Kigali-Rwanda

Partly cloudy
22°C
 

CECAFA Kagame Cup 2019: Ikipe ya Rayon Sports  na TP Mazembe zaviriyemo muri ¼

Yanditswe na BUGINGO FIDELE

Ku ya Jul 16, 2019

TP Mazembe 1-2 Azam FC

KCCA 2-1 Rayon Sports

Tariki 17-07-2019

Gor Mahia-Green Eagles (Nyamirambo-16h00)

APR FC-AS Maniema (Nyamirambo-18h30)

Ikipe ya Rayon Sports na TP Mazembe zari mu itsinda A   ntabwo  zabashije kugera muri ½ k’irangiza  mu mikino ya CECAFA Kagame 2019 irimo kubera mu Rwanda kuva tariki 06 Nyakanga 2019.

Mu mikino ya ¼   yabaye kuri uyu wa Kabiri tariki 16 Nyakanga 2019 kuri Sitade ya Kigali i Nyamirambo,  ikipe ya TP Mazembe yabaye iya mbere mu itsinda A  yakinnye  Azam FC yabaye iya kabiri mu itsinda B. Iyi kipe ya Azam FC ifite iki gikombe  inshuro ebyiri ziheruka  (2017 na 2018) yitwaye neza itsinda TP Mazembe ibitego 2-1.

Ikipe  ya TP Mazembe ni yo yafunguye amazamu ku gitego cyatsinzwe na Ipamy Giovanni ku munota wa 21 nyuma y’iminota 6, Azam FC yishyuye iki gitego gitsinzwe na Selman Iddi.  Mu gice cya kabiri, Azam FC yatsinze igitego cya kabiri cyabonetse ku munota wa 69 gitsinzwe na Obrey Chirwa akaba ari nako umukino warangiye.

Umukino wa kabiri, ikipe ya Rayon Sports yaviriyemo muri ¼ muri CECAFA Kagame Cup umwaka ushize wa 2018 n’uyu mwaka wa 2019  yongeye kuviramo muri ¼ itsinzwe n’ikipe ya KCCA yo muri Uganda ku bitego 2-1. Ibitego bya KCCA byatsinzwe na  Kiiza Mustafa (33’) na Jackson Nunda (66’) naho igitego cya Rayon Sports gitsindwa na Rugwiro Herve.

Kuri uyu wa Gatatu tariki 17 Nyakanga 2019  haraba indi mikino ya ¼ k’irangiza    aho ikipe ya Gor Mahia yo muri Kenya  yazamutse iyoboye itsinda D igomba  gukina  na  Green Eagles yo muri Zambia  yazamutse ari iya kabiri mu itsinda C naho ikipe ya APR FC yazamutse iyoboye itsinda C ikine  na AS Maniema yo muri RDC yazamutse  ari iya kabiri mu itsinda D.

Muri ½ k’irangiza, ikipe izakomeza hagati ya APR FC na AS Maniema izahura na Azam FC naho ikipe izakomeza hagati Gor Mahia na Green Eagles ihure na KCCA.

Ubwo ikipe ya TP Mazembe yakiniga na Azam FC

Abakinnyi ba Azam FC mu byishimo nyuma yo gusezerera ikipe ya TP Mazembe

Ikipe ya Rayon Sports yabanjemo

Abakinnyi babanjemo ku ruhande rwa KCCA

Rutahizamu wa Rayon Sports, Ulimwengu Jules  ahanganye na myugariro wa KCCA,Peter Magambo

Abakinnyi ba KCCA bishimira gukomeza muri 1/2