Kigali-Rwanda

Partly cloudy
19°C
 

CECAFA 2018 :  APR FC  irakina na Simba SC mu mikino wa kabiri mu itsinda

Yanditswe na BUGINGO FIDELE

Ku ya Jul 2, 2018

Uyu munsi

Singida-Dakadaha (13h00)

Simba SC-APR FC (15h00)

Imikino yabaye

Rayon Sports 2-2 Gor Mahia

JKU 2-0 Kator FC

Vipers 1-1 Azam FC

Imikino ya CECAFA Kagame Cup 2018 iri kubera muri Tanzania irakomeje hakinwa imikino yo matsinda. Uyu munsi tariki 02 Nyakanga 2018 haraba imikino yo mu itsinda C aho ikipe ya Singida United ikina na Dakadaha  yo muri Somalia naho Simba SC nayo yo muri Tanzania igakina na APR FC  yo mu Rwanda.

Ikipe ya Singida United  umukino wa mbere mu itsinda yitwaye neza dore ko yatsinze APR FC yo mu Rwanda  ibitego 2-1.  Ku mukino w’uyu munsi  irasabwa gutsinda igahita inakatisha itike ya ¼ k’irangiza.

Ku rundi ruhande, ikipe ya Simba SC , umukino ubanza nayo yitwaye neza itsinda Dakadaha yo muri Somalia ibitego 4-0.  Umukino w’uyu munsi ntabwo uza kuba woroshye kuko ikipe ya APR FC  yifuza gutsinda uyu mukino nyuma yo gutakaza umukino wa mbere.

Rayon Sports yanganyije na Gor Mahia

Ikipe ya Rayon Sports yo mu Rwanda na Gor Mahia yo muri Kenya zikaba ziri mu itsinda B ejo hashize tariki 01 Nyakanga 2018 zakinnye umukino wa mbere mu itsinda birangira zinganyije ibitego 2-2.

Gor Mahia na Rayon Sports zanganyije ibitego 2-2

Muri uyu mukino, ikipe ya Gor Mahia niyo yabanje kubona ibitego 2  byatsinzwe na  Tuyisenge Jacques ku munota wa 33 ndetse na Humphrey Mieno ku munota wa 40. Mu gice cya kabiri, ikipe ya Rayon Sports  yakoze akazi gakomye  maze ku munota wa  64 Ismailla Diarra atsinda igitego kuri penaliti naho ku munota wa 88, Kwizera Pierrot  atsindira  Rayon Sports  igitego cya kabiri cyo kwishyura umukino urangira ari ibitego 2-2.

Muri iri tsida imikino izakomeza  ejo tariki 03 Nyakanga 2018, Rayon Sports ikina na Ports yo muri Djibouti naho Gor Mahia ikine na LLB y’i Burundi. Ikipe ya Ports ikaba yaratsinze  LLB mu mukino ubanza 2-1. Iyi kipe akaba ari nayo iyoboye itsinda n’amanota 3 hagakurikiraho Gor Mahia na Rayon Sports zifite inota rimwe.

Imikino yindi yabaye ni iyo mu itsinda A aho ikipe  ya JKU yo muri Zanzibar yatsinze  Kato FC yo muri Sudani y’Amajepfo  ibitego 2-0 naho  Vipers FC yo muri Uganda   inganya na Azam FC yo muri  Tanzania igitego 1-1, Daniel Muzeyi  Sserunkuma ni we watsindiye Vipers FC naho Shaban Iddi atsindira ikipe ya Azam FC.