Kigali-Rwanda

Partly cloudy
18°C
 

CECAFA Kagame Cup 2019: Rayon Sports iri mu itsinda rimwe na TP Mazembe

Yanditswe na BUGINGO FIDELE

Ku ya 21-06-2019 saa 21:06:07
Ikipe ya Rayon Sports ni yo izafungura imikino ya CECAFA Kagame Cup 2019 ikina na TP Mazembe yo muri RDC

Ikipe ya Rayon Sports yo mu Rwanda ikaba yeregukanye igikombe cya shampiyona ya 2018-2019 iri mu itsinda A hamwe n’ikipe ya TP Mazembe yo muri RDC mu irushanwa ry’amakipe yo mu karere k’Afurika y’Uburasirazuba “CECAFA Kagame Cup 2019”.

Iri rushanwa  riterwa inkunga na Perezida w’u Rwanda, Paul Kagame rizatangira tariki  6 risozwe tariki 21  Nyakanga 2019 aho ryitabiriwe n’amakipe 16 akaba agabanyije mu matsinda 4.

Itsinda A ririmo ikipe ya Rayon Sports (Rwanda), TP Mazembe (RDC), Atlabara (Sudani)  na KMC (Tanzania), imikino yo muri iri tsinda izabera i Kigali. Itsinda B ririmo Azam FC (Tanzania) inafite igikombe giheruka, Mukura (Rwanda), Bandari FC (Kenya) na KCCA (Uganda), imikino izabera i Huye.

Itsinda C ririmo ikipe ya APR FC (Rwanda), Green Buffaloes (Zambia), Proline FC (Uganda) na Heegan FC (Somalia), imikino izabera i Kigali. Itsinda D rigizwe n’ikipe ya Gor Mahia (Kenya), DCMP (RDC), KMKM (Zanzibar) na AS Ports FC (Djibouti).

Rayon Sports na TP Mazembe ni zo zizafungura irushanwa

Ubwo iri rushanwa rizaba ritangira, tariki 06 Nyakanga 2019, ikipe ya Rayon Sports yo mu Rwanda izakina na TP Mazembe, umukino uzabera kuri Sitade Amahoro i Remera.

Iyi kipe ya TP Mazembe yaje muri iri rushanwa nk’ikipe yatumiwe yaherukaga kwitabira imikino ya CECAFA Kagame Cup muri 2010  ariko ntiyarisoje nyuma yo gukurwa mu irushanwa kubera imyitwarire mibi y’abakinnyi bayo basagariye umusifuzi mu mukino iyi kipe yakinaga na APR FC aho zari mu itsinda rimwe A hamwe na Vitalo FC (Burundi) na Telkom (Djibouti).

Iri rushanwa  ryaherukaga kubera mu Rwanda muri 2014 ubwo ryegukanwaga n’ikipe ya Al-Merrikh yo muri Sudani  itsinze ku mukino wa nyuma ikipe ya APR FC igitego 1-0.

Muri 2018 ubwo iri rushanwa riheruka  ryabereye muri Tanzania, ikipe ya Azam FC yo muri Tanzania yegukana igikombe  itsinze Simba FC ibitego 2-1.

Ikipe ya Rayon Sports ni yo izafungura imikino ya CECAFA Kagame Cup 2019 ikina na TP Mazembe yo muri RDC

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.