18°C , Partly cloudy | Kigali-Rwanda

Bizimana Yannick yahawe igihembo cy’umukinnyi witwaye neza mu Gushyingo 2019

Yanditswe na BUGINGO FIDELE

Ku ya 12-12-2019 saa 17:16:24
Bizimana Yannick ubwo yashyikirizwaga igihembo

Biziman Yannick,  rutahizamu w’ikipe ya Rayon Sports  ni we wahawe igihembo  cy’umukinnyi witwaye neza kurusha abandi mu kwezi k’Ugushyingo 2019, igihembo gutangwa buri kwezi  n’itsinda ry’abafana  ba Rayon Sports  “March Generation”   bafatanyije na Skol, umuterankunga mukuru w’iyi kipe.

Bizimana yashyikirijwe iki gihembo  tariki 11 Ukuboza 2019 mu birori byabereye mu Nzove aho ikipe ya Rayon Sports ikorera imyitozo akaba ari naho uruganda rwa Skol ruherereye.

Uyu rutahizamu yahawe iki gihembo gihwanye n’ibihumbi 100 by’amafaranga y’u Rwanda  ahigitse abandi bakinnyi batatu bari bahanganye barimo Rugwiro Herve ndetse na Iranzi Jean Claude.

Bizimana Yannick mu Gushyingo 2019 yitwaye neza atsinda ibitego 2 byahesheje amanota 3 ikipe ya Rayon Sports ku mukino wa AS Muhanga wabaye tariki 28 Ugushyingo 2019. Yanitwaye neza kandi abasha gutanga imipira ibiri yavuyemo ibitego mu mukino 5 yabashije gukina.

Uretse iki gihembo   cy’umukinnyi witwaye neza mu Gushyingo 2019, Bizimana Yannick  yanagenewe ishimwe  rigana n’ibihumbi 100 by’amafaranga y’u Rwanda n’itsinda ry’abafana  “Gikundiro Lovers” ribarizwa i Gikondo nyuma yo gutsinda igitego mu mukino wa shampiyona  uheruka, Rayon Sports yatsinze Heroes FC ibitego 4-1.

Akimara guhabwa ibi bihembo byombi, Bizimana Yannick wageze muri Rayon Sports  muri uyu mwaka avuye muri AS Muhanga yavuze ko  kubona iki gihembo byamushimishije cyane kandi byamuteye imbaraga zo gukomeza gukora cyane kugira ngo n’ubutaha azongere yegukane iki gihembo. Bizima yashimiye cyane abakinnyi bagenzi be, ubuyobozi  ndetse n’abana ba Rayon Sports batekereje iki gikorwa.

Muri uyu muhango hanashimiwe  amatsida mato yibumbiye mu itsinda rigari rya “March Generation” ahashimiwe itsinda rya mbere ko ryitwaye neza muri Nzeri n’Ugushyingo 2019 mu gihe itsinda rya 10 ryitwaye neza mu Kwakira 2019.

Igihembo cy’ukweki k’Ukwakira 2019 cyari kegukanwe na Nizeyimana Mirafa ukina hagati akaba yaragihawe tariki 16 Ugushyingo 2019, umuhango wabereye muri La Palisse Hotel Nyandungu.

Nyuma yo gutsindira iki gihembo, Bizimana Yannick yavuze ko agiye gukora cyane kugira ngo azongere akegukane

Bizimana Yannick (hagati) ari kumwe na Runigababisha Martin (ibumoso) uyobora ihuriro ry’amatsinda y’abafana ba Rayon Sports na Uwimana Jeannine (iburyo), umunyamabanga mukuru wa March Generation

Bizimana Yannick ari kumwe n’abakinnyi bagenzi be

Umwanditsi:

BUGINGO FIDELE

One Comment on “Bizimana Yannick yahawe igihembo cy’umukinnyi witwaye neza mu Gushyingo 2019”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.