18°C , Mostly cloudy with showers | Kigali-Rwanda

Byinshi ku isaha yambikwa abavurirwa mu ngo mu Rwanda

Yanditswe na NTAWITONDA JEAN CLAUDE

Ku ya 14-09-2020 saa 10:25:53

U Rwanda ruri mu bihugu bikomeje kwifashisha ikoranabuhanga mu guhangana n’icyorezo cya COVID-19, kandi rigenda ritanga umusaruro uko iminsi ihita.

Nyuma ya robo n’indege zitagira abapirote, kuri ubu harifashishwa udukoresho tw’ikoranabuhanga twabugenewe dukozwe nk’amasaha yerekana igihe, ariko tukagira n’umumaro wo gukurikiranira no kuvurira mu ngo abarwayi ba COVID-19.

Iryo koranabuhanga ribonwa nk’igisubizo kirambye byo kwita kuri abo barwayi batarembye mu gihe bemeye kuvurirwa mu ngo zabo,  kakanagira uruhare mu kubarinda ko baba intandaro yo gukwiza icyo cyorezo mu bo babana cyangwa abaturanyi babo.

Nubwo kamenyesha igihe uwakambitswe, ni agakoresho gakoranywe  n’ikoranabuhanga rizwi nka “GPS” rihujwe n’irikoreshwa na Polisi y’u Rwanda  mu gukurikirana aho aho umurwayi ajya hose, ndetse gashobora no kumenyesha inzego zibishinzwe ko umuntu wakambaye ku bushake agerageza kukiyambura.

Uretse gutanga amakuru ku ngendo uwakambitswe akora no kuba kamufasha kumenya aho igihe kigeze, ni agakoresho wambikwa n’Inzego z’ubuzima akaba ari na zo zikagukuramo mu gihe umaze gukira.

Umuybozi w’Ikigo k’Igihugu gishinzwe Ubuzima (RBC) Dr. Sabin Nsanzimana yabwiye Imvaho Nshya ko ayo masaha ahabwa abantu bemeye kuyambikwa ku bushake bwabo.

Yagize ati: “Ni agakoresho gakozwe mu buryo katakwangirika n’iyo wakararana cyangwa ukakogana. Mbere yo kukambara umurwayi arabyemera, akemera no kubahiriza ibisabwa harimo no gukurikiranwa n’inzego zibishinzwe.”

Abaganga bakambitse umurwayi ni na bo baba bashobora kukamwambura mu gihe amaze gukira

Leta y’u Rwanda yafashe gahunda yo kuvurira abarwayi ba COVID-19 mu ngo nyuma y’aho bigaragaye ko abarenga 70% batahurwaho icyo cyorezo nta bimenyetso bagaragaza, bityo bikaba bishoboka ko bakurikiranirwa aho batuye kugeza bakize bitabaye ngombwa ko bahabwa ibitaro kwa muganga.

Kugira ngo umurwayi abe yakwitabwaho ari mu rugo iwe, bisaba kuba byemejwe n’inzego z’ubuzima ko afite COVID-19, kandi yiyemerera ku bushake ko yitabwaho akanavurirwa iwe mu rugo kugeza igihe inzego z’ubuzima zemeje ko yakize.

Agomba kuba nta bimenyetso bya COVID-19 agaragaza cyangwa se bihari ariko inzego z’ubuzima zamaze kwemeza ko bidakomeye.

Agomba kuba atarengeje imyaka 65 y’amavuko, ariko umwihariko wabaho mu gihe hamaze gukorwa isuzuma. Nanone kandi umutwayi agomba kuba afite ahantu hahagije mu rugo iwe byatuma atanduza abo babana cyangwa baturanye.

Ni agakoresho kamenyesha igihe nyirukukambikwa

Umusaruro w’ikoranabuhanga mu guhashya COVID-19

Ibisubizo bitangwa n’ikoranabuhanga by’umwihariko mu rugamba rwo guhangana n’icyorezo cya #COVID-19 bikomeza kwiyongera muri gahunda yo gutahura abarwayi bashya, gukurikiranaa abo bahuye na bo ndetse no kubavura.

Guhera muri Mata 2020 kugeza ubu, u Rwanda rukomeje kwifashisha indege nto zitagira abapirote (dones) mu gutanga ubutumwa bujyanye no kwirinda icyorezo cya COVID-19 by’umwihariko mu duce dutuwe cyane, utugoranye kutugeramo ndetse n’ahantu hibasiwe cyane kurusha ahandi.

Izo drones zifite ubushobozi bwo gukwiza amajwi ndetse no gufata amashusho yo ku rwego rwo hejuru agaragaza imyitwarire y’abaturage, by’umwihariko aho basabwa kwirinda cyane kurusha ahandi.

Ikoreshwa rya drones mu gutanga ubutumwa ahantu hatandukanye rikomeje gutanga umusaruro utagereranywa

Iyo gahunda yatangijwe nyuma y’aho bigaragariye ko abaturage banga kubahiriza amabwiriza yo kwirinda arimo kuguma mu rugo, gukaraba intoki, guhana intera ihagije no kwambara udupfukamunwa neza. Bwari uburyo bwunganira ubundi bukangurambaga bukorwa hifashishijwe itangazamakuru n’itumanaho ry’uburyo butandukanye.

Gusa ikoreshwa rya drone mu nzego z’ubuzima, rikomeje kubaka urwibutso rukomeye ku buvuzi bwo mu Rwanda, haba mu kurwanya COVID-19, muri gahunda yo gukwiza amaraso, gutera imiti yica malaria, ndetse no gukwiza imiti itandukanye mu Gihugu.

Uretse izo ndege nto, muri Gicurasi ni bwo u Rwanda rwatangiye kwifashisha “robots” mu buvuzi bw’icyorezo cya COVID-19, by’umwihariko mu gupima umuriro, gukurikirana abarwayi no kubika amakuru yabo.

Izo robo zahawe amazina y’Ikinyarwanda, Akazuba, Ikirezi, Mwiza, Ngabo n’Urumuri, zigira uruhare rukomeye mu kugabanya ibyago byo kwanduzanya hagati y’abarwayi ba COVID-19 n’abaganga babitaho umunsi ku wundi.

Buri imwe muri zo ifite ubushobozi bwo gupima abantu bari hagati ya 50 na 150 mu munota umwe, ubwo kugeza amafunguro n’imiti mu byumba by’abarwayi, no gufata amakuru zigahita ziyamenyesha abaganga bari ku kazi ku bintu byose bidasanzwe zitahuye mu byumba by’abarwayi n’ibindi.

Kuri ubu zirakoreshwa mu mavuriro n’ahandi abarwayi ba COVID-19 bitabwaho by’umwihariko, ndetse hari n’imwe yashyizwe ku Kibuga k’Indege Mpuzamahanga cya Kigali isuzuma ubushyuhe bw’umubiri ku bahageze baturutse mu mahanga cyangwa abajyayo mu kanya nk’aho guhumbya, ikagenzura n’abatubahiriza amabwiriza yo kwirinda ikwirakwizwa ry’icyo cyorezo.

Robot Urumuri ni yo ifasha mu bikorwa byo kwirinda COVID-19 ku Kibuga k’Indege Mpuzamahanga cya Kigali

Umwanditsi:

NTAWITONDA JEAN CLAUDE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.