26°C , Mostly cloudy | Kigali-Rwanda

Bugesera: Hinga Weze  yashyikirije  ibikoresho by’isuku  abafatanyabikorwa  bayo

Yanditswe na BUGINGO FIDELE

Ku ya 05-06-2020 saa 23:02:30
Abajyanama b'ubuzima n'ab'ubuhinzi ubwo bashyikirizwaga ibikoresho by'isuku

Umushinga Hinga Weze watangiye gushyikiriza ibikoresho by’isuku  byifashishwa mu gukaraba intoki ku matsinda  manini y’imirire  bakorana  nayo mu turere  10 uyu mushinga ukoreramo mu Rwanda.

Tariki 05 Kamena 2020 ni bwo iki gikorwa cyabereye mu Karere ka Bugesera, Umurenge wa Mayange mu Kagari ka Kibenga.

Hinga Weze ni umushinga watangijwe ku bufatanye n’Ikigo k’Igihugu Gishinzwe Guteza Imbere Ubuhinzi n’Ubworozi (RAB) ku nkunga y’Umuryango w’Abanyamerika wita ku iterambere mpuzamahanga (USAID), ukaba wibanda ku buhinzi no kunoza imirire mu ntego yo gufasha abahinzi basaga ibihumbi 700 mu turere 10 uyu mushinga ukoreramo.

Muri iyi gahunda, Hinga Weze  izashyikiriza ibikoresho by’isuku birimo kandagira ukarabe  n’isabune bigera ku bihumbi 3  ku matsinda ibihumbi 3  yo mu turere 10 turimo Bugesera, Gatsibo, Kayonza, Ngoma, Karongi, Ngororero, Nyabihu, Nyamasheke, Rutsiro  na Nyamagabe. Ibi bikoresho bikaba byaratwaye miriyoni zisaga 74 z’amafaranga y’u Rwanda.

Mu Karere ka Bugesera, gahunda yo gutanga ibi bikoresho by’isuku yabereye mu murenge wa Mayange mu Kagari ka Kibenga. Kamuzima Phoebe uhagarariye umushinga Hinga Weze mu Karere ka Bugesera yatangaje ko ibi bikoresho bizajya byifashishwa n’amatsinda yo mu mudugudu igihe bazajya baba bagiye muri gahunda y’igikoni cy’umudugudu.

Ibikoresho byatanzwe birimo Kandagira ukarabe n’isabune

Aha Kamuzima yasobanuye ko iyi gahunda y’igikoni cy’umudugudu  ari  inyigisho zibanda ahanini ku murezi w’umwana kumugirira isuku no kumutegurira indyo yuzuye bitewe n’ikigero agezemo.

Kamuzima Phoebe yavuze ko ibi bikoresho babitanze muri iki gihe yo kwirinda icyorezo cya COVID-19 kuko imwe mu ngamba zo kwirinda iki cyorezo harimo gukaraba intoki n’amazi meza n’isabune inshuro nyinshi.

Iyi gahunda yahuriranye no kwitegura umunsi mpuzamahanga wo kwita ku buziranenge bw’ibiribwa uzaba tariki 07 Kamena 2020. Kamuzima yagize ati : “Twahuye n’abahagarariye abandi mu midugudu yose barimo  abajyanama b’ubuzima n’ab’ubuhinzi badufasha kwigisha abandi. Twafashe umwanya wo kubaha ubutuma rero bwo kwita no ku isuku y’ibiribwa.”

Kamuzima Phoebe uhagarariye umushinga Hinga Weze mu Karere ka Bugesera

Mu karere ka Bugesera, Kamuzima Phoebe avuga ko bakorera mu mirenge 8 irimo   Nyarugenge, Shyara, Musenyi, Kamabuye, Mayange, Rilima, Gashora na Rweru. Akomeza avuga ko muri iyo mirenge yose bakora bifashishije abajyanama b’ubuzima n’ab’ubuhinzi kuko Hinga Weze igamije guca indwara zishamikiye ku mirire mibi    aho bifashisha ubuhinzi buhangana n’imihindagurikire y’ikirere ndetse no kwigisha ababyeyi cyangwa abarezi  b’abana gutunganya  indyo yuzuye bita ku isuku y’ibiribwa n’iy’aho batuye.

Uwanyirigira Anitha usanzwe ari umujyanama  w’ubuzima mu mudugudu wa Rwakaramira mu Kagari ka  Kibenga yavuze ko ibi bikoresho bizabagiraga akamaro mu bijyanye n’isuku birinda umwanda. Ahishakiye Findensius, umujyanama w’ubuhinzi mu mudugudu wa Rwarusako mu   Kagari ka Kibenga yavuze ko basanzwe bafite amatsinda mu midugudu. Yakomeje avuga ko  ibi bikoresho  igihe bahuriye hamwe  bizajya  bibafasha kugira isuku bakaraba.

Umunyamabanga nshingwabikorwa w’ Akagari ka Kibenga, Kalisa François  yashimiye Hinga Weze kuri ubu bufatanye  abizeza  ko bazakomeza gufatanya muri gahunda zose zigamije imibereho myiza y’abaturage.

Iyi gahunda yo gutanga ibikoresho biteganyijwe ko izakomereza no mu tundi turere Hinga Weze ikoreramo.

Mbere yo gushyikirizwa ibikoresho by’isuku bahawe ubutumwa bwo kwita ku isuku y’ibiribwa

Bibukijwe uko bakoresha Kandagira ukarabe mu rwego rwo kugira isuku hanirindwa COVID-19

Uwanyirigira Anitha, umujyanama  w’ubuzima mu mudugudu wa Rwakaramira

Ahishakiye Findensius, umujyanama w’ubuhinzi mu mudugudu wa Rwarusako

Umunyamabanga nshingwabikorwa w’ Akagari ka Kibenga, Kalisa François

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.