Kigali-Rwanda

Mostly cloudy
21°C
 

CECAFA Kagame Cup 2019 izabera mu Rwanda muri Nyakanga 2019

Yanditswe na BUGINGO FIDELE

Ku ya 23-05-2019 saa 17:56:06
Azam FC ubwo yashyikirizwaga igikombe cya CECAFA Kagame Cup 2018 yari itwaye ku nshuro ya kabiri yikurikiranya

Irushanwa rihuza amakipe yo muri aka karere k’Afurika y’Uburasirazuba rikaba riterwa inkunga na Perezida w’u Rwanda, Paul Kagame “CECAFA Kagame Cup 2019” byamaze kwemezwa ko rizabera mu Rwanda kuva tariki 07 kugeza 21 Nyakanga 2019.

Iri rushanwa ubushize ryari ryarabereye Dar es Salaam muri Tanzania. Mu Rwanda ryaherukaga kuhabera muri 2014 ubwo ryegukanwaga n’ikipe ya Al-Merrikh yo muri Sudani itsinze ku mukino wa nyuma ikipe ya APR FC igitego 1-0 cyatsinzwe na Allan Wetende Wanga.

Muri iri rushanwa hari hitabiriye amakipe y’u Rwanda 3 ariyo APR FC, Rayon Sports na Police FC. Nyuma y’uko APR FC yatsindiwe ku mukino wa nyuma, Police FC yaje ku mwanya wa 3 naho Rayon Sports ikaba yaviriyemo muri ½ itsinzwe na APR FC kuri panaliti 4-3 nyuma yo kunganya ibitego 2-2.

Uyu mwaka wa 2019 iri rushanwa rizaba harimo gukinwa imikino y’Afurika “CAN 2019” bikaba bishobora kugora cyane amakipe yo muri aka karere cyane cyane afite abakinnyi mu ikipe y’igihugu kuko Uganda, Kenya, Tanzania ndetse n’u Burundi zose zizaba ziri muri CAN 2019 izabera mu Misiri kuva tariki 21 Kamena kugeza 19 Nyakanga 2019.

Ubwo iri rushanwa riheruka kuba muri 2018 ryabereye Dar es Salaam muri Tanzania aho u Rwanda rwari ruhagarariwe n’ amakipe 2, APR FC na Rayon Sports. Ikipe ya APR FC yaviriye mu majonjora aho yari mu itsinda C hamwe na Simba SC, Singida United (Tanzania) na Dekedaha (Somalia).

Ikipe ya Rayon Sports yo yari mu itsinda B hamwe na Gor Mahia (Kenya), AS Port (Djibouti) na LLB (Burundi). Iyi kipe yazamutse ari iya kabiri mu itsinda muri ¼ isezererwa na Azam FC yo muri Tanzania ku bitego 4-2.

Iyi kipe ya Azam FC akaba ari nayo yegukanye igikombe cya CECAFA Kagame Cup 2018 itsinze ku mukino wa nyuma Simba SC zombi akaba ari izo muri Tanzania ku bitego 2-1. Ikipe ya Gor Mahia ni yo yasoje ku mwanya wa 3 itsinze JKU yo muri Zanzibar ibitego 2-0.

Ikipe yegukanye igikombe ihabwa sheki y’ibihumbi 30 by’amadorali y’Amerika, iya kabiri igahabwa ibihumbi 20 naho iya gatatu igatahana ibihumbi 10 . Aya mafaranga y’ibihembo ku makipe angana n’ibihumbi 60 by’amadorali atangwa na Perezida w’u Rwanda, Paul Kagame kuva muri 2002.

Azam FC ubwo yashyikirizwaga igikombe cya CECAFA Kagame Cup 2018 yari itwaye ku nshuro ya kabiri yikurikiranya

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.