17°C , Partly sunny | Kigali-Rwanda

CHENO yasabye itangazamakuru gukoresha ikoranabuhanga mu kumenyekanisha amakuru y’ukuri

Yanditswe na Sezibera Anselme

Ku ya 16-01-2020 saa 19:47:14
Umunyamabanga Nshingwabikorwa wa CHENO Nkusi Deo hagati, ari kumwe n'Umunyamabanga Nshingwabikorwa wa MHC Mbungiramihigo Peacemaker (iburyo) mu kiganiro n'Itangazamakuru (Foto Mucyo)

Urwego rushinzwe Intwari z’Igihugu, Imidari n’Impeta by’ishimwe (CHENO) rurashishikariza itangazamakuru kongera ingufu mu gukoresha ikoranabuhanga ryerekeranye n’imbuga nkoranyambaga (Social Media) mu kumenyesha amakuru akenewe y’ukuri.

Ibyo byagarutsweho nyuma y’ibiganiro CHENO rwagiranye n’abahagarariye ibitangazamakuru kuri uyu wa 16 Mutarama 2020, mu rwego rwo kuganira kuri gahunda y’ibikorwa biteganyijwe mu kwizihiza umunsi w’Intwari 2020, n’ubufatanye bw’Urwego n’ibigo by’itangazamakuru mu kwizihiza uwo munsi mukuru.

Umunyamabanga Nshingwabikorwa warwo Nkusi Deo, arasaba itangazamakuru gukora neza kandi rikongera ingufu mu kugera ku bantu benshi bashoboka baba abari mu gihugu, ku Banyarwanda n’inshuti z’u Rwanda bari hanze y’u Rwanda.

Yagize ati: “Icyo dusaba murabona ko ikoranabuhanga ryazamutse ku rwego rwo hejuru, tukaba dusaba itangazamakuru gukoresha iryo koranabuhanga cyane nk’uburyo bushya bwo kugera ku bantu, rigashyira ingufu mu gukoresha imbuga nkoranyambuga kugira ngo Abanyarwanda bazikoresha bari no hanze y’igihugu, abanyamahanga bakurikira amakuru yo mu Rwanda babashe kumenya amakuru y’imvaho, y’ukuri aturutse aho agomba guturuka atari yayandi asebya, asenya ava hirya no hino”.

Nkusi abona ko ubushobozi bw’itangazamakuru bumaze kugaragara ko buzamuka buri munsi, bugeze ahashimishije kandi babwizera ariko hari ahagikenewe kongeramo imbaraga nko mu bijyanye n’ikoranabuhanga riganisha ku mbuga nkoranyambaga kugira ngo bifashe kugera kuri benshi kuko asanga hari byinshi bigisabwa gukora kandi intambwe ikiri ndende.

Nkusi kandi avuga ko u Rwanda rwizihiza umunsi w’Intwari kuva mu mwaka wa 1995, akavuga ko mu kwizihiza uwo munsi kuri iyi nshuro bazakomeza gukorana n’itangazamakuru ashima cyane ubufatanye bwaryo na CHENO, kugira ngo uwo murimo ukomeze ugende neza kandi intego igamijwe ibashe kugerwaho.

Avuga ko bijyanye n’inshingano z’itangazamakuru nk’urwego rubasha kugera ku bantu benshi, risabwa kumenyesha Abanyarwanda ibikorwa bihari kandi rikanarushaho kubakangurira kubyitabira bakabigira ibyabo.

Yagize ati: “Rifite n’inshingano ikomeye yo kwigisha umuco n’indangagaciro na kirazira by’umuco w’u Rwanda. Muri ibyo byose dufite n’indangagaciro ziranga ubutwari, ziranga Intwari z’u Rwanda, zubatse u Rwanda kandi zagiye zikura igihugu mu bizazane mu bihe bitandukanye by’amateka cyanyuzemo. Mu gihe cya vuba n’itangazamakuru ryagiye rigira uruhare rukomeye kandi rugaragara rutuma ibintu byose bigera ku bantu benshi kandi mu buryo bwiza busobanutse.

Itangazamakuru iyo rikoze neza igihugu kijya imbere kandi n’umuryango ukarushaho kwiyubaka, ryakora nabi nk’uko byagenze mu bihe byatambutse rigasenya umuryango. Twishimira ko uyu munsi itangazamakuru ry’u Rwanda rikorera mu mucyo, mu kuri, rigera ku bantu benshi kandi rikubaka umuryango mugari”.

Nkusi yijeje ubufatanye itangazamakuru muri gahunda z’iterambere, cyane cyane muri ibi bihe byo kwitegura umunsi mukuru w’Intwari, mu gihe cyo kuwizihiza ndetse no mu bindi bihe bizaza byose bigamije kubaka Umunyarwanda, kubaka igihugu n’umuryango mugari w’Abanyarwanda.

Avuga ko buri mwaka habaho igikorwa cyo gushima no gushimira kandi kigendana n’ubushakashatsi buba bwakozwe buri mwaka ariko kwemeza abazashyirwa mu kiciro runaka k’Intwari muri bitatu biri mu gihugu, hamwe n’abazahabwa impeta zitandukanye muri zirindwi zemejwe bigenda binyura mu nzego zemejwe zitandukanye.

Gusa agaragaza ko ku rwego rwa CHENO hari abantu bamaze gukoraho ubushakashatsi hanyuma batanga raporo mu nzego ziyikuriye zigomba gukora intambwe ikurikiraho.

Umunyamabanga Nshingwabikorwa w’Inama y’Igihugu y’Itangazamakuru Mbungiramihigo Peacemaker, avuga ko muri rusange abanyamakuru bamaze gusobanukirwa uruhare bafite mu guherekeza gahunda za Guverinoma n’abafatanyabikorwa bayo kugira ngo zimenyekane, Abanyarwanda bazigire izabo kandi babashe no kuzishyira mu bikorwa.

Ati: “Byumwihariko rero kubera ko twitegura kwizihiza umunsi w’Intwari, itangazamakuru ribigiramo uruhare, kubera ko rimaze gusobanukirwa uruhare rifite mu kumenyekanisha indangagaciro zaranze Intwari z’Igihugu, twifuza ko zarushaho kumenyekana, zikigishwa Abanyarwanda bakabigiramo uruhare by’umwihariko urubyiruko rubyiruka rukazigira izarwo kuko rugomba kuzimakaza mu burezi bahabwa  no mu mibereho yarwo”.

Mbungiramihigo avuga ko mu bushobozi itangazamakuru rifite risanzwe ribikora ariko hifuzwa ko birenga urwego biriho, kuko hari ibitangazamakuru birenga 160 bitandukanye, hakaba ubushobozi buke buhari, Leta kugira ngo yunganire itangazamakuru kugira ngo ribashe gukora ako kazi neza, ariko nk’Abanyarwanda agasanga itangazamakuru rigomba kugira umuco w’Ubutwari, wo kwigomwa, wo gutanga umusanzu waryo kugira ngo gahunda zitandukanye risanzwe rikora zibashe gutanga umusaruro.

Ashishikariza abahagarariye ibitangazamakuru byose gutanga umusanzu wabyo mu gutangaza amakuru ajyana n’ibiganiro na gahunda byose bizategurwa ku munsi w’Intwari birimo imikino, amarushanwa, ibiganiro bizatangwa hirya no hino mu mashuri kugira ngo Abanyarwanda bawitegure.

Mbungiramihigo avuga ko itangazamakuru uko rigenda rihabwa ubumenyi, rigahabwa urubuga mu kurushaho guhugurwa no kurushaho kugira ngo rimenye inshingano zaryo, biciye mu biganiro bikorwa, biciye mu itorero bakora mu byiciro 4 bimaze kwitabira bagenda barushaho kumva agaciro kabo n’inshingano bafite kandi ryifuzwaho gukomeza gutahiriza umugozi umwe n’izindi nzego hagamijwe kugirira Abanyarwanda akamaro mu byo rikora.

Ashima CHENO mu ngengo y’imari yayo itegura, ndetse agasanga n’izindi nzego zitegura gahunda zitandukanye abanyarwanda bagiramo uruhare zikwiye ingengo y’imari yo gufasha itangazamakuru kugira ngo rirusheho kwiyubaka no gutanga umusanzu waryo mu kubaka igihugu.

Tariki ya 01 Gashyantare buri mwaka, u Rwanda rwizihiza Umunsi w’Intwari z’Igihugu. Mu mwaka wa 2020, uwo munsi Mukuru uzaba wizihizwa ku nshuro ya 26, ukaba ari umunsi habaho kuzirikana no guha icyubahiro Intwari z’Igihugu n’ibikorwa by’ubutwari byaziranze.

Nta nsanganyamatsiko iratangazwa izagenderwaho mu kwizihiza uyu munsi w’Intwari kuri iyi nshuro kuko CHENO yatanze igitekerezo kuri Minisiteri nayo kandi igomba kubishyikiriza inama y’Abaminisitiri itegerejweho kuyemeza ikazaba ari yo ikoreshwa mu kwizihiza uwo munsi.

Umunyamabanga Nshingwabikorwa wa CHENO Nkusi Deo hagati, ari kumwe n’Umunyamabanga Nshingwabikorwa wa MHC Mbungiramihigo Peacemaker (iburyo) mu kiganiro n’Itangazamakuru (Foto Mucyo)

Umwanditsi:

Sezibera Anselme

Tanga Igitekerezo

Email yanyu ntigaragazwa ku rubuga. Amazina na Email ni ngombwa.