Kigali-Rwanda

Mostly cloudy
19°C
 

CECAFA 2018 : Ikipe  y’u Rwanda iratangira ikina na Tanzania

Yanditswe na BUGINGO FIDELE

Ku ya Jul 19, 2018

Uyu munsi
Kenya-Uganda (Nyamirambo-14h00)
Rwanda-Tanzania (Nyamirambo-16h15)

Uyu munsi tariki 19 Nyakanga 2018 ni bwo hatangira imikino ya CECAFA  mu kiciro cy’Abagore. Ikipe y’u Rwanda  ikaba  itangira iri rushanwa ikina na Tanzania yegukanye irushanwa riheruka.

Mu mikino ya CECAFA iheruka muri 2016, Tanzania yatsinze u Rwanda ibitego 3-2

Iyi mikino ya CECAFA yaherukaga kuba muri Nzeri 2016 aho yabereye muri Uganda. Uyu mwaka wa 2018 ikaba igiye kubera mu Rwanda ikazakinirwa kuri Sitade ya Kigali i Nyamirambo.

Umukino ufungura iri rushanwa  urahuza ikipe ya Kenya na Uganda (14h00).  Ubwo iri rushanwa riheruka kuba  muri 2016, Kenya na Uganda zari mu itsinda A, Kenya ikaba yaratsinze Uganda ibitego 4-0 mu mukino wo mu itsinda. Iyi kipe ya Kenya ikaba yaritwaye neza igera ku mukino wa nyuma utsindwa na Tanzania ibitego  2-1.

Nyuma y’umukino wa mbere wa CECAFA 2018,  ikipe y’u Rwanda irakina na Tanzania (16h15). Uyu mukino nta bwo uzaba kuba woroshye dore ko ikipe y’u Rwanda iza kuba iri mu rugo. Izi kipe muri 2016 zari mu itsinda rimwe rya kabiri (B) aho umukino wa mbere mu itsinda Tanzania yatsinze u Rwanda ibitego 3-2.  Iyi kipe ikaba ari nayo yegukanye igikombe itsinze Kenya ku mukino wa nyuma.

Kapiteni w’ikipe y’u Rwanda, Nibagwire Sifa akaba atangaza ko  bagomba gukora ibishoboka byose  bakitwara neza kuko biteguye bihagije.

Ikipe y’u Rwanda ikaba isabwa gutsinda umukino ufungura kugira ngo yizere kuko yaza mu makipe ahabwa amahirwe yo kwegukana igikombe.

Nk’uko tubikesha ishyirahamwe ry’umupira w’amaguru  mu Rwanda «FERWAFA»,  iri rushanwa ryitabiriwe n’amakipe 5 akaba azakina hagati yayo hanyuna ikipe ya mbere yegukane igikombe.

 

Muri FERWAFA  kandi barakangurira abakunzi b’umupira w’amaguru n’Abanyarwnada muri rusange gushyikira ikipe y’u Rwanda kuko kwinjira kuri iyi mikino yose  ari ubuntu. CECAFA 2018  izasozwa tariki 27 Nyakanga 2018.