27°C , Mostly cloudy | Kigali-Rwanda

BK yatangiye korohereza abatsindiye amasoko ibaha inguzanyo

Yanditswe na TUMUKUNDE GEORGINE

Ku ya 12-08-2020 saa 12:34:48

Banki ya Kigali (BK Plc) yongeye kwibutsa abakiriya bayo ko ikomeje gukorana n’abatsindiye amasoko ikabaha inguzanyo kugira ngo ibikorwa byabo bigende neza. Irakangurira n’abatarayigana kuyigana ikabafasha, ibikorwa byabo ntibidindire.

Umukozi wa BK Bahizi Emmanuel, ati: “Umunyarwanda wese cyangwa umunyamahanga uba mu Rwanda ufite amasezerano runaka cyangwa se amasoko yatsindiye ashaka gushyira mu bikorwa natugane tumugire inama kandi tumuhe inguzanyo ibikorwa bye bigerweho”.

Nkuko Bahizi abigarukaho, igisabwa ni ukwerekana kontaro cyangwa amasezerano yatsindiye uko ateye, uko angana, ibyangombwa bigaragaza ko yayatsindiye, agatanga ingwate utayifite bakajya inama y’uko bamufasha kandi ibyo byose bifata igihe gito, nk’ibyumweru bibiri, agahabwa inguzanyo.

Bahizi yakomeje agaragaza uburyo ingwate atari ingenzi gusa kuri banki ahubwo n’umukiriya bimufasha kubona inguzanyo ihendutse.

Yakomeje ashimangira ko BK ifite ubushobozi buhambaye bwo gutanga inguzanyo, aho ishobora no guha umuntu agera kuri miriyari zisaga 40 z’amafaranga y’u Rwanda. Ariko n’iyo haza ushaka irenze iyo hari uburyo bwo gukorana n’izindi banki akayibona.

Ati: “Agaciro kontaro yaba ifite kose, tubasha kuguha inguzanyo”.

Ibyo ukeneye inguzanyo muri BK yitwaza

Ibyo ukeneye inguzanyo asabwa ni ugufungura konti, akandika ibaruwa isaba inguzanyo irimo ibisabwa byose; amafaranga akeneye, icyo agiye gukoreshwa, igihe azayishyura uko kingana, hakarebwa ko anujuje ibisabwa byavuzwe haruguru.

Bahizi asobanura ko inyungu ku nguzanyo zitandukanye biterwa n’umukiriya uwo ari we, ingwate yazanye uko ingana, uburambe afite mu kazi, ariko muri rusange iba iri hagati ya 16% kugera kuri 18%.

Avuga ko bafasha umukiriya ubagannye bakamugira inama kugira ngo atagwa mu gihombo, ntibirangirira gusa mu kumuhereza inguzanyo.

Ati: “Biri mu inyungu zacu nka banki iyo umukiriya wacu yungutse. Iyo dusanze ushobora kugwa mu gihombo tukugira inama y’uko washyira mu bikorwa amasezerano yawe (Contract)”.

Banki ya Kigali ni banki nyarwanda, ikorera Abanyarwanda, kubateza imbere biri mu nshingano zayo.

Umwanditsi:

TUMUKUNDE GEORGINE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.