CAN 2021: Amavubi yatangiye nabi imikino yo gushaka itike

Yanditswe na BUGINGO FIDELE

Ku ya 14-11-2019 saa 19:49:01
Ikipe y'u Rwanda yatsinzwe na Mozambique mu mukino wa mbere wo gushaka itike ya CAN 2021

Mozambique 2-0 Rwanda

Cameroun 0-0 Cap Vert

Tariki 17-11-2019

Rwanda-Cameroun (Kigali-18h00)

Tariki 18-11-2019

Cap Vert-Mozambique (Praia-15h00)

Ikipe y’u Rwanda « Amavubi »  yatangiye nabi mu mikino yo gushaka itike y’imikino y’Afurika  « CAN 2021 »  aho yatsinzwe n’ikipe y’igihugu ya Mozambique ibitego 2-0.

Uyu mukino wabereye i Maputo tariki 14 Ugushyingo 2019, Mozambique  yitwaye neza itsinda Amavubi ibitego 2- 0 byatsinzwe na Stelio Ernesto ku munota wa 28 na  Edson André Sitoe « Mexer » ku munota 31.

Muri iri tsinda F, undi mukino wabaye tariki 13 Ugushyingo 2019,  Cameroun  izakira irushanwa yanganyije  na Cap Vert 0-0.

Nyuma yo gutsindirwa muri Mozambique, ikipe y’u Rwanda « Amavubi » kuri uyu wa Gatanu tariki 15 Ugushyingo 2019 iragaruka kugira ngo yitegure umukino w’umunsi wa kabiri mu itsinda F aho izakira ikipe y’igihugu ya Cameroun.

Biteganyijwe ko umukino uzabera kuri Sitade ya Kigali i Nyamirambo tariki 17 Ugushyingo  2019 guhera saa kumi n’ebyiri z’umugoroba (18h00). Kwijira kuri uyu mukino ni ibihumbi 20 mu myanya y’icyubahiro, ibihumbi 3 iruhande rwaho n’ibihumbi 2 ahasigaye hose.

Ikipe y’ igihugu ya Cameroun biteganyijwe ko igera mu Rwanda  kuri uyu wa Gatanu tariki 15 Ugushyingo 2019.

Ikipe y’u Rwanda yaherukaga guhura n’ikipe y’igihugu ya Cameroun mu mikino yo gushaka itike ya  CAN 2008, Amavubi yari mu itsinda rya 5 hamwe na Cameroun, Guinea Equatorial na Liberia.  Cameroun yatsinze Amavubi  imikino yombi aho ubanza wabereye mu Rwanda yatsinze ibitego 3-0 naho uwo kwishyura wabereye  i Garoua, Cameroun  itsinda  u Rwanda ibitego 2-1.

Urutse uyu  mukino uzahuza ikipe y’u Rwanda na Cameroun, ikipe ya Cap Vert yanganyije umukino wa mbere izakira Mozambique  tariki 18 Ugushyingo 2019.

Kugeza ubu Mozambique ni yo iyoboye urutonde n’amanota 3 igakurikirwa na Cameroun na Cap Vert zifite inota rimwe naho ikipe y’u Rwanda  ikaza ku mwanya wa nyuma (4) aho nta nota na  rimwe ifite.

Imikino y’umunsi wa 3 izongera kuba tariki 31 Kanama 2020 aho Cameroun izakira Mozambique naho  Cap Vert  yakire  ikipe y’u Rwanda. Muri iri tsinda kuko Cameroun ari yo izakira imikino ya nyuma  ya CAN 2021  ikipe imwe gusa ni yo izabona itike.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.