Bugesera FC yatsinze Rayon Sports FC mu mukino ubanza wa ½

  • SHEMA IVAN
  • Mata 17, 2024
  • Hashize ukwezi 1
Image

Bugesera FC yatsinze Rayon Sports FC ibitego 1-0 mu mukino ubanza wa 1/2 cy’irangiza mu Gikombe cy’Amahoro mu mukino wabaye kuri uyu wa Gatatu tariki 17 Mata 2024, kuri Kigali Pele Stadium.

Umukino watangiye utuje cyane ku mpande zombi nta kipe irabona uburyo bukomeye imbere y’izamu.

Ku munota wa 5’ Bugesera FC yakoze “contre-attaque” ku mupira 

Tuyihimbaze Gilbert yinjiranye mu kibuga cya Rayon Sports, awucomekeye Dushimimana Olivier uba muremure.

Ku munota wa 7’ Rayon sports yabonye amahirwe yo gufungura amazamu ku mupira Ishimwe Ganijuru yahinduye, usanga Charles Bbaale awukozeho, umunyezamu Niyongira awushyira muri koruneri itagize icyo itanga.

Rayon Sports yasatiraga cyane muri iyo minota yongeye kubona andi mahirwe imbere ry’izamu rya Bugesera ku mupira mwiza Tuyisenge Arsene yahinduye mu rubuga rw’amahina, usanga Charles Bbaale  wakinishije umutwe, umunyezamu Niyongira awukuramo mbere y’uko atabarwa na bagenzi be.

Ku munota wa 26’ Bugesera FC yafunguye amazamu ku igitego cyatsinzwe na Ssentongo Farouk “Ruhinda” n’umutwe nyuma yo guhindurwa na Tuyihimbaze Gilbert.

Nyuma y’iminota ibiri gusa Bugesera FC yongeye kugera imbere y’izamu rya Rayon Sports ku mupira wahinduwe na Iradukunda Djaroudi ufatwa neza n’umunyezamu Ndiaye.

Ku munota wa 35’ Rayon Sports yabonye uburyo bwo kwishyura igitego ku mupira Charles Bbaale yahawe na Serumogo, agorwa no kuwutera, usanga Tuyisenge Arsene wateye ishoti ari inyuma y’urubuga rw’amahina, umupira ufatwa neza na Niyongira Patience wabanje kuryama.

Iminota ya nyuma y’igice cya mbere yihariwe na Rayon Sports yakomeje gushaka igitego cyo kwishyura uko yishyura harimo ikosa Muhire Kevin yahannye, umupira ukurwamo na Niyongira usanze Kanamugire Roger awuteresha ivi, ku bw’amahirwe make ujya ku ruhande gato rw’izamu.

Iminota 45 y’igice cya mbere yarangiye Bugesera FC iyoboye  umukino n’igitego 1-0.

Mu gice cya kabiri Rayon Sports yatangiranye impinduka Mugisha Francois asimbura Ngendahimana Eric.

Iminota itanu ibanza muri iki gice yihariwe na Bugesera FC yakinaga neza ndetse yashoboraga kubona penaliti ku ikosa ryari rikorewe Dushimimana Olivier mu rubuga rw’amahina umusifuzi Twagirumukiza arabyihorera. 

Ku munota wa 56’ Rayon Sports yongeye kubona andı mahirwe yo gutsinda igitego cyo kwishyura nyuma yaho Charles Bbaale ananiwe kuroba Niyongira wahise asohoka neza, umupira awukuzaho ukuboko. 

Ku munota wa 71’ Bugesera FC yashoborga kubona penaliti ku mupira Dushimimana Olivier yateye ukorwaho na Serumogo Ali mu rubuga rw’amahina, ariko umusifuzi Twagirumukiza arabareka bakomeza gukina, ahubwo haterwa koruneri.

Iminota 10 icumi ya nyuma y’umukino yihariwe na Rayon Sports yashakaga igitego cyo kwishyura ariko igorwa cyane n’ubwugarizi bwa Bugesera FC ndetse n’umunyezamu Niyongira Patience wagize umukino mwiza cyane. 

Ku munota wa 89’ Bugesera FC yashobora kubona igitego cya kabiri ku mupira muremure Iradukunda Djarudi yacomekewe agerageje kwinjirana mu rubuga rw’amahina, Mucyo Didier akina neza awumukuraho.

Mbere yuko umukino urangira Umusifuzi wa Kane yongeyeho iminota ine y’inyongera.

Ku munota 90+3 Youssef Rharb wa Rayon Sports yabonye umupira mwiza uvuye kuri Iradukunda Pascal, izamu ryambaye ubusa, abakinnyi bose baguye, awutera hejuru y’izamu ari muri metero esheshatu mu rubuga rw’amahina.

Umukino warangiye Bugesera FC itsinze Rayon Sports igitego 1-0 mu mukino ubanza wa 1/2 mu Gikombe cy’Amahoro.

Umukino wo Kwishyura hagati y’impande zombi uteganyijwe ku wa Kabiri tariki 23 Mata 2024 saa cyenda, kuri Stade ya Bugesera.

  • SHEMA IVAN
  • Mata 17, 2024
  • Hashize ukwezi 1
TANGA IGITEKEREZO
Aisha says:
Mata 18, 2024 at 10:02 am

Ariko bugesera ntiyirate kuko muri Champions bamenyeko turikumwanya wa 2 ba isahakwisaha bamanuka mucyiciro 2

Andika igitekerezo

AMATEGEKO AGENGA IYANDIKA RY'IGITEKEREZO CYAWE