Kigali-Rwanda

Mostly cloudy
19°C
 

CECAFA Kagame Cup 2019: Imikino igeze muri  ½ k’irangiza

Yanditswe na BUGINGO FIDELE

Ku ya Jul 19, 2019

KCCA FC-Green Eagles (Stade de Kigali-15h00)

Azam FC-AS Maniema (Stade de Kigali 18h00)

Kuri uyu wa Gatanu tariki 19 Nyakanga 2019 nibwo hakinwa imikino ya ½ k’irangiza mu irushanwa ry’amakipe mu Karere k’Afurika y’Uburasizazuba   “CECAFA Kagame Cup 2019” ririmo kubera mu Rwanda kuva tariki 06 Nyakanga 2019.

Ikipe ya KCCA yo muri Uganda irakina na Green Eagles yo muri Zambia, umukino ubere kuri Sitade ya Kigali i Nyamirambo saa kenda (15h0).  Nyuma y’uyu mukino, ikipe ya Azam FC yo muri Tanzania  irakina na AS Maniema yo muri RDC, umukino nawo urabera kuri Sitade ya Kigali i Nyamirambo  saa kumi n’ebyiri (18h00).

Uko izi kipe zageze muri ½ k’irangiza

Mu mikino ya ¼ yabaye tariki 16 Nyakanga 2019, ikipe ya KCCA yasezereye Rayon Sports mu Rwanda ku bitego 2-1. Ibitego bya KCCA byatsinzwe na  Kiiza Mustafa (33’) na Jackson Nunda (66’) naho igitego cya Rayon Sports gitsindwa na Rugwiro Herve.

Ikipe ya Azam FC yageze muri ½ isezereye TP Mazembe yo muri RDC iyitsinze ibitego 2-1. Ikipe  ya TP Mazembe ni yo yafunguye amazamu ku gitego cyatsinzwe na Ipamy Giovanni ku munota wa 21 nyuma y’iminota 6, Azam FC yishyuye iki gitego gitsinzwe na Selman Iddi.  Mu gice cya kabiri, Azam FC yatsinze igitego cya kabiri cyabonetse ku munota wa 69 gitsinzwe na Obrey Chirwa akaba ari nako umukino warangiye.

Tariki 17 Nyakanga 2019  habaye indi mikino 2 ya ¼ , aho ikipe ya Gor Mahia yo muri Kenya  yari yageze muri ½ umwaka ushize wa 2018   yasezerewe na  Green Eagles yo muri Zambia iyitsinze ibitego 2-1. Green Eagles yatsindiwe na Tapson Kaseba  na Mulungwe Shadrackh naho igitego cya Gor Mahia gitsindwa na Kipkirui Nicholas.

Mu wundi mukino, ikipe ya APR FC yo mu Rwanda yari yazamutse iyoboye itsinda C yanganyije na AS Maniema yo muri RDC 0-0 hitabajwe penariti, AS Maniema yinjiza 4 kuri 3 za APR FC.

Amakipe aza kwitwara neza muri iyi mikino ya ½ agomba gukina umukino wa nyuma uteganyijwe tariki 21 Nyakanga 2019 gusa mbere y’umukino wa nyuma ikipe zatsinzwe nazo zigomba guhatanira umwanya wa 3.

Iri rushanwa rya CECAFA riterwa inkunga na Perezida w’u Rwanda, Paul Kagame kuva muri 2002 aho atanga ibihumbi 60 y’amadorari y’Amerika avamo ibihembo bihabwa amakipe.

Ikipe ya mbere ihabwa igikombe n’ibihumbi 30 by’amadorari, iya kabiri igahabwa ibihumbi 20 naho iya 3 igahabwa ibihumbi 10.

Ikipe ya KCCA ubwo yari imaze gusezera ikipe ya Rayon Sports