21°C , Partly sunny | Kigali-Rwanda

Bifuza ko nyuma ya Kabuga, Agathe Habyarimana yafatwa

Yanditswe na Imvaho Nshya

Ku ya 18-05-2020 saa 09:20:22

Inkuru y’itabwa muri yombi ry’Umuherwe Kabuga Félicien wamaze imyaka 26 ahunga ubutabera ryazamuye imbamutima z’abantu batandukanye, mu Rwanda, mu Bufaransa n’ibindi bice bitandukanye ku Isi, cyane cyane Abarokotse Jenoside yakorewe Abatutsi bagifite ibikomere by’imihoro yatumije igakwizwa mu Nterahamwe zishe abarenga miriyoni mu minsi 100.

By’umwihariko, Leta y’u Rwanda yakiriye neza itabwa muri yombi rya Kabuga inashimangira ko ritanga ubutumwa ku bakurikiranyweho ibyaha bya Jenoside yakorewe Abatutsi bakihishe hirya no hino ku Isi, ko bazashyira bakaryozwa amabi bakoze.

Mu Bufaransa, hari abo itabwa muri yombi rya Kabuga ryabaye ku wa Gatandaru tariki 16 Gicurasi 2020, ryateye ibinezaneza n’urujijo.

Muri bo harimo François Graner, Umushakashatsi akaba n’uwe mu bagize Umuryango Survie washyiriweho kwamagana ibikorwa bibi byakozwe n’u Bufaransa muri Afurika mu gihe cy’Ubukoroni na nyuma.

François Graner ni n’umwanditsi w’ibitabo akaba n’impuguke ku mateka y’u Rwanda cyane cyane arebana na Jenoside yakorewe Abatutsi. Mu kiganiro yagiranye na Radio Mpuzamahanga y’u Bufaransa (RFI), yashimangiye ko nyuma y’iminsi ibiri Kabuga atawe muri yombi, hakiri byinshi bikwiye kubazwa ubutabera bw’u Bufaransa ku bantu bagikingiwe ikibaba kandi uruhare rwabo muri Jenoside rungana cyangwa ruruta urwa Kabuga.

Umuryango Survie usanga Kabuga afitanye isano ya bugufi n’Umugore wa Nyakwigendera Perezida Habyarimana Juvenali, Madamu Agathe Kanziga, wavuzweho uruhare rukomeye mu itegurwa n’ishyirwa mu bikorwa rya Jenoside yakorewe Abatutsi.

François Graner, Umushakashatsi akaba n’uwe mu bagize Umuryango Survie

François Graner yavuze ko Kabuga Félicien na Agathe Habyarimana bari bahujwe na Politiki y’Akazu, ariko Madamu Kanziga akaba yarahawe ubuhungiro mu Bufaransa guhera ku buyobozi bwa François Mitterand kugeza n’ubu.

Yavuze ko Agathe Habyarimana yacumbikiwe n’u Bufaransa ku buyobozi bwa Mitterrand ahabwa n’ibyangombwa bimwemerera gutura muri icyo Gihugu mu gihe ku rundi ruhande hari ibimenyetso simusiga bigaragaza ko yagize uruhare rukomeye mu itegurwa n’ishyirwa mu Bikorwa rya Jenoside yakorewe Abatutsi.

Ati: “Twishimira ko ubutabera bw’u Bufaransa bwatangiye kwiyemeza kugeza imbere y’ubutabera abakoze Jenoside yakorewe Abatutsi. Ariko twasigaranye ikibazo cy’uburyo mugenzi we Kabuga yatabwa muri yombi  agasigara agikingiwe ikibaba. Twizeye ko uwo tuzumva tafashwe ubutaha ari Agathe Habyarimana.”

Uruhare rwa Kanziga muri Jenoside

Nubwo imyaka ibaye myinshi akingiwe ikibaba n’u Bufaransa nk’umupfakazi wahuye n’ingorane zo kubura umugabo, amateka agaragaza ko Agathe Kanziga Habyarimana atigeze aba umuntu woroshye kuko ari we wayoboraga mu izina ry’umugabo we.

Bivugwa ko icyatumye Kanziga ayobora Politiki y’Akazu k’abakomokaga mu Majyaruguru y’Iburengerazuba bw’u Rwanda, by’umwihariko mu zahoze ari Perefegitura ya Ruhengeri na Gisenyi, ari uko na we ari ho yakomokaga ndetse akaba yari anafitanye isano ya bugufi n’abayobozi bakuru b’Igihugu abandi bavukanaga n’umugabo we “bahuje imyumvire yo gutsemba Abatutsi.”

Imbaraga za Agathe Kanziga zatangiye kwigaragaza mu 1988  ubwo Perezida Habyarimana kongera kwiyamamariza kuba Perezida, akamubwira ko yumva yasimburwa na Col Stanislas Mayuya yabonaga nk’umuntu washobora kuyobora Igihugu.

Ifoto ya Agathe Kanziga yafashwe mu mwaka wa 1977

Icyo gitekerezo cyarakaje Agatha Kanziga na we wari ufite basaza be b’ibikomerezwa mu butegetsi, biviramo Col Mayuya kwicwa arashwe na Sergeant Birori na we waje kwicwa nyuma y’uko asabye ko Kanziga yahamagazwa mu rubanza nk’umuntu wamutumye kwica.

Muri Mutarama 1993, itsinda ry’impuguke mpuzamahanga ryari riyobowe n’Umufaransa Jean Carbonare, ryakoze iperereza ku bwicanyi bwakorerwaga mu Rwanda.

Risubiye mu Bufaransa nyuma y’ibyumweru bitatu, Carbonare yatangarije kuri tereviziyo France2 ko babonye bimwe mu byobo byatabwagamo Abatutsi bicwaga, yemeza ko hari ibimenyetso by’umugambi wo kumaraho Abatutsi, wari urangajwe imbere na Perezida Habyarimana n’umugore we Kanziga Agathe.

Mu Kazu k’abahezanguni b’Abahutu bari bafite umugambi wo gutsemba Abatutsi, harimo musaza wa Kanziga Colonel Elie Sagatwa n’abandi bivugwa ko bari bahuje imyumvire cyane, Sagatwa akaba ari no mu itsinda rikunze kugarukwaho cyane ko ryaba ryaragize uruhare mu ihanurwa ry’indege yari itwaye Perezida Habyarimana.

Bimwe mu bimenyetso byagiye bishyirwa hanze binemeza ko Kanziga na Kabuga bari abaterankunga bakuru ba Radio RTLM n’Ikinyamakuru Kangura byagize uruhare rukomeye mu gukangurira rubanda nyamwinshi kwijandika mu bwicanti bwakorerwaga Abatutsi, bashinjwa kuba ibyitso by’Inkotanyi.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.