Kigali-Rwanda

Partly cloudy
19°C
 

CECAFA 2018 : Ikipe y’igihugu y’Abagore   yiteguye kwitwara neza

Yanditswe na BUGINGO FIDELE

Ku ya Jul 18, 2018

 

Tariki 19-07-2018
Kenya-Uganda (Nyamirambo-14h00)
Rwanda-Tanzania (Nyamirambo-16h15)

Tariki 21-07-2018
Ethiopia-Uganda (Nyamirambo-14h00)
Kenya-Tanzania (Nyamirambo-16h15)

Tariki 23-07-2018
Uganda-Tanzania (Nyamirambo-14h00)
Rwanda-Ethiopia (Nyamirambo-16h15)

Tariki  25-07-2018
Kenya-Ethiopia (Nyamirambo-14h00)
Uganda-Rwanda (Nyamirambo 16h15)

Tariki 27-07-2018
Ethiopia-Tanzania (Nyamirambo-14h00)
Rwanda-Tanzania (Nyamirambo-16h15)

Kuva ejo tariki 19 Nyakanga 2018 hazatangira  imikino ya CECAFA  mu kiciro cy’abagore «CECAFA Women Challenge Cup 2018». Iyi mikino yari iteganyijwe muri Gicurasi 2018 iza kwimurirwa muri Nyakanga 2018 kubera ikibazo cy’amikoro.

Umutoza w’ikipe y’igihugu y’abagore , Kayiranga Baptiste (ibumoso) na kapiteni w’iyi kipe Nibagwire Sifa (iburyo)

Visi Perezida w’ishyirahamwe ry’umupira w’amaguru mu Rwanda «FERWAFA», Habyarimana Marcel yatangaje ko iri rushanwa ryari kwitabirwa n’amakipe 8 ariko 3 aza gutangaza ko atazitabira. Muri aya makipe 5 azitabira arimo u Rwanda, Uganda, Kenya, Ethiopia na Tanzania yegukanye igikombe  k’irushanwa riheruka  muri 2016.

Habyarimana avuga ko aya makipe azakina hagati yayo, imikino ikazajya ibera kuri Sitade ya Kigali i Nyamirambo kuva ejo tariki 19 kugeza 27 Nyakanga 2018. Izi kipe zikajya zikorera imyitozo kuri Sitade ya Kicukiro no ku Mumena.

Visi Perezida wa FERWAFA  akomeza avuga ko basabye ikipe y’u Rwanda  guharanira ishema ry’igihugu bakitwara neza.

Ikipe y’igihugu bafite ikizere cyo kwitwara neza

Umutoza mukuru w’ikipe y’igihugu y’Abagore, Kayiranga Baptiste atangaza ko n’ubwo bari batangiye kwitegura irushanwa rikaza gusubikwa ubu ikipe imaze iminsi yitegura  kandi ubu bahagaze neza bakaba batanga n’ikizere cyo kwitwara neza.

Kapiteni w’ikipe y’igihugu, Nibagwire Gloria Sifa nawe yashimangiye ko we na bagenzi be intego bafite ari ukwitwara neza bakegukana igikombe cya CECAFA 2018. Yagize ati «Abayobozi  ndetse n’abatoza bakoze ibyo basabwa byose ahasigaye ni ahacu kandi turiteguye kuko  turashaka kwereka ko  natwe dushoboye». Nibagwire akomeza asaba Abanyarwanda  ko bazaza ari benshi bakabashyigikira kandi ko biteguye kubashimisha.

Imikino ya CECAFA mu kiciro cy’abagore ni inshuro ya  gatatu  igiye kuba. Mu 1986 yabereye muri Zanzibar  mu 1986 yegukanwa na Zanzibar. Yongeye kuba muri 2016 yegukanwa  na Tanzania.