18°C , Mostly cloudy with showers | Kigali-Rwanda

Bugesera: Ababyeyi bafite abana mu rugo mbonezamikurire rwa Kamabuye barishimira impinduka 

Yanditswe na Mukagahizi Rose

Ku ya 19-11-2019 saa 17:52:40
Umuyobozi wa Porogaramu za Plan International mu Rwanda Dr. Sebareze Lambert

Ababyeyi bafite abana mu rugo mbonezamikurire rwa Kamabuye mu Karere ka Bugesera baravuga ko mbere bagorwaga no kubona aho gusiga abana babo igihe bagiye mu kazi. Gusa, ngo nyuma yo kubona urugo mbonezamikurire bubakiwe n’Umuryango Plan International Rwanda ngo imibereho yabo yarushijeho kuba myiza.

Nzeyimana Vital, umwe mu babyeyi avuga ko iyo abana babo bari mu kigo mbonezamikurire bumva batekanye kuko bafite abarezi babitaho hanyuma bakanabigisha bakunguka ubumenyi.

Yagize ati: “Turishimira intambwe yatewe kuko iyo ugeze mu ishuri ukabaza nka mwarimu ahita akwereka ukuntu umwana wageze mu irerero atandukanye nutararigezemo kuko bo bihuta mu myigire.”

Muri uru rugo, umwana ahabonera umutekano, gukanguka mu bwenge, isuku n’isukura. Hari kandi ubumenyi mu kurera umwana, ubuzima, imirire, uburezi n’ibindi.

Nyuma y’amahugurwa Plan International Rwanda yahaye abanyamakuru mu gihe k’iminsi ibiri mu birebana n’uburyo bwiza bwo gukora inkuru zirebana n’abana, uko amafoto yabo akoreshwa mu nkuru ndetse no kubakorera ubuvugizi mu gihe baba bahuye n’ihohoterwa runaka, abanyamakuru bafashijwe gusura urugo mbonezamikurire rw’abana bato rwo mu murenge wa Kamabuye mu Karere ka Bugesera.

Muri aka karere, Plan International Rwanda yubatse ibigo 15 igamije gufasha ababyeyi kubona aho abana babo bigira heza, bakanahaherwa indyo yuzuye, bigatuma  ababyeyi babo babona uko bajya mu yindi mirimo.

Hari bamwe mu babyeyi bavuze ko ari ibikorwa bishimiye cyane aho bemeza ko bahuraga n’imbogamizi zo gukora imirimo bari kumwe n’abana babo bato kubera kubura abo babasigira cyangwa bakabasiga mu rugo bonyine.

Ikindi ngo uburyo bwo kwita ku bana babo bwabaga bugoranye cyane, abana bakabasiga ku muturanyi rimwe na rimwe udashoboye kuba yamwitaho nkuko umubyeyi amwitaho ariko muri uru urwo rugo ibikorerwa abana babo ngo ni ntagereranywa.

Kuri ubu ngo abana bamaze  kumenya gusabana n’abandi, bafite isuku, bigatuma bataha bakumbuwe mu gihe mbere atari ko byari bimeze.

Izo mbogamizi zose zavuyeho nyuma yaho abo bana babo basigaye birirwa mu rugo mbonezamikurire rwa Kamabuye  aho bitabwaho bakaza kubatwara barangije akazi kabo.

Nk’ababyeyi na bo biyemeje kugira uruhare mu kunganira uru rugo buri wese yitanga uko ashoboye kugira ngo ruzagere ku nshingano zarwo.

Umuyobozi  wa Porogaramu za  Plan International mu Rwanda Dr. Sebareze Lambert, avuga ko iyo ababyeyi basize abana mu ngo bakajya mu mirimo, abo bana baba bashobora guhungabanywa n’ icyo ari cyo cyose cyabageraho.

Yagize ati: “Ni byiza ko abana bagira aho baba, bakagira irerero, bagakura neza ku buryo bazaba abana beza bakaba n’abantu bakuru bafitiye igihugu akamaro.”

Dr. Sebareze asanga Leta itakora ibintu byose ahubwo  ifatanya n’abafatanyabikorwa ndetse n’ababyeyi hanyuma ibintu bikarushaho kugenda neza.

Yijeje ubufatanye kugira ngo abana bagire uburere bwiza kandi bakure neza bityo bazigirire umumaro ndetse bawugirire n’igihugu cyababyaye.

Itangazamakuru ryagira uruhare mu gutuma umwana abaho neza

Dr. Sebareze avuga ko itangazamakuru ridakwiye gusigara inyuma mu kugira ubumenyi ndetse no mu bikorwa byatuma umwana akura neza.

Yagize ati: “Icyo tuba twifuza cyane ni ukugira ngo abanyamakuru na bo bagire uruhare mu gutuma intego Plan yiyemeje zigerwaho, itangazamakuru rifite uruhare runini mu gutuma abantu bakangurirwa ibijyanye n’uburenganzira bw’umwana”.

