Kigali-Rwanda

Partly cloudy
22°C
 

Bugesera FC yasinyishije abatoza bungirije

Yanditswe na BUGINGO FIDELE

Ku ya Sep 1, 2018

Nyuma  yo guha amasezerano y’umwaka umwe, Seninga Innocent  nk’umutoza mukuru, ikipe ya Bugesera FC yamaze gusinyisha abatoza bungirije bazafatanya na Seninga gutoza iyi kipe mu mwaka w’imikino wa 2018-2019.

Manirakiza Gervais (ibumoso) arikumwe n’umunyamabanga wa Bugesera FC, Karenzi nyuma yo kugirwa umutoza wungirije

Nk’uko bitangazwa n’umunyamabanga mukuru w’iyi kipe ya Bugesera FC, Karenzi Sam aba batoza ni   Manirakiza Gervais wagizwe umutoza wungirije. Uyu akaba yaraciye mu makipe atandukanye arimo UNR FC, Police FC, AS Muhanga ndetse na Espoir FC.

Uretse uyu mutoza wungirije, Bugesera FC yanasinyishe umutoza w’abanyezamu ari we Ndaruhutse Theogene Djabil wakiniye amakipe atandukanye mu Rwanda arimo na Kiyovu  ubu akaba   yari asanzwe ari umutoza w’abanyezamu  b’ikipe y’Amagaju FC.

Ndaruhutse Theogene Djabil, umutoza mushya w’abanyezamu

Uku kwiyubaka kwa Bugesera FC biri mu ntego bihaye yo kugira ngo bazitware  neza mu mwaka w’imikino  wa 2018-2019 bitandukanye n’umwaka uheruka w’imikino wa 2017-2018 aho iyi kipe yasoreje ku mwanya wa 11 aho  yageze mu minsi ya nyuma irwana no kumanuka mu kiciro cya kabiri nyamara mu mwaka  wari wabanje wa 2016-2017 yari yasoje ku mwanya wa 5.

Iyi kipe kandi yamaze no kubona umuterankunga “Safe Gas” uzajya ayiha miliyoni 5 buri kwezi mu gihe k’imyaka 5.