURE RANGE” ndetse banashyira imigabane ku isoko ry’imari n’imigane.

Akomeza avuga ko mu rwego rwo guhangana n’ibihe bidasanzwe byatewe na COVID-19 bashyizeho ingamba zo gukomeza ubucuruzi no kunoza imikorere.

Uretse ibikorwa by’ubucuruzi, CIMERWA yatanze ubufasha muri iki gihe cya COVID-19  bungana na miriyoni 40 zo kugura ibiribwa, kubaka aho  abantu barara n’ibindi byifashishwa mu kwirinda no gukumira COVID-19. CIMERWA kandi yatanze  miriyoni 30 nk’inkunga mu mushinga wo kubaka ibyumba by’amashuri.

Intego z’umwaka wa 2021

Umuyobozi Mukuru wa CIMERWA, Albert Sigei  avuga ko bafite  ingamba zitandukanye zashyizweho kugira ngo bakurikirane  uko isoko rya sima ryaguka  mu Rwanda kandi biyemeje guha agaciro  abakiriya babo  no kunoza imikorere ku banyamigabane.

Ku bijyanye n’uko ubu mu Rwanda haje urundi ruganda rukora sima bikaba bishobora gutuma isoko rya CIMERWA rihungabana, Umuyobozi Mukuru  ushinzwe imari, Bugunya  avuga ko kuba uru ruganda rwa Prime Ciment ruri i Musanze rwaje babyishimiye kuko  ubu mu Rwanda Sima ikenewe ku isoko iri hagati ya toni ibihumbi 700 na 800 kandi CIMERWA muri uyu mwaka yashoboye gushyira ku isoko toni ibihumbi 481 ni ukuvuga nka 55% bivuze ko 45%  igomba kuva hanze.

Ati: “Niba rero hari umufatanyabikorwa uje  kudufasha kugabanya cya cyuho cya ya mafaranga yajyaga hanze gushaka sima turumva ari ikintu kiza cyane.”

Yakomeje avuga ko atari n’ibanga CIMERWA yafashije uru ruganda rushya kugira ngo rutangire aho babaha sima bubakishije uruganda rwabo ndetse n’ubundi bufasha  mu bya tekinike n’ibindi.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.