Byongeye kandi ngo rigira uruhare runini mu gutanga ubutumwa burebana no kubungabunga uburenganzira bw’umwana bukagera kuri benshi.

Akomeza agira ati: “Ikindi twifuza ni uko aya mahugurwa atuma abanyamakuru na bo bumva neza ubwo butumwa bugomba gutangwa ubwo ari bwo.  Plan ifite intego kandi yihaye ikerekezo ko  igomba kugeraho mu myaka itanu  mu bintu 4 by’ingenzi.”

Mu kerekezo cya Plan International Rwanda harimo kubungabunga uburenganzira bw’umwana cyane cyane umwana w’umukobwa aho bashaka ko 2 200 000 z’abana b’abakobwa ku Isi babasha kugira uburenganzira bwabo busesuye, bakiga, bakamenya, bakabaho neza, bakagirira akamaro igihugu cyabo.

Ibyo ngo bijyanye no kubarinda ihohoterwa iryo ari ryo ryose ryabakorerwa, bijyanye no gutuma bakura neza bakiga, ntibahohoterwe.

Indi nkingi ya kabiri ni ijyanye n’inkingi y’ubuzima ariko bihereye ku bigo mbonezamikurire.

Dr. Sebareze avuga ko umwana afite uburenganzira bwo gukura neza, akarerwa neza, kuva ku mubyeyi umutwite ubuzima bwe bukitabwaho, yagera igihe cyo kujya muri cya kigo mbonezamikurire nabwo akabaho neza, akigishwa iby’ibanze, agahabwa indyo yuzuye, akarindwa n’ihohoterwa rishobora kumukorerwa mu gihe yaba yasigaye mu rugo wenyine.

Indi mpamvu ya gatatu ni ubuzima bujyanye n’imyororokere aho abana b’abangavu bigishwa imyitwarire yabo muri icyo kiciro gikomeye baba barimo bishobora kubateza ibishuko ariko bakigishwa ubumenyi bw’ibanze bw’uko bashobora kwitwara bityo, bakazakura badatewe inda z’imburagihe cyangwa se badashowe mu mibonano mpuzabitsina imburagihe cyo kimwe n’indwara zishobora guturuka ku mibonano mpuzabitsina.

Yagize ati: “Turabafasha mu gukumira inda zitateganyijwe,  tubaha ubumenyi ariko noneho na bo byagezeho tukabegera. Hari abo dufasha kwiga imyuga itandukanye kugira ngo bigirire akamaro cyangwa se bagakora indi mirimo ibyara inyungu kugira ngo babashe kwigira.”

Hari kandi  no guhangana n’ibiza ariko cyane cyane bibanda mu kubikumira kubera ko ibiza iyo bije ahanini abantu bagerwaho n’ingaruka zikomeye usanga ari abana cyane cyane abana b’abakobwa cyangwa abagore.

Ibyo byiciro byitabwaho hagamijwe kurinda uburenganzira bwabo.

Mu kurinda ibijyanye n’ibiza, Plan International Rwanda ikorana na leta binyuze muri Minisiteri y’Ibikorwa by’Ubutabazi, harebwa ibiza bishobora kuba ahantu runaka bityo,  abantu bahatuye bagakangurirwa uburyo bashobora kubyirinda bitaraba.

Icyakora, nk’uko akomeza abivuga ngo hari n’ibyo abantu biteza, urugero niba abantu batemye amashyamba cyangwa se bagasiba ibyobo byagafashe amazi niho amazi ahera asanga ahantu habaye umwuzure.

Hari kandi gutuma abantu babaho batajegajezwa n’ibyo biza ahubwo bakabaho neza bakabasha guhangana n’ibyo biza bitabagizeho ingaruka.

Ahantu bahuye n’ibiza na bo bafashwa kureba ibyo bakora bagakora amatsinda yo kubitsa no kugurizanya nyuma bakazabasha kwiteza imbere cyangwa bakabasha kugura imbuto kugira ngo bazahinge, ibyo byose, bigatuma babasha guhangana n’ibyo biza bishobora kubagiraho ingaruka.

Asanga ari  inshingano z’Umunyarwanda wese mu igenamigambi akora ko umwana w’umukobwa yibonamo.  Ese ibibazo bye byihariye ahura nabyo arisangamo? Hari igihe azagera akajya mu mihango. Ese abana bakomoka ku babyeyi batishoboye babayeho bate kugira ngo babone n’ibyo bikoresho?

Agasaba ko mu igenamigambi  ibyo bintu bikwiye gutekerezwaho.

Nzeyimana Vital, umwe mu babyeyi bashima impinduka zazanywe n’ikigo mbonezamikurire cya Kamabuye

Umwanditsi:

Mukagahizi Rose

Tanga Igitekerezo

Email yanyu ntigaragazwa ku rubuga. Amazina na Email ni ngombwa.