19°C , Intermittent clouds | Kigali-Rwanda

CAN 2021: Ikipe y’u Rwanda yerekeje muri Mozambique ifite intego yo gutsinda

Yanditswe na BUGINGO FIDELE

Ku ya 11-11-2019 saa 08:29:30
Ubwo ikipe y'u Rwanda yari ihagurutse mu Rwanda yerekeje

Tariki 14-11-2019

Mozambique-Rwanda (Maputo)

Mu rukerera  rwo kuri uyu wa mbere tariki 11 Ugushyingo  2019 ni bwo  ikipe y’igihugu “Amavubi” yahagurutse mu Rwanda yerekeje i Maputo muri Mozambique aho yagiye gukina umukino ubanza mu mikino y’amajonjora yo gushaka itike  ya CAN 2021.

Uyu mukino uzabera kuri Sitade Zimpeto mu mujyi wa Maputo, saa kumi n’ebyiri z’umugorora (18h00) i Maputo n’i Kigali.

Ikipe y’u Rwanda iri mu itsinda F hamwe  na Cameroun, Mozambique na Cap Vert. Muri iri tsinda mbere y’umukino wa Mozambique n’Amavubi, tariki 13 Ugushyingo 2019, ikipe ya Cameroun izakira Cap Vert.

Mbere yo guhaguruka mu Rwanda berekeza muri Mozambique, umutoza mukuru w’ikipe y’igihugu, Mashami Vincent yavuze ko imyiteguro yagenze neza  ko bagiye muri Mozambique bafite intego yo gutsinda.

Iyi ni inshuro ya kabiri ikipe y’u Rwanda igiye gukina na Mozambique mu gushaka itike ya CAN. Mu gushaka itike ya CAN 2017  izi kipe zarahuye aho ikipe y’u Rwanda yatsindiye Mozambique iwayo igitego 1-0 naho umukino wo kwishyura Mozambique nayo igatsinda u Rwanda ibitego 3-2.

Abakinnyi 23 bazifashishwa ku mukino wa Mozambique

Umutoza Mashami Vincent yari yahamagaye abakinnyi 27 barimo 11 bakina hanze y’u Rwanda na 16 bakina imbere mu gihugu. Muri aba bakinnyi  yatoranyijemo 23 akaba ari bo azatoranyamo abo azakinisha.

Abakinnyi 22 ni bo bahagurutse mu Rwanda berekeza muri Mozambique aho bagomba guhurira na Bizimana Djihad ukina mu Bubiligi  wavuye mu Bubiligi yerekeza muri Mozambique.

Abanyezamu:  Ndayishimiye Eric (AS Kigali), Kimenyi Yves (Rayon Sports) na  Mvuyekure Emery (Tusker FC, Kenya).

Myugariro: Manzi Thierry, Fitina Omborenga, Imanishimwe Emmanuel, Mutsinzi Ange (APR FC), Rutanga Eric (Rayon Sports), Bayisenge Emery (Saif SC, Bangladesh), Rwatubyaye Abdul (Colorado Rapids, USA)   na  Nirisarike Salomon (Pyunik FC, Armenia).

Hagati:  Niyonzima Haruna, Nsabimana Eric (AS Kigali), Iranzi Jean Claude (Rayon Sports), Niyonzima Olivier (APR FC), Muhire Kevin (Misr El Makkasa, Misiri) na Bizimana Djihad (Waasland Beveren, Belgium).

Rutahizamu: Mico Justin, Iyabivuze Osée (Police FC), Kagere Meddie (Simba SC, Tanzania), Tuyisenge Jacques (Pétro Atletico, Angola), Hakizimana Muhadjiri (Emirates Club, UAE) na Sibomana Patrick (Young Africans, Tanzania).

Nyuma y’umukino, tariki 15 Ugushyingo 2019, ikipe y’u Rwanda izahita igaruka mu Rwanda aho igomba kwitegura undi mukino uzaba tariki 17 Ugushyingo 2019 aho izaba yakiriye ikipe y’igihugu ya Cameroun.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.