17°C , Thunderstorms | Kigali-Rwanda

CHAN 2020: Ikipe y’u Rwanda ifite intego yo gutsindira Ethiopia iwayo

Yanditswe na Bugingo Fidèle

Ku ya 21-09-2019 saa 19:03:44
Ubwo abakinnyi b'Amavubi bakoreraga imyitozo kuri Sitade Mekelle baza gukinira umukino ubanza wo gushaka itike ya CHAN 2020

Ethiopia-Rwanda (Mekelle-15h00)

Kuri iki Cyumweru tariki 22 Nzeri 2019 ni bwo ikipe y’u Rwanda “Amavubi” iza gukina n’ikipe y’igihugu ya Ethiopia mu mukino ubanza wo gushaka itike y’imikino ya nyuma y’Afurika y’amakipe y’ibihugu mu bakinnyi bakina imbere mu gihugu “CHAN 2020”.

Uyu mukino urabera kuri Sitade Mekelle saa kumi (16h00) zo muri Ethiopia akaba ari saa kenda mu Rwanda (15h00). Abasifuzi bakomoka muri Kenya ni bo bari buyobore uyu mukino aho umusifuzi wo hagati ari Anthony Ogwayo akaba yungirijwe na Gilbert Kipkoech Cheruiyot na Tony Kidiya. Umusifuzi wa 4 ni Ogenche Omweno naho komiseri w’umukino ni Amir Osman Mohamed Hamid ukomoka muri Sudani.

MBERE YO GUKINA NA ETHIOPIA, AMAVUBI YATSINZE RDC

Tariki 18 Nzeri 2019, ikipe y’u Rwanda “Amavubi” yakinnye na RDC umukino wa gicuti wabereye i Kinshasa. Ikipe y’u Rwanda yitwaye neza itsinda RDC ibitego 3-2 byatsinzwe na Manzi Thierry, Sugira Ernest na Nsabimana Eric.

Nyuma y’uyu mukino ikipe y’u Rwanda yahise yerekeza muri Ethiopia aho tariki 20 Nzeri 2019 baraye mu mujyi wa Mekelle ahaza kubera umukino wa Ethiopia.

Ubwo bari bamaze gukora imyitozo ya mbere, kapiteni w’ikipe y’u Rwanda, Ndayishimiye Eric “Bakame” yatangaje ko imyiteguro imeze neza ko biteguye kwitwara neza. Yakomeje avuga ko kwitwara neza ku mukino wa RDC byabongereye imbaraga ko gahunda ari ugutsindira Ethiopia iwayo kugira ngo bizere kuzabona itike ya CHAN 2020.

Umutoza mukuru w’ikipe y’u Rwanda, Mashami Vincent yatangaje ko n’ubwo abakinnyi bakoze urugendo rutari rugufi bose bameze neza igisigaye ari ugukina kandi bakitwara neza kuko bafite morari iri hejuru.

ETHIOPIA N’U RWANDA BIFITANYE AMATEKA

Ubusanzwe gushaka itike ya CHAN bibera mu bice ni ukuvuga mu gice cy’Afurika y’u Burasirazuba, Amajyepfo, u Burengerazuba n’ahandi. Muri iki gice cy’ Afurika y’u Burasirazuba, si ubwa mbere ikipe y’u Rwanda igiye guhatanira itike ya CHAN na Ethiopia

Mu gushaka itike ya CHAN 2014, tariki 14 Nyakanga 2013 ikipe ya Ethiopia yatsinze u Rwanda mu mukino ubanza wabereye muri Ethiopia igitego 1-0. Umukino wo kwishyura wabereye i Kigali, ikipe y’u Rwanda nayo itsinda igitego 1-0.

Kuko izi kipe zari zinganyije igitego 1-1 mu mikino yombi hitabajwe penariti maze Ethiopia yinjiza 6 kuri 5 z’u Rwanda, Ethiopia iba ibonye itike yo kwitabira CHAN 2014 yebere muri Afurika y’Epfo.

Mu gushaka itike ya CHAN 2018, ikipe y’u Rwanda yari yasezerewe na Uganda mu kiciro cya nyuma cyo kubona itike ya CHAN 2018 ariko kuko Kenya yagombaga kwakira irushanwa ikaryamburwa rikajya kubera muri Maroc byabaye ngombwa ko ikipe y’u Rwanda na Ethiopia zihatanira itike yo gusimbura Kenya yo itari yarakinnye imikino y’amajonjora.

Tariki 05 Ugushyingo 2017, ikipe y’u Rwanda “Amavubi” yatsindiye Ethiopia iwayo ibitego 3-2 hanyuma umukino wo kwishyura wabereye mu Rwanda tariki 12 Ugushyingo 2017, ikipe y’u Rwanda inganya na Ethiopia 0-0 birangira ikipe y’u Rwanda  ibonye itike ya CHAN 2018 yabereye muri Maroc.

KIMENYI NA NIYONZIMA NTA BWO BAKINA UMUKINO WA ETHIOPIA

Ikipe y’u Rwanda yajyanye abakinnyi 23 gusa muri aba harimo babiri bataza gukina umukino wa Ethiopia nyuma y’aho bagize ibibazo mu myirondoro yabo bishingiye ku myaka y’amavuko yabo.

Aba ni Niyonzima Haruna usanzwe ari kapiteni w’ikipe y’igihugu ndetse na Kimenyi Yves, umunyezamu w’ikipe ya Rayon Sports akaba nawe ubu ari we wari ufite umwanya wa mbere mu ikipe y’igihugu.

Kuba aba bakinnyi rero bataza kugaragara muri uyu mukino, umutoza Mashami agomba gukora impinduka dore ko aba bakinnyi bombi bari babanje mu kibuga mu mukino wa gicuti na RDC aho Haruna Niyonzima yanitwaye neza atanga imipira ibiri yavuyemo ibitego

ABAKINNYI UMUTOZA ASHOBORA KUBANZAMO

Mu izamu: Ndayishimiye Eric Bakame
Myugariro: Manzi Thierry, Mutsinzi Ange, Fitina Ombolenga na Imanishimwe Emmanuel
Hagati: Nsabimana Eric, Niyonzima Olivier Sefu, Nshimiiyimana Amran na Iranzi Jean Claude
Rutahizamu: Minishimwe Djabel na Sugira Ernest.

Ikipe y’u Rwanda imaze kwitabira iri rushanwa inshuro 3 harimo CHAN 2011 bwari ubwa mbere iyi kipe yitabiriye akaba yari inshuro ya kabiri iri rushanwa ribaye kuko ryatangiye gukinwa muri 2009. Muri 2016, ikipe y’u Rwanda yakinnye irushanwa ryari ryabereye mu Rwanda ndetse inagera muri ¼ mu gihe muri 2018 yaviriyemo mu majonjora.

Iri rushanwa rya CHAN 2020  biteganyijwe ko rizabera muri Cameroun mu mpera za Mutarama 2020. Ubundi iyi mikino yagomba kubera muri Ethiopia ariko iki gihugu cyamburwa iri rushanwa kubera imyiteguro itarimo igenda neza.

CHAN yatangijwe n’impuzamashyirahamwe y’umupira w’amaguru muri Afurika “CAF” muri 2009 mu rwego rwo gufasha abakinnyi bakina imbere mu gihugu kubona amarushanwa. Ikipe y’igihugu ya RDC ni yo imaze kwegukana iki gikombe inshuro nyinshi 2 (2009 na 2016), Tunizia (2011), Libya (2014) na Maroc (2018).

Umwanditsi:

Bugingo Fidèle

Tanga Igitekerezo

Email yanyu ntigaragazwa ku rubuga. Amazina na Email ni ngombwa